Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 98: Ligibuagu wübü Oliwu

Abahüdaguni 98: Ligibuagu wübü Oliwu

WÜGÜRI le, Hesusu ligibuagu wübü Oliwu. Gádürü wügüriña ha ñéinbaña luma lánigu apostolugu. Biama íbirigu, Andürési luma Féduru, hama biamaya íbirigu Santiagu luma Huan. Óunwenbu muna to arihiboun yágüta dise litenpulun Bungiu to Herusalénboun.

Sügühali bián weyu lúmagiñe lebelurun Hesusu Herusaléun ligibuagu aban burigü. Luagu biama, aba lidin Hesusu ténpulurugu. Ñein álugatiñu yebe fádirigu hárügüdüni lun háfaruni. Gama lumoun hanufudetiña, ladüga hínsiñe lan Hesusu houn gürigia.

Hesusu hama lani apostolugu

‘Héwegu hama harasan hewe!’ ítara liña lagúahan Hesusu houn alidihatiña relihión lidan dan ligía. Ábati lariñagun labeichubaña lan Bungiu luagu sun katei wuribati le hadügübei. Lárigiñe aba lawarirun Hesusu luagun wübü Oliwu, ábati hagumeserun gádürü apostolugu ha álügüdaguei. Subuditi bun ka burí lan álügüdahani hadügübei lun?

Hálügüdahaña apostolugu luagu katei burí le lunbei lasuseredun ámuñegü. Subuditi houn lagumuchuba lan Hesusu lau sun wuribani Ubouagugiñe. Ani busentiña hasubudiruni ídaba lan lasusereda. Ídaba san lagiribuda Hesusu lun lagumadihan kei urúei?

Subuditi lun Hesusu siñabei lan harihini gürigia ha afalarubalin ya Ubouagu danme le lagiribudun. Ladüga siélubei lan. Ligíati, aba lubéi lariñaguni houn lánigu apostolugu fiú lídangiñe katei burí le lunbei lasuseredun Ubouagu danme le larúeihan sielu. Ariha wamá fiú lídangiñe.

Ariñagati Hesusu ñeinbei lan wuribu wéinamuti, gíbebaña lan gürigia sánditiña hama lamatiña, ñeinbei lan saragu wuribani luma óunwenbu burí hárabaganali. Ariñagati giñe lapurichihóuba lan uganu buiti luagu larúeihan Bungiu lidan sun Ubóu. Ariha wamaali san sun katei burí le lidan wadaani? Anha! Gayarati wachoururuni luagu larúeihaña lan Hesusu sielu guentó. Málühali agumucha lau wuribani Ubouagugiñe.

Matéu 21:46; 23:1-39; 24:1-14; Márükosu 13:3-10.



Álügüdahani burí

  • Ka san hádangiñe wügüriña ha lídanbaña dibuhu Hesusubei, ani kátaña ha ñeinbaña luma?
  • Ka hálugubei fádirigu hadügün lau Hesusu ténpulurugu, ani ka lariñagubei houn?
  • Ka álügüdahani hadügübei apostolugu lun Hesusu?
  • Ka uagu lariñaga Hesusu houn apostolugu fiú lídangiñe katei burí le lunbei lasuseredun Ubouagu danme le larúeihan sielu?
  • Ka lariñagubei Hesusu lasusereduba lan lubaragiñe lagumuchun lau sun wuribani le Ubouagubei?

Lanwoun burí álügüdahani

  • Aliihabei Matéu 23:1-39.

    Íbini adimureha tan Bíbülia luagu mariban lan layusurun iri burí le heresibirubei gürigia lárigiñe haturiahan tidan luban furendei, ka larufudubei lererun Hesusu lidan Matéu 23:8-11 luagu layusurun iri le íchuguti uéiriguni lidan damuriguaü hani kristiánugu? (Adü. 26:25; Rom. 13:7; 1 Fe. 2:13, 14.)

    Ka hadügübei fariséugu lun herederuniña gürigia luéi hadügün kristiánugume, ani ida liña hadügüni alidihatiña relihión ligiaméme uguñe weyu? (Mat. 23:13; Luk. 11:52; Huan 9:22; 12:42; 1 Tesa. 2:16.)

  • Aliihabei Matéu 24:1-14.

    Ida liña larufuduni Matéu 24:13 súdini lan awanduni?

    Ka lilabei dimurei “darí lumoun lagumuhóun” le lídanbei Matéu 24:13? (Mat. 16:27; Rom. 14:10-12; 2 Ko. 5:10.)

  • Aliihabei Márükosu 13:3-10.

    Ka dimurei lídanbei Márükosu 13:10 le arufudubalin mosu lan lapurichihóun uganu buiti lau loufudagun, ani ka efekütu lunbei gani lani lererun Hesusu wawagu? (Rom. 13:11, 12; 1 Ko. 7:29-31; 2 Tim. 4:2.)