Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 94: Hínsiñetiñu irahüñü Lun

Abahüdaguni 94: Hínsiñetiñu irahüñü Lun

ARIHABEI Hesusu ya lau larüna óuburei irahü le. Gayarati barihin teni lan houn irahüñü. Wügüriña ha barihibaña lani apostolugu. Subuditi san bun ka lan lariñagunbei Hesusu houn?

Hesusu hama lani apostolugu hachülüraña lídangiñe aban wéiyaasu migifeti. Ǘmada asigenehatiñu buga apostolugu. Ligíati, lárigiñe wéiyaasu aba lálügüdüniña Hesusu: ‘ka san buga uagu hasigenehan ǘmada?’ Subudi lumuti Hesusu ka lan buga hasigenehabei. Aba lálügüdüniña lun larihin anhein hariñagubei lubéi lun.

Hesusu luma aban irahü

Aba herederun apostolugu maniñu, ladüga hasigenehaña ǘmada luagu ka lan hádangiñe wéirigutimabei. Fiú hádangiñe busentiñu lun wéirigutima hamá hawéi ha híbiri. Ida lubati lariñaguni Hesusu houn mabuidun lan lun habusenrun wéirigu hamá?

Aba lanügün aban irahü, aba líchuguni hagibugiñe. Aba lariñagun houn: ‘Ninarün hau luagu anhaün lan masansirun ani miabin lun hítaradun kei irahüñü, mebelubadün lidoun larúeihan Bungiu. Le ítarabei kei aban irahü ligía wéirigutimabei lidan arúeihani le siélubei.’ Subuditi bun ka lan uagu lariñagei katei le?

Masaminaruntiña irahüñü lun wéirigu hama hawéi ha híbiri. Ligíati mosu lubéi hafurendeirun apostolugu lun ítarameme hamá kei irahüñü lidan igaburi le, lun mageindagun hamá luagu uéiriguni.

Lidan burí amu ókaasion arufuda lumuti giñe Hesusu lueirin hínsiñe irahüñü lun. Fiú hati lárigiñe aba hanügüniña gürigia harahüñü lun harihini Hesusu. Aba houchun lani apostolugu lun hadisedagüniñu. Gama lumoun aba lariñagun Hesusu houn: ‘Ígira humá lun hayabin irahüñü numoun, mamahara humá, ladüga ha ítarabaña kei irahüñü, hagía lílanabaña larúeihan Bungiu.’ Ábati lóuburuniña ani biní laña. Ma buiti lasubudirunua hínsiñe hamá irahüñü lun Hesusu!

Matéu 18:1-4; 19:13-15; Márükosu 9:33-37; 10:13-16.



Álügüdahani burí

  • Ka uagu hasigeneha apostolugu dan le hagiribudunbei lídangiñe aban lidise wéiyaasu?
  • Ka uagu lagúara Hesusu lun aban irahü ani rulei hamidangua apostolