Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 114: Lagumuchun wuribani

Abahüdaguni 114: Lagumuchun wuribani

KA SAN barihibei ya? Anha, súdaragu hagibuagu gabayu harutiña. Arihaba halíagiñe lan hayabin, hareiruña éibaagueina siélugiñe ligibuagu dúeri! Añahein funa san gabayu sielu?

Hesusu keisi Urúei sielu

Uá, mama gabayu inarünitiñu. Subudi wamuti ladüga siñati héibaagun gabayu ligibuagu dúeri, adián? Gama lumoun adimurehatu Bíbülia hawagu gabayu sielurugu. Ka san uagu?

Ladüga wéiriti meha hayusurun gabayu lidan wuribu. Lun tarufuduni Bíbülia lageindaguba lan Bungiu lidan aban wuribu kóntüra gürigia Ubouaguna, ariñagatu luagu rarí hamá fiú gürigia siélugiñe hawagu gabayu. Halíabeiti? Lídanbei Arümahedón, lagumuchaguagüdübei sun wuribani lídangiñe Ubóu.

Hesusuba alidihei wuribu lidan Arümahedón. Haritaguabá luagu anúadira lani Heowá lun ligía lan urúei lidan larúeihan. Ligíati anihán lubéi ridi luagu Hesusu. Ani arufudatu eféin láfaragubaña lan sun láganiñu Bungiu. Lunti san taweiridun wanigi luagu lagumuchun Bungiu hau sun wuribatiñu?

Áluahabei Abahüdaguni 10. Ka san barihibei? Óunwenbu Gunran le agumuchubei hau gürigia wuribatiñu. Ka adügübei lun ñein lan Gunran ligía? Heowá Bungiu. Guentó arihabei Abahüdaguni 15. Ka san asuseredubei ñein? Gumuguagüda lumuti Heowá Sodoma luma Gomora lau watu gemeti.

Sügüba lidoun Abahüdaguni 33. Arihabei le asuseredubei houn gabayu tuma burí karü lánina wuribu ehiptuna. Heowá adügübei lun lábürühan duna hawagun. Ladügünbalin lun ladouragun hau lumutuniña. Áluahabei Abahüdaguni 76, ñein ígirati Heowá lun lagumuchunua hau lumutuniña ladüga hariban.

Ligíati, moun lubéi taweiridun wanigi lau lóunahaniñu Heowá lisudaranigu siélugiñe lun hagumuchun lau wuribani Ubouagugiñe. Kábati asusereda lárigiñe? Sügüba lidoun le aban páhina, warihali.

Arufudúni 16:16; 19:11-16.



Álügüdahani burí

  • Ka uagu tadimurehanbei Bíbülia hawagu gabayu sielurugu?
  • Ka liri wuribu lani Bungiu kóntüra gürigia wuribatiña Ubouaguna, ani kame san wuribu le?
  • Kei barihini lidan dibuhu, kaba alidihei wuribu, ka uagu anihein lubéi ridi luagu, ani ka mini lubéi lanügün aban eféin?
  • Kei wafurendeirun lidan abahüdaguni 10, 15 luma 33, ka uagu moun lubéi taweiridun wanigi lau lagumuchaguagüdübaña lan Bungiu gürigia wuribatiña?
  • Ida liña larufuduni abahüdaguni 36 luma 76 lagumuchaguagüdübaña lan Bungiu gürigia wuribatiña íbini hariñagun adorarü hamani?

Lanwoun burí álügüdahani

  • Aliihabei Arufudúni 19:11-16.

    Ida liña furangu lan tarufuduni Bíbülia Hesukrístu lan luágubei gabayu haruti? (Aruf. 1:5; 3:14; 19:11; Isa. 11:4.)

    Ida liña lachoururuni hitaü le abahichawagubei tuagu ladaüragun Hesusu, chouruwali lan lagañeirun súnsuinagubei? (Aruf. 14:18-20; 19:13.)

    Kátaña funa san ha abahüdübaña hadan súdaragu ha asigirubalin Hesusu luagu gabayu haruti? (Aruf. 12:7; 19:14; Mat. 25:31, 32.)