Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Gayaraati gunda lan hibagari keisi iduheñu

 SEKSIÓUN 3

Ida luba laransehóun turobuli?

Ida luba laransehóun turobuli?

“Ñeinlá saragu ínsiñeni hidan [...]; lugundun daruguati ínsiñeni lau saragu figóu.” (1 Féduru 4:8)

Dan le lamarieidun aban wügüri tuma aban würi, ñǘbuinguati ámuñegueinarügü turobuli, háfuga ladüga ámuñegueinarügü lan hasaminan, ligaburi hasandiragun hungua luma ligaburi hagüriarúniwa. Másiñati giñe bóugudigiñe lan liábingua turobuli o ladüga katei le magurabúnti.

Ménrenguntimati lóuserun gürigia kamá hamuga masuseredungili ni kata, gama lumoun, ariñagatu Bíbülia buídutima lan wararamun lun waturóbulin (Matéu 5:23, 24). Anhein hafalara adundehani le tídanbei Bíbülia, buídutimabei haransehani turobuli.

 1 HAYANUHA LUAGU HITURÓBULIN

LE TARIÑAGUBEI BÍBÜLIA: “Chülüti [...] lidaani adimurehani” (Apurichihati 3:1, 7). Direi humá dan lun hadimurehan luagu hituróbulin; ariñaga huméi tun hani weiriou o weiriei furangu ida liña lan hasandiragun hungua luma ka lan hasaminarubei luagu le asuseredubei. Ariñaga huméi inarüni tun o lun súnwandan (Éfesuna 4:25). Íbini gáñiñu hiña lan, ragügua humá hungua luéi hageindagun. Gayaraati lídehan hóunabun lau darangilaü lun masaliragun lan murusun magundani le hídanbei ábanme óunwenbu wuribu (Ariñawagúni 15:4; 26:20).

Íbini anhein múaran lubéi ligaburi hisaminan tuma hani weiriou o weiriei lidan somu katei, óuserameme humóun o huméi lau gamadóuni, ínsiñehabuni luma inebesei (Kolosana 4:6). Áfaagua humá haranseruni hituróbulin lau lóufudagun, maweiyasun humá eredera mererunga húmagua (Éfesuna 4:26).

LE GAYARAABEI HADÜGÜNI:

  • Áluaha huméi oura le buídutimabei lun hadimurehan luagu turobuli

  • Danme le tayanuhaña lan hani weiriou o weiriei, madüraagua huméi. Lachülürüba dan hun lun hadimurehan

 2 AGANBA HUMÁ ARUFUDA HUGUYAME GUNFURANDAÜ

LE TARIÑAGUBEI BÍBÜLIA: “Lunti hínsiñegua humá húmagua keisi iduheñu. Hímeigua humá hungua inebegua huguyame húniwagua” (Rómana 12:10). Súdiniti gíchigadi humá arigei lun le ariñawagúbei, áfaagua huguyame lun gunfuranda humani ligaburi tarihini hani weiriou o weiriei katei, lunti ñein lan “úarani luma [...] gudemehabu hídangua [...] ǘnabugu ligíame hanaagun hungua” (1 Féduru 3:8; Santiagu 1:19). Madüga humá kamá hamuga haganbuña. Anhein gayara, ígira huméi le hadaagubei lun hetenirun lun sun le tariñagubei hani weiriou o weiriei, o álügüda humóun o huméi anhein gayaraabei lubeime hadimurehan danme lásurun hadügüni le hadaagubei. Anhein hariha hani weiriou o weiriei kei hupaaná lubaragiñe kei hágani, magañidunbadün lau lumenrengun (Apurichihati 7:9).

LE GAYARAABEI HADÜGÜNI:

  • Ru humá arigei lun le tariñagubei hani weiriou o weiriei lau aban lubuidun igaburi, íbini magundan humá lau le haganbubei

  • Gunfuranda huméi kátima lan tabusenrubei o labusenrubei lariñagun. Ariha huméi igaburi le aubei tariñagei o lariñagei luma igibu le larufudubei o tarufudubei

3 SIGÍ HUMÁ ÁFAAGUA

LE TARIÑAGUBEI BÍBÜLIA: “Sagawati katei buiti lídangiñe sun áfaaguni; anhein lídangiñe saragu adimurehani [le magunfulirúnwabei], gudemei asagarúbei” (Ariñawagúni 14:23). Úati buídurügü lan hadariruni laranseha aban turobuli huguya biángubei. Mosu giñe hafalaruni. Másiñati mégeiwabei lan saragu áfaaguni, gama lumoun, libihúba buiti resultóu (Ariñawagúni 10:4). Anhaün awadigimarida lidan úarani, “wéiritima[bei] hafayeiruaha” (Apurichihati 4:9).

LE GAYARAABEI HADÜGÜNI:

  • Samina humá luagun le gayaraabei ladügüni kada aban hídangiñe lun laranserun turobuli

  • Kada átiri dan, ariha huméi átirihali lan hawanserun