Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 105: Agurabahatiñu Herusalén

Abahüdaguni 105: Agurabahatiñu Herusalén

GÜRIGIA ha lánigu Hesusu. Aba gaganbadi hama lun ani rédeitiñu Herusalén. Dan le añahagua lan súngubei agurabaha úara, aba tabuinchun sun muna lau aban óunwenbu areinchuni. Kei dan le láfurun aban garabali héreti le ásügürüti furese. Guentoti aba latatirun watu gemeti asaliragua kamá hamuga iñeñein lóugiñe hachügü kada aban hádangiñe. Gayarati san barihini watu lóugiñe hachügü? Ka san lilabei le?

Líchuguña sífiri sandu hawagu disipulugu lidan furumiñeti sígulu

Aban milaguru le! Sieluñein Hesusu lumaya Lúguchi, ani líchuguñein sífiri sandu lani Bungiu hawagu lánigu. Subuditi san bun ka lan ladügübei sífiri lun hadügün? Aba hatatirun súngubei adimureha lidan ámuñegueinarügü iñeñein.

Saragu gürigia Herusalén aganba hamuti areinchuni le ítarabei kei aban garabali héreti, ábati hayabin ariha ka lan asuseredubei. Fiú hádangiñe gürigia hagía ñǘbuintiña lídangiñe amu néchani efeduha lidan luéyuri Pentekosutesi hani ísüraelina. Ma tueirin hanigi abisidahatiñu ha! Ladüga hadimurehan disipulugu lidan hererun guánarügü luagu burí katei buiti le adüga laalibei Bungiu.

‘Galiléana sun gürigia ha,’ haña abisidahatiñu. ‘Ida liñati gayara lan hadimurehan lidan lererun kada aban wádangiñe?’

Guentó ábati lararamun Féduru lun lafuranguagüdüni houn. Aba liñuruni lumalali aba labahüdaguni houn gürigia ida liña lan meha lafarún Hesusu, ani aba lásaaragüdüni Heowá. ‘Guentó sieluñein Hesusu luéigiñe lóunwenren Bungiu,’ liña Féduru. ‘Ábati lóunahani sífiri sandu le füramase lubéi wawagun. Ligía lasuseredunbei milaguru burí le.’

Dan le lariñaguni Féduru katei burí le, aba hírudagun saragu hádangiñe gürigia ha, gáriti houn le adügǘbei lun Hesusu. ‘Kaba san wadüga?’ liña hálügüdahan. Lariñaga Féduru houn: ‘Mosu hasansiruni hibagari badisei huguyame.’ Lídanmeme weyu ligía aba habadiseirún kéiburi 3.000 gürigia aba hadügün lánigume Hesusu.

Adügaü 2:1-47.



Álügüdahani burí

  • Kei barihini lidan dibuhu, ka asuseredubei houn lánigu Hesusu ha erederubaña agurabaha Herusalén?
  • Ka uagu taweirida hanigi bisidatiñu Herusalén?
  • Ka lafuranguagüdübei Féduru houn gürigia?
  • Ida liña hasandiragun saragu gürigia houngua lárigiñe haganbuni Féduru, kati lunbei hadügüni?
  • Átiriñanu abadiseirutiña lidan luéyuri Pentekosutesi irumu 33 lidan wadaani?

Lanwoun burí álügüdahani

  • Aliihabei Adügaü 2:1-47.

    Ida liña larufuduni dimurei le lariñagubei Féduru lidan Adügaü 2:23, 36 heigua lan duru luagu lounwen Hesusu luagun sun néchani huríu? (1 Tesa. 2:14, 15.)

    Ka buiti hénpulu líchugubei Féduru dan le lapurichihan tau Bíbülia? (Adü. 2:16, 17, 29, 31, 36, 39; Kol. 4:6.)

    Ida liña layusuruni Féduru furumiñeti “ligelein Arúeihani le lánina sielu” le füramase lubéi Hesusu lun? (Adü. 2:14, 22-24, 37, 38; Mat. 16:19.)