Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 7

Kaba nadüga anhein adügüdarúa nuagu lun nagamaridun?

Kaba nadüga anhein adügüdarúa nuagu lun nagamaridun?

KA UAGU SÚDINI LUBÉI?

Lídehaba le desidírü bubéi lun basufurirun lárigiñe o lun gunda lan bibagari ámuñegü.

KABA HAMUGA BADÜGA?

Saminabá luagun sügǘ le: biámarügügili hati ásügürüti lúmagiñe gadarigua lan Mike tuma Heather ani ítara liña tasandiruni kamá hamuga wínwanhaña hámagua sun habagari. Sun weyu hau abürüha hóuniwagua ayanuha hagía hámagua luéigiñe gágamuru, darí lun subudi laali lan aban kaba lan lariñaga le aban lubaragiñe lásuruni dimurei. Gama lumoun, guentó, úaali buídurügü lan lun Mike ladimurehan, busenhali ladügün amu katei.

Darí guentó, ragürügü hamagili háhabu ínchuaha hagía fiuraü wéiyaasu. Mabusenruntu Heather tadügün lóugiñe lira, gama lumoun, mabusenruntu giñe lígirunu tadari. Úati amu gürigia ubouagu le adügüti lun magadiñe lan ani espechali ligía tasandiragun tungua. Ábati tasaminarun: “Háfuga úabei lan mégeiti, hínsiñeguatiwagu woungua!”.

Anhein chülühadibu lubéi lidoun irumudiri le ídanbei gayara lan gadari ban ani básügürüña lídangiñe le gádanbarun Heather, kaba badüga?

RÁRAMABA ASAMINARA

Hóunrügüñein maríeitiña líchigei Bungiu idewesei lánina agamariduni. Ánhabu agamarida lubaragiñe bamarieidun bóuseruñein idewesei le lau menebenehabuni. Ítara luba kéisigubeirügü hamuga bayusurun aban tubuidun simisi to edewehóutu bun lun baragahan iwiyei.

Ánhabu achüüragua bungua luéigiñe aban tídibu wewe ladügarügü busén ban báhamahan kei dunuru, babuleseiruba. Ítarameme, báluahaña giñe igarigu búniwagua anhein badüraagua lilurudun Bungiu luáguti laruman ibagari, kéiburi le ariñagubei moun lumuti lan ñein lan gürigia “agamariduti mamarieidunga” (1 Tesalónikana 4:3).

Ka burí igarigu lanügübei maganbadiwa lan lun gumadi le? Ariñagatu Bíbülia: “Ha ederegeragutiña houngua lun ahoruhani [o lun amu figóu  lánina agamariduni], hadügüña figóu luagu hágubu guánarügü” (1 Korintuna 6:18). Ka mini lubéi dimurei burí le?

Arufudati aturiahani le adügǘwaalibei hawagu nibureintiña ha agamaridubaña lubaragiñe hamarieidun gibe hamá hádangiñe asufurirutiña aban o lóugiñe aban lídangiñe katei burí le:

  • ASAKÜRIHANI. Ariñagatiña hiibe-agei nibureintiña ha agamaridubaña lubaragiñe hamarieidun asaküriha hamá lárigiñe.

  • MACHOURUNI. Añahein adarinu, lárigiñe harounrun hámagua, rédeiti wügüri álügüdagua lungua: “Gámari laaru funa san amu wügüri nadari nubaragiñe?”, redei tuguya würi álügüdagua tungua: “Agamaridaali funa san nadari amu hiñaru nubaragiñe?”.

  • MAGUNFULIRUN LAN LE AGURABÚBEI. Lidan tilulin-agei hanigi würiña nibureintiña, himei hamuti gadaradun hamá luma aban wügüri le busenti lóunigiruniña, mama luma aban le busenrügüti larihini ka lan gayaraabei libihini hámagiñe. Ani mabusenruntiña saragu wügüriña herederun tuma aban würi to ederegeragutu tungua houn lau lumenrengun.

  • Ka larufudahabei le bun? Ánhabu lan agamarida lubaragiñe bamarieidun, bǘnabudaguagüdüña bungua, banügüñame aban katei le wéiriti lebegi kei ni kata (Rómana 1:24). Wéiriti lebegi búgubu. Medewehabéi!

Derebugubá, magamaridabá lubaragiñe bamarieidun (1 Tesalónikana 4:3). Danme le maríeihadibu, gayaraahalime badügüni. Gayaraahalimeti basandiruni ugundani le líchugubei masandirunga machouruni, idiheri o igarigu, katei burí le hasandirubei gürigia ha agamaridubaña mamarieidunga (Ariñawagúni 7:22, 23; 1 Korintuna 7:3).

 KA BISAMINANBEI?

  • Anhein hínsiñe bubéi lun aban gürigia, ma busenbei gürigia ligía lun ua lan mégeiti bun ni luagu búgubu ni luagu ligaburi basandiragun bungua?

  • Anhein le lubéi lúgubu berese lan bau, lamuriahaña hamuga san buma lun badügün aban katei le gayaraati lagadeiruni bumadagua luma Bungiu? (Ebüréu 13:4).