Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 113: Pábulu uburugu Roma

Abahüdaguni 113: Pábulu uburugu Roma

ARIHABEI güringüri le luagubei larüna Pábulu luma súdara rómana le ounigirubalin. Ladaürǘña Pábulu Roma. Lagurabahaña desidírü lan Sésarü le rómana kaba lan ladüga lau. Lidan aniha lan furisunrugu, ígiruati lun leresibirun bisida.

Ǘrüwa weyu lárigiñe lachülürün Roma, aba lamuriahan Pábulu lun hayabin fiú huríu wéirigutiña arihei. Ligía hayabinbei bandi huríu ha Rómabaña. Aba lapurichihan Pábulu houn luagu Hesusu luma luagu larúeihan Bungiu. Afiñetiña fiú hádangiñe aba hadügün kristiánugume, añahein giñe amu mafiñetiña.

Ladaürǘña Pábulu

Apurichihati giñe Pábulu houn ámuñegueinarügü súdara ha óunigirubalin. Lidan biama irumu le laubei adaürǘwa ya, apurichihati houn sun ha gayara lumutiña. Ligíati, íbini tílana luban Sésarü aganba hamuti uganu buiti luáguti larúeihan Bungiu, ani adügatiñu fiú hádangiñe kristiánugume.

Ani, subuditi san bun katei lan abisidahati le luagubei dábula, abürüha? Anha, Timotéu lira. Daüwañahaali giñe ladüga lapurichihan luagu larúeihan Bungiu, ánheinti guentó líbüreñein. Liabiña íderaguei Pábulu. Subuditi bun ka lan labürühabei? Ariha waméi.

Haritaguabagili san uburugu Filipu luma Éfesu lidan Abahüdaguni 110? Ídehati Pábulu agumesera damuriguaü hani kristiánugu ñein. Guentó, kei adaürǘti, abürühati Pábulu gárada burí houn kristiánugu hagía. Gárada burí to gíriboun Éfesuna tuma Filupuna, anuhoun tidan Bíbülia. Guentoti lariñaguñein lun Timotéu kaba lan labürüha houn hamadagu kristiánugu ha Filipubaña.

Areidatiña Filipuna lun Pábulu. Óunahatiña aban idewesei lun furisunrugun, ligía lateingiruñanu lubéi. Epafurodítu anügübalin idewesei. Gama lumoun sánditi meha Epafurodítu yarafa lun lounwen. Guentó areidaguali ani málühali agiribuda lárigoun. Ligíaba anügoun ligaradan Pábulu luma Timotéu Filipun.

Furisunrugu, abürühayati Pábulu biama gárada to wamaboun tidan Bíbülia. Aban houn kristiánugu ha uburuguna Kolosa. Subuditi bun ka lan tiri? Kolosana tíribei. To aban lun aban lumada gíriti Filemón, Kolosana giñe. Gárada tuguya tayanuhaña luagu Onesimu, aban lidamun Filemón.

Aba lanurahan Onesimu luéi Filemón aba liabin Roma. Subudirügü lumuti Onesimu ladaürǘña lan Pábulu Roma. Aba lidin bisidei, ábati lapurichihan Pábulu lun. Aba ladügün Onesimu kristiánume lau loufudagun. Guentó aba lasakürihan ladüga lanurahan. Ligíati, subuditi bun ka lan labürühabei Pábulu lun Filemón tidan gárada tuguya?

Lamuriahaña Pábulu luma Filemón lun feruduna lani Onesimu. Aba labürühan: ‘Nóunahañein bun. Ani guentó mámarügali bidamun. Abanhali giñe íbiri Kristiánu buiti.’ Dan le lagiribudun Onesimu uburugun Kolosa, aba lanügünu biama gárada to lúmagua, aban houn Kolosana tuma aban lun Filemón. Egesihabei lanarime ugundani le lasandirubei Filemón dan le lasubudiruni kristianuhali lan Onesimu le lidamun!

