Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 103: Múnada lau bena darugu

Abahüdaguni 103: Múnada lau bena darugu

LÁRIGIÑE láfuridun Féduru luma Huan lídangiñe umúahaü le meha ñein lubéi lúgubu Hesusu, aba terederun María ñein, aba tatatirun ayahuaha. Ábati tarihin lidoun umúahaü ani arihatu bián ánheligu! Aba hálügüdünu: ‘Ka uagu bayahua?’

Aba tóunabun María: ‘Barǘ hamá Nabureme, ibidiñeti nun halía lan híchigei.’ Ábati tadigiragun ani arihatu aban wügüri. Aba lálügüdünu: ‘Ka báluahabei?’

Afiñetu María luagu wügüri lan le óunigirunbalin fuluri-agei, háfuga ligía anügübalin lúgubu Hesusu. Ligíati, aba tariñagun: ‘Anhein banügün lubéi, ariñagabéi nun halía lan bíchigei.’ Hesusu wügüri le, lauñein aban úgubu ibidiñeti tun. Dan le lagúarun tun lau tiri, aba tasubudiruni luagu Hesusu lan. Aba tidin éibaagueina ariñagei houn disipulugu luagu ariha taali lan Aburemei!

Weyuméme ligía, dan le hóudiña lan bián disipulugu lidoun aüdü Emaúsu, aba lagumeserun aban wügüri éibuga úara hama. Wéiriti hírun disipulugu ladüga lounwen Hesusu. Ábati lafuranguagüdüni wügüri le saragu katei tídangiñe Bíbülia le adügübei lun buidu lan hasandiragun houngua. Danti le hararamagun lun heigin, aba hasubudiruni bián disipulugu Hesusu lan wügüri le. Aba lagumuchagun Hesusu, ábati hagiribudun bián disipulugu Herusaléun awisaraña apostolugu.

Arufudaguati giñe Hesusu lungua lun Féduru. Ani gúndaatiña ha híbiri dan le haganbuni katei le. Ábati houdin bián disipulugu ha buga arihubalin Herusalén aba hadariruniña apostolugu. Aba hariñagun houn arufudaguati lan Hesusu lungua houn ǘmada. Dan le habahüdaguni katei le, subuditi san bun ka lan asuseredubei taweiridunbei hanigi?

Arihabei dibuhu. Aba larufudagun Hesusu lungua ñeinmeme tidan rumu, íbini darugu liña lan bena. Ma lueirin ugundani houn disipulugu! Aban weyu lánina ugundani ligira! Gayarati san babahüdüni átirihali lan wéiyaasu larufudagun Hesusu lungua guentó? Seingüñein funa san wéiyaasu?

Larufudagun Hesusu lungua houn disipulugu

Úati apostolu Tomasi hama dan le larufudagun Hesusu lungua. Ligíati, aba hariñagun disipulugu lun: ‘Ariha wamali Wabureme!’ Gama lumoun aba lariñagun Tomasi lun lan lafiñerun mosu lan larihini lungua. Widü weyu lárigiñe óundaragu háñaya disipulugu tidan rumu lau bena darugu, lau wéiyaasu le ñeinñein Tomasi. Sódini, aba larufudagun Hesusu lungua ñein. Guentó afiñeti Tomasi.

Huan 20:11-29; Lúkasi 24:13-43.



Álügüdahani burí

  • Ka tariñagubei María lun aban wügüri le uágubei tasaminara ligía lan óunigirunbalin fuluri-agei, ani ida liña tasubudiruni luagu Hesusu lan?
  • Ka asuseredubei houn bián disipulugu ha ñǘdünbaña eibu lidoun aüdü Emaúsu?
  • Ka katei awéiridagüdübanu hanigi apostolugu dan le hariñagubalin bián disipulugu houn ariha hamaali lan Hesusu?
  • Átirihali wéiyaasu larufudagun Hesusu lungua houn lánigu?
  • Ka san lariñagubei Tomasi dan le laganbunbalin luagu ariha hamaali lan disipulugu Aburemei, ani ka asuseredubei widü weyu lárigiñe?

Lanwoun burí álügüdahani

  • Aliihabei Huan 20:11-29.

    Lariñaguña san Hesusu lidan Huan 20:23 ibiha hamá gürigia üma lun feruduna hamá figóu? Afuranguagüdabei (Sal. 49:2, 7; Isa. 55:7; 1 Tim. 2:5, 6; 1 Huan 2:1, 2).

  • Aliihabei Lúkasi 24:13-43.

    Ida liña san gayara lan waranserunu wanigi lun weresibiruni inarüni le tídanbei Bíbülia? (Luk. 24:32, 33; Ésüd. 7:10; Mat. 5:3; Adü. 16:14; Ebü. 5:11-14.)