Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 97: Liabin Hesusu kei urúei

Abahüdaguni 97: Liabin Hesusu kei urúei

MURUSUN dan lárigiñe lareidaguagüdüniña Hesusu amuriahatiña ha marihinbaña, aba lidin lidoun aban liraüraü aüdü yarafa lun Herusalén. Aba lariñagun houn biama hádangiñe lánigu disipulugu: ‘Belú huma lidoun aüdü hadariruba aban burigü ñǘraügili. Farara huméi ábame hanügüni nun.’

Dan le hanügüni liraüraü burigü ligía lun, aba lañuurun Hesusu ligibuagu. Ábati lidin Herusaléun, madiseti ñéingiñe. Dan le layarafadun lun uburugu, aba háfuridun saragu gürigia eresibirei. Hibe-agei gürigia aba haragachunu hadaüragun aba hábudunu ǘmadarugu. Híbiri aba híchugun tubana fáluma, aba hagúarahan: ‘Binilei Bungiu urúei le ñǘbuinbei lidan liri Heowá!’

Aba háfuridun saragu gürigia eresibirei

Saragu dan lubaragiñe dan ligía belutiñu meha urúeigu Herusaléun ligibuagu aban burigü lun harufudagun houngua houn lílana fulasu. Ligíati ladügübei Hesusu. Harufuduñeinti gürigia ha luagu busén hamá lun Hesusu lan harúeite. Ani mabusenrun hamuti sun gürigia. Gayarati warihini le, dan le lidinbei Hesusu ténpulurugu.

Tidan ténpulu areidaguagüdati Hesusu gürigia marihintiña hama danimatiña. Dan le harihini irahüñü le, aba hagúarahan uéiriguni lun Hesusu. Ani aba hagañidun fádirigu, aba hariñagun lun Hesusu: ‘Aganba bumuti san le hariñagubei irahüñü?’

‘Anha,’ liña Hesusu. ‘Maliihangidün san tidan Bíbülia ñein lubéi lariñaga: “Lasagaruba Bungiu alawahani hayumulugugiñe irahüñü ñǘbürigiña?”’ Ítara liña añahagua lan irahüñü íchiga uéiriguni lun urúei le líchugubei Bungiu.

Busentiwa ítara wamá kei irahüñü hagía, adián? Gayarati busén hamá fiú gürigia lun madimurehan wamá luagu larúeihan Bungiu. Gama lumoun wadimurehamemeba houn amu luagu katei buíduburiti le lunbei ladügüni Hesusu houn gürigia.

Dan meha ya lubéi Hesusu Ubouagu machülügili meha dan lun lagumeserun arúeiha. Ídabeiti dan ligía? Busentiñu meha disipulugu hasubudiruni. Aliiha wamá luagu le guentó.

Matéu 21:1-17; Huan 12:12-16.



Álügüdahani burí

  • Dan le lachülürün Hesusu lidoun aban liraüraü aüdü yarafa lun Herusalén, Ka lóunahabei lun hadügüni lani disipulugu?
  • Kei larihín lidan dibuhu, ka asuseredubei dan le layarafadun Hesusu uburugun Herusalén?
  • Ka hadügübei irahüñü dan le harihini Hesusu areidaguagüda gürigia marihintiña hama danimatiña?
  • Ka lariñagubei Hesusu houn fádirigu ha gáñibaña?
  • Ida luba gayara lan ítara wamá kei irahüñü ha íchugubaña uéiriguni lun Hesusu?
  • Ka habusenrubei disipulugu hasubudirun?

Lanwoun burí álügüdahani

  • Aliihabei Matéu 21:1-17.

    Ida liña amu lan lebelurun Hesusu kei urúei Herusaléun lumoun hebelurun gumadimatiña ha agañeirutiña lidan binadu Roma? (Mat. 21:4, 5; Sak. 9:9; Kol. 2:15, NM.)

    Ka san gayarabei hafurendeiruni nibureintiña hámagiñe irahüñü ísüraelina ha asagarubaña dimurei lídangiñe Sálumu 118 dan le lebelurunbei Hesusu ténpulurugun? (Mat. 21:9, 15; Sal. 118:25, 26; 2 Tim. 3:15; 2 Fe. 3:18.)

  • Aliihabei Huan 12:12-16.

    Ka san sínbolu lanibei hayusurun tubana fáluma gürigia ha íchugubaña uéiriguni lun liri Hesusu? (Huan 12:13; Fili. 2:10; Aruf. 7:9, 10.)