Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 99: Lidan aban rumu wéiriti

Abahüdaguni 99: Lidan aban rumu wéiriti

GUENTÓ, luagu gádürü guñoun. Ñǘbuinhali Hesusu lidoun rumu le hau 12 lánigu apostolugu lun héigini adineruni lánina Luéyuri Esefuruni. Wügüri le áfuridubei ñéingiñe Húdasi Isükarióte líribei. Léibuga ariñaga houn fádirigu ida luba lan hárügüdüni Hesusu.

Adineruni lani Aburemei

Aban weyu lubaragiñe, adimurehati Húdasi hama lariñaga: ‘Kaba híchiga nun anhaün níderagua árügüdei Hesusu?’ Aba hariñagun lun: ‘Darandi murusun pülata.’ Guentó lidinña Húdasi adunragua hama lun lanügüniña ñeinhin lubéi Hesusu. Hanarimeti luriban katei le, adián?

Gumuha adineruni le lánina Luéyuri Esefuruni. Guentoti lagumesera Hesusu ábanya adineruni espechaliti. Aba líchugun aban fein houn lánigu apostolugu, aba lariñagun: ‘Hou humoun, mini tan fein to núgubu le lunbei lederegerún huagu.’ Ítarameme giñe, aba lanügüni weru tau diwéin, aba lariñagun: ‘Gurá huméi, mini lan le nita le lunbei láwiyurun lídangiñe núgubu huagu.’ Aba tagúahan Bíbülia lun adineruni ligía ‘Ladinerun Aburemei.’

Hou hamuti meha ísüraelina adineruni lidan Luéyuri Esefuruni lun haritaguni dan le ‘lasügürünbei’ lani Bungiu ánheli tau haban yágüta Ehiptu, ani aba láfaruni furumiñeti irahü le nasiruabei tidan haban Ehiptuna. Gama lumoun guentó busenti Hesusu lun haritagun lánigu disipulugu luagu hilá lan hawagu. Lun le ladügüwa adineruni irumu-auti le.

Lárigiñe héigini Ladinerun Aburemei, aba lariñagun Hesusu houn lánigu apostolugu lun ganigi hamá ani here hagíame lidan hafiñen. Lagumuhóun aba heremuhan uremu lun Bungiu aba háfuridun. Gayarati lóugiñe haali lan amidi áriebu. Haliñounbaña san?

Matéu 26:14-30; Lúkasi 22:1-39; Huan, kapítulu 13 darí 17; 1 Korintuna 11:20.



Álügüdahani burí

  • Kei larihín lidan dibuhu, ka uagu nihán lubéi Hesusu hama duusu lánigu apostolugu lidan aban rumu wéiriti tóugiñegua muna?
  • Katei san le áfuridubei, ani kaba ladüga?
  • Ka éigini espechaliti lagumeserubei Hesusu adüga lárigiñe lagumuchun adineruni lánina Luéyuri Esefuruni?
  • Ka meha haritagubei ísüraelina lidan Luéyuri Esefuruni, ani kaba laritaguagüda éigini espechaliti le houn ha afalarubalin Hesusu?
  • Lárigiñe Ladinerun Aburemei, ka lariñagubei Hesusu houn lánigu apostolugu, ani ka hadügübei?

Lanwoun burí álügüdahani

  • Aliihabei Matéu 26:14-30.

    Ida liña larufuduni Matéu 26:15 luagu lidan lan sun lichú lau Húdasi lidin alugurei Hesusu?

    Ka isuuni dóbuliti lagunfulirubei lita Hesusu le áwiyurubei? (Mat. 26:27, 28; Her. 31:31-33; Efe. 1:7; Ebü. 9:19, 20.)

  • Aliihabei Lúkasi 22:1-39.

    Ida liña san lebelurun Satanási lidoun Húdasi? (Luk. 22:3; Huan 13:2; Adü. 1:24, 25.)

  • Aliihabei Huan 13:1-20.

    Según le lariñagubei Huan 13:2, gayarati san lichugún duru luagun Húdasi luagu le ladügübei, ani ka leksióun wafurendeirubei lídangiñe le, kei lubúeingu Bungiu? (Agu. 4:7; 2 Ko. 2:11; Gal. 6:1; Sant. 1:13, 14

    Ka lubuidun arufudahani líchugubei Hesusu? (Huan 13:15; Mat. 23:11; 1 Fe. 2:21.)

  • Aliihabei Huan 17:1-26.

    Ka sentidu idanbei lamuriaha Hesusu lun “ábanmeme hamá” lani disipulugu? (Huan 17:11, 21-23; Rom. 13:8; 14:19; Kol. 3:14.)