Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 10

Gayaraati san tíderagunina Bíbülia?

Gayaraati san tíderagunina Bíbülia?

KA UAGU SÚDINI LUBÉI?

Ariñagatu Bíbülia “Bungiu guánarügü [lan] íchugubalin [sun le bürüwañubei tidan] haritagunrugun wügüriña lun habürüdüni”, lidan amu dimurei, Bungiu abürügüdübarun (2 Timotéu 3:16). Anhein ítara liña lubéi, gayaraati badariruni adundehani le bemegeirubei tidan Bíbülia.

KABA HAMUGA BADÜGA?

Saminabá luagun sügǘ le: abugaheina liñarun Dawidi likarün lidan aban fulasu le ibidiñeti lun. Dan le laliihani liri burí üma tuma burí muna to ñeinboun, aba líchugun fe chará laali lan üma. Ka funa buga oura labulieidagua!

Lun hamuga buguya lan Dawidi, kaba hamuga badüga?

RÁRAMABA ASAMINARA

Gayaraati badügün furumiñeguarügü lídangiñe katei le:

  1. Bamuriahan luma somu gürigia lun lariñaguni bun ida luba lan bachülürün lidoun fulasu le ñéinhinbadibu lubéi.

  2. Bakutihan somu mapa o bayusurun aban GPS.

  3. Basigirun abugaha hemenigiñu badarirubei lan üma le lunbei bárügüdüni.

Furanguti le lan ariñawagúbei lidan C wuribatimabei.

Húutimati le ariñawagúbei lidan B sügǘ lau le ariñawagúbei lidan A lugundun: búmaboun mapa o GPS, ani gayaraabei ladundehanibu lidan sun buéiyasun.

Ítarameme liña giñe gayara lan tíderagunibu Bíbülia.

Gayaraati tíderagunibu líburu tótima alugurúboun ubouagu lun:

  • Basubudiruni ida luba lan bagagibudagun luma burí turobuli.

  • Basubudiragun bungua buidu luma lun aban ban gürigia buiti.

  • Bafurendeiruni ka lan ligaburi lanügǘniwa ibagari buídutimabei.

 ÓUNABAGÜLEI LUN BURÍ ÁLÜGÜDAHANI LE SÚDINITIMABEI

Lúmagiñe wagumeserun ayanuha, gumesetiwa álügüdaha:

  • Ka uagu dingu lubéi sielu?

  • Ka uagu mirí habéi waruguma?

Lárigiñe, gumesetiwa adüga álügüdahani libügürü sun le asuseredubei geyegu wau:

Subuditi san bun óunaba tani Bíbülia álügüdahani burí le?

Gíbetiña gürigia ariñagutiña buin tiña lan Bíbülia lau úraga, aban tan líburu to mahuduunharu uguñe weyu o hénrengu lan gunfurandawa tan. Inarüni san katei le? Hanarün funa san gürigia le hariñagubei tuagu Bíbülia? O águyuguagüdarügü hamuti le haganbubei?

Saminabá luagun le: afiñetiña saragu gürigia ariñaga tan Bíbülia Bungiu lan agumadihabei lidan ubóu le. Ida luba san ítara luba lan? Arihabá lun ubóu, buin liña lau turobuli ani lidan sun fulasu arihatiwa igarigu asufuriruni, sandi, óunweni, gudemei luma günringuaü. Ladügüña hamuga san Bungiu le hínsiñehabubei woun lun lasuseredun sun lira?

Hínsiñeti hamuga bun basubudiruni ka lan agumadihabei lidan ubóu le? Ladügüba óunabagülei le tíchugubei Bíbülia lun taweiridun banigi.

Háfuga ariha baali tídangiñe lan Bíbülia lasagarúa adundehani burí le tídanbei garüdia to. Chouru hamuti gefentiña luagu Heowá tídanñein lan Bíbülia adundehani le uágubei gayara lan wafiñerun lugundun “Bungiu guánarügü íchugubalin [sun le bürüwañubei tidan] haritagunrugun wügüriña lun habürüdüni, ani huutu lun tarufudahan, lun tadeinhan, adügatu lun hígiruni gürigia katei [o saminaü] le mabuidunbei” (2 Timotéu 3:16, 17). Meferidirabéi chansi lun basubudirunu líburu binaduharu to to ídanboun ladarirúa adundehani le huuti woun uguñe weyu.