Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 111: Aban irahü le arumugubei

Abahüdaguni 111: Aban irahü le arumugubei

AÜ, ARIHABÁ! Ka san asuseredubei ya? Wéiriti funa san labuleseirún irahü le múarugubei? Arihabá, Pábulu aban hádangiñe wügüriña ha áfuridubaña tídangiñe muna tura! Gayarati giñe barihini Timotéu ñein. Heiguarügüti funa san irahü le lídangiñe funedera?

Liábiña Pábulu lun láguyuguagüdüni Eutiku lídangiñe óunweni

Anha, ligía asuseredubei. Líchuguña Pábulu aban yanu houn disipulugu ya Turoasi. Subuditi lun marihin laaña lanme luagu bandi dan, ladüga mosu lidin tidan aban waporu larugan weyu. Ligía layanuhanbei dagá amidi áriebu.

Ítara liña, nibureinti le, Eutiku liri, ñun liña luagu funedera, aba larumugun. Aba léiguadun ñeingiñe, lídangiñe lǘrüwan túbanana muna! Ariha baali ka lan uagu hadiherida gürigia saragu? Dan le hiñuraguni irahü, aba harihini susere lan katei le uéibei hanufudeda. Hilaali!

Dan le larihini Pábulu hilá lan irahü, aba larounrun ligibuagun aba lóuburuni, lariñaga: ‘Madiheri humá. Úati ni kata luagu!’ Ani inarüni! Aban milaguru le! Aguyuguagüdalá Pábulu lídangiñe óunweni! Aba hagundaarun sun gürigia hagía.

Ábayati hawarirun sun hagía aba heigin. Aba lasigirun Pábulu ayanuha darí larugadun. Ani chouru wamuti marumugun haali lan Eutiku! Ábati ládinun Pábulu, Timotéu hama gürigia ha úarabaña hama tidoun waporu. Subuditi bun haliñoun lan houdin?

Lagumuchuñein Pábulu lǘrüwan luéiyasun lánina apurichihani. Lidan wéiyaasu le redeiti Éfesu ǘrüwa irumu. Ligía migife lubéi wéiyaasu le sügǘ lau libiaman.

Lárigiñe láfuridun Turoasigiñe, aba tararamagun waporu fiú dan Miletu. Kei madiseti lubéi Éfesu ñéingiñe, aba lagúarun Pábulu hawagu wéiyaaña lidan damuriguaü Éfesu lun houdin Miletu lun ladimurehan houn lagumuhóun wéiyaasu. Lárigiñe, dan le teibuga lan waporu, ma lanarime hírudun lau harihini lidin Pábulu!

Lagumuhóun, aba tagiribudun waporu Sesaréa. Lidan nihán lan Pábulu lúbiñe disipulu Felipe, aba lariñagun profeta Agabu ladaürǘba lan Pábulu danme lachülürün Herusalén. Ani susereti kei aubei lariñagei Agabu. Lárigiñe biama irumu adaürǘni Sesaréa, aba lóunahoun Pábulu lun Sésarü, le gumadan Roma lun laguseragüdüni. Warihali ka lan asuseredubei lidan wéiyaasu le.

Adügaü, kapítulu 19 darí 26.



Álügüdahani burí

  • Katei san irahü le múarugubei, ani ka asuseredubei lun?
  • Ka ladügübei Pábulu dan le larihinbei hilá lan irahü?
  • Haliñounbei san Pábulu, Timotéu hama gürigia ha aweiyasuhabaña hama, ani ka asuseredubei dan le hararamagun Miletu?
  • Ka eweridihani líchugubei profeta Agabu lun Pábulu, ani ida liña lagunfulirun le lariñagubei profeta?

Lanwoun burí álügüdahani

  • Aliihabei Adügaü 20:7-38.

    Ida luba werederun madurunga ‘luéigiñe libagari ni aban wügüri’ según dimurei le lariñagubei Pábulu lidan Adügaü 20:26, 27? (Ese. 33:8; Adü. 18:6, 7.)

    Ka uagu mosu lubéi hárügüdün wéiyaaña luagu “uganu inarüniti” dan le harufudahan? (Adü. 20:17, 29, 30; Titu 1:7-9; 2 Tim. 1:13.)

  • Aliihabei Adügaü 26:24-32.

    Ida liña layusuruni Pábulu liri lageira le Roma dan le lagunfuliruni dasi le líchugubei Hesusu lun, lun lapurichihan? (Adü. 9:15; 16:37, 38; 25:11, 12; 26:32; Luk. 21:12, 13.)