Dan le labürühanbei Pábulu houn filipuna luma lun Filemón, anihei ñunsu buiti luma. ‘Nounahali Timotéu hun,’ liña Pábulu houn filipuna. ‘Ani málühadina giñe ñüdün bisidaün.’ Ánheinti lun Filemón, aba labürühan: ‘Aransebá aban lúgaaru nubá ñein lun napusarahan.’

Dan le líbüreli Pábulu, aba lidin bisidaña líbirigu kristiánugu lidan bandi fulasu. Dan lárigiñe, ábaya ladaürǘn Pábulu Roma. Guentoti subudi lumuti háfarali lan hilagubei. Ligía labürühanbei lun Timotéu lun liabin furese. Lariñaga: ‘Seriwi hadina lun Bungiu lau úaraguni, ani líchugubei nafayeiruaha nun.’ Fiú irumu lárigiñe lounwen Pábulu, ábaya lagünrinchawagun Herusalén, guentoti rómana agünrinchagubalin.

Gama lumoun, aniheingua saragu katei tidan Bíbülia. Adügati Heowá lun labürühanu apostolu Huan tagumuhoun burí líburu to tídanboun Bíbülia, Arufudúni taganagua. Adimurehatu líburu to luagu dan le lunbei liabin. Warihali kaba lan asusereda ámuñegü.

Adügaü 28:16-31; Filipuna 1:13; 2:19-30; 4:18-23; Ebüréu 13:23; Filemón 1-25; Kolosana 4:7-9; 2 Timotéu 4:7-9.



Álügüdahani burí

  • Ka san un lapurichiha Pábulu dan le ladaürǘnbei Roma?
  • Katei san abisidahati le ñunbei luagu dábula, ani ka ídemuei líchugubei lun Pábulu?
  • Ka Epafurodítubei, ani ka lanügübei dan lagiribudun Filipun?
  • Ka san uagu labürüha Pábulu aban gárada lun Filemón le lumada?
  • Ka ladügübei Pábulu dan le láfuridunbei furisunrugúgiñe, ani ka asuseredubei lun lárigiñe?
  • Ka layusurubei Heowá lun labürüdünu tagumuhoun líburu burí to tídanboun Bíbülia, ani ka uagu tadimureha líburu Arufudúni?

Lanwoun burí álügüdahani

  • Aliihabei Adügaü 28:16-31 luma Filipuna 1:13.

    Ida liña layusuruni Pábulu lidaani lidan nihán lan adaürǘwa Roma, ani ka efekütu lanibei lafiñen le mahalachawaguaditi luagu damuriguaü hani kristiánugu? (Adü. 28:23, 30; Fili. 1:14.)

  • Aliihabei Filipuna 2:19-30.

    Ka burí dimurei lánina ínsiñeni labürüdübei Pábulu luagu Timotéu luma Epafurodítu, ani ida luba gayara lan wáyeihani lani apostolu hénpulu? (Fili. 2:20, 22, 25, 29, 30; 1 Ko. 16:18; 1 Tesa. 5:12, 13.)

  • Aliihabei Filemón 1-25.

    Ka lébunabei línchahani Pábulu Filemón lun ladügüni le buidubei, ani ida liña leseriwidun le houn wéiyaaña lidan afiñeni uguñe weyu kei aban adundehani? (Filemón. 9; 2 Ko. 8:8; Gal. 5:13.)

    Ida liña larufuduni lererun Pábulu lidan Filemón 13, 14 luagu inebe lan hasaminan ha híbiri lílana damuriguaü houn? (1 Ko. 8:7, 13; 10:31-33.)

  • Aliihabei 2 Timotéu 4:7-9.

    Kei apostolu Pábulu, ka uagu gayara lubéi wafiñerun luagu wibihibei lan wafayeiruaha lúmagiñe Heowá ánhawa asigira awinwanda lau úaraguni chülǘ lumoun lagumuhóun? (Mat. 24:13; Ebü. 6:10.)