Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 1

Kátana san?

Kátana san?

KA UAGU SÚDINI LUBÉI?

Líderagubadibu basubudiruni kátabu lan luma ka lan súdinibei bun lun desidírü ban buidu danme le hadügüdarun amu buagu.

KABA HAMUGA BADÜGA?

Saminabá luagun sügǘ le: barüharu Karen diisi minutu lúmagiñe tachülürün lidoun aban fedu, sódini, aba taganbuni tumalali aban tasubudirágun tanagangiñe ariñaga tun:

“Numá, ka badügübei ñein bábugua?”.

Dan le tadigiragun, aba tarihinu Jessica to tumada anutén lan tau bián habuhabutu. Ábati tinchun aban tun ariñageina: “Mámaadibu irahü. Gayaraahali básügürüni buidu, adián?”.

Mabusenruntu Karen tatun ladüga magunfulirun tágili lan irumudiri le ídanbei gayara lan tadügüni. Gama lumoun, mabusenruntu giñe lun tasaminarun tumada mésebewa lan tuma. Buiti giñe tigaburi Jessica. Anhein gurá tubéi, maweirinrügü liña luriban. “Aban habuhabutu to —tiña Karen túnguarügü—, mama düroga”.

Lun hamuga buguya lan Karen, kaba hamuga badüga?

RÁRAMABA ASAMINARA

Lun desidírü ban lau lichú aau lidan burí sügǘ ítarati, mosu basubudiruni ka lan luwuyeri gürigia buguya. Mini lan lira, furangu lan bun káteitimañadibu lan, ka lan súdinibei bun luma ka lan bafiñerubei. Líderagubadibu lira lun bóunigiragun bungua luma lun bárügüdün erei lun buguya lan desidírü luagu bibagari lubaragiñe bígirun lun hahandilihanibu amu kei habusenrun (1 Korintuna 9:26, 27).

Ka gayaraabei badügüni? Gumesebá lau bakutihani álügüdahani burí le.

 1 KA BURÍ IGABURI BUÍDUBEI NUAGU?

Anhein subudi bubalin ka lan iarani buágubei luma ka lan igaburi buídubei buagu, afiñetimabadibu buougua.

HÉNPULU TÍDANGIÑETI BÍBÜLIA. Abürühati meha apostolu Pábulu: “Háfuga ibidiouguati lau ligaburi nadimurehan, gama lumoun mabidiouniganti lau nisubudin” (2 Korintuna 11:6). Kei meha subudi lubarun Pábulu Lererun Bungiu buidu, ragüguati meha lungua dan le layanuhóunbei wuriba luagu. Mígirunti meha lun ladügün luriban ladimurehóun luagu lun leferidiruni lafiñen luougua (2 Korintuna 10:10; 11:5).

SAMINABÁ BUOUGUOUN: Bürüba aban lídangiñe iarani le buágubei.

Guentó, bürüba aban lídangiñe igaburi le buídutimabei buagu (kéiburi anhein areida bubéi, gíchigadi ban, gayara lan lafiñerúniwa buagu o chülügiahei ban).

2 KA BURÍ IGABURI WURIBABEI NUAGU?

Ítara kei lídangiñe lan lagürüga güringüri le mederebuguntimabei luagu látumuragua, ítara liña giñe gayara lan ladügün igaburi le wuribabei buagu lun babulieiduni kátima lan luwuyeri gürigia buguya.

HÉNPULU TÍDANGIÑETI BÍBÜLIA. Subudi lumuti meha Pábulu ka lan igaburi wuribabei luagu. Ligía labürühanbei: “Lidan nisaminan, hínsiñeti lilurudun Bungiu nun; gama lumoun arihatina luagu anihein lan ábanya lúrudu lidan núgubu, ageindaguti luma nisaminan; katei ligía, igaburi lánina figóu le nídanbei, le gámabalina dáüwañu” (Rómana 7:22, 23).

SAMINABÁ BUOUGUOUN: Ka burí igaburi uéibei mosu lan bafurendeirun árügüdagua bungua?

 3 KA NABUSENRUBEI NIBIHIN?

Bádinuña hamuga san tidoun aban ugunei ani bamuriahaña hamuga luma abugahati lun lerederun egeyedagua somu fulasu darí lagumuchun gasi le tídanbei likarün? Ma libidiounigan hamuga aau lira? Ani sérubei hamuga giñe lasalirun bun.

Ka bafurendeirubei lídangiñe le? Anhein lan desidírü baali lubéi kaba lan uagu báfaagua lidan bibagari, meredebadibu adunha ibidiñega bun kaba lan badüga. Basubudirubei haliñounbadibu lan luma ida luba lan bachülürün ñeinhin.

HÉNPULU TÍDANGIÑETI BÍBÜLIA. Abürühati Pábulu: “Au, néibaaguña [...] ruñunéi narihin luagun ubuiduni le lunbei líchuguni Bungiu nun” (1 Korintuna 9:26). Lubaragiñe meha lawinwanduni Pábulu libagari ibidiñounga lun halíaba lan lidin ararama, desidírü lumuti le labusenrubei ladügün ani áfaaguati luagu (Filipuna 3:12-14).

SAMINABÁ BUOUGUOUN: Bürüba ǘrüwa katei le uágubei babusenra báfaagun irumu le.

4 KA UAGU NAFIÑERA?

Anhein furangu lubéi bun kátabu lan, ítara buba kei aban tídibu wewe le awandati óunwenbu burí liñawan dan ladüga miginagu lan lílagüle guribini.

Anhein machourun bubalin le uágubei bafiñera, hénrengubei bun desidírü ban. Ítara buba asansihei ligaburi bóuserun lun bítaradun kei bumadagu, ítara kei kamalión, animaalu le asansihabalin likolorun lura lun marihín lan lidan fulasu le ñein lubéi. Gürigia le óuseruti ítara, ibidiñeti lun káteitimañein lan.

Ánheinti úaragua bubéi lun le uágubei bafiñera —meberesenga ka lan hadügübei amu—, mabulieidun bubéi ka lan luwuyeri gürigia buguya.

HÉNPULU TÍDANGIÑETI BÍBÜLIA. Másiñati nibureingili lan meha Danieli dan le hafanreinraguagüdünbalin hawéi liduheñu. Íbini ítara, desidírüti gaganbadibei lan lun lilurudun Bungiu (Danieli 1:8). Bunagua lumuti lidan laritagun mabulieidun lubéi lan káteitimañein lan ani adüga lumuti lidan sun libagari.

SAMINABÁ BUOUGUOUN: Ka uagu bafiñera? Afiñetibu san luagu Bungiu? Ka uagu? Ka íchugubei ichouruni bun anihein lan Bungiu?

Afiñetibu san barǘ lan lilurudun Bungiu luáguti laruman ibagari buiti bun? Ka uagu?

Himei bumuti san lun ítara ban kei aban ubanaü le lanügün garabali yagüroun yaroun o lun ítara ban kei aban tídibu wewe le awanduti lanarime burí liñawan dan? Anhein busén bubéi lun ítara ban kei tídibu wewe, áfaaguaba lun bachoururuni káteitimañadibu lan. Líderagubadibu lira adarirei lóunabagüle álügüdahani: Kátana san?