Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 112: Séfuñu lidan aban ubouhu

Abahüdaguni 112: Séfuñu lidan aban ubouhu

ARIHABÁ, tabuluchuña waporu! Tabouchaguña! Ariha bumutiña san gürigia ha achubarubaña dúnarugun? Fiú hádangiñe hachülüra béyabun. Anihein san Pábulu ñein? Ariha waméi kañaha lan asuseredubei lun.

Gürigia ha ñǘbuinbaña tídangiñe waporu

Haritaguabá, biamañein irumu lau Pábulu adaürǘwa Sesaréa. Ábati híchuguni Pábulu hama amu adaürǘtiña tidoun waporu lun uburugun Roma. Yarafa lun ubouhu le Küretabei, aba ladagarun aban óunwenbu luriban dan. Siñá hamutu wügüriña waporu abugura. Marihin hamuti giñe Weyu wéyuagu ni waruguma guñoun. Lárigiñe bandi weyu, aba heferidiruni hemenigi luagu hesefuruba lan.

Ábati lararamun Pábulu aba lariñagun: ‘Úabei ni aban hídangiñe óunweti; waporurügüboun eferidira. Lugundun ñǘbuinti buga aban lani Bungiu ánheli ariñaga nun: “Manufudedabá, Pábulu. Mosu barufudagun bungua ligibugiñe Sésarü le urúei Rómana. Ani lesefurubaña Bungiu sun ha tídanbaña ugunei buma.”’

Lumounbei amidi áriebu, weyu 14 lúmagiñe lagumeserun durumandei, aba harihin mádulungu luagu maweirin lan luhulilin duna! Le hanufude luéi habuguchun luagu dübü lidan luburiga, aba hágurun óunguru. Larugan binaafin aba harihin aban ubouhu. Aba desidírü hamá habugurunu waporu ñeinhin.

Dan le hayarafadun lun beya, aba tabuguchun waporu luagu aban sándala aba siñá lan tánhigichun. Ábati labounhan barana tuagun darí lun tabouchagun. Aba lariñagun hábuti súdaragu le arihibei tau: ‘Sun ha gáfulihadibaña, háfuliha lun béyabun; ha híbiri ábame hayusuruni tufulansun waporu lun háfayarun.’ Ítara liña hadüga, ani chülütiña 276 gürigia ha buga tídanbaña waporu séfuñu béyabun, kei füramase lani ánheli.

Málüta liri ubouhu ligía. Buiti hagaburi gürigia ha ñeinbaña, íderagua hamutiña gürigia ha ñǘbuinbaña tídangiñe waporu. Dan le lóuchaadagun liñawan dan, aba híchuguni Pábulu tidoun amu waporu aba hanügüni uburugun Roma.

Adügaü 27:1-44; 28:1-14.



Álügüdahani burí

  • Ka asuseredubei tun waporu to ñein lubéi Pábulu dan le tásügürün yarafa lun ubouhu le gíribei Küreta?
  • Ka lariñagubei Pábulu houn ha tídanbaña waporu?
  • Ka san uagu tabouchagua waporu?
  • Ka lúrudu líchugubei hábuti súdara le arihibei tau waporu, ani átiriñanu gürigia achülürütiñu séfuñu larun beya?
  • Ka liri ubouhu le ñeinhin lubéi hachülüra, ani ka hadügübei lau Pábulu dan le lóuchaadagun liñawan dan?

Lanwoun burí álügüdahani

  • Aliihabei Adügaü 27:1-44.

    Ida liña laderebugudagüdüni wéiyaasu le ladügübei Pábulu lun uburugun Roma, wafiñen luagu úaraguni le aubei lagunfulira abürüdüni le tídanbei Bíbülia? (Adü. 27:16-19, 27-32; Luk. 1:3; 2 Tim. 3:16, 17.)

  • Aliihabei Adügaü 28:1-14.

    Lau sun mama hamá kristiánugu gürigia ha aganóubaña Málüta óusera hamuti Pábulu hama gürigia ha áfayahabaña luma buidu, ka lunbei wadügüni kei kristiánugu, ani lidan ka sügǘ súdinitima lan wadügüni? (Adü. 28:1, 2; Ebü. 13:1, 2; 1 Fe. 4:9.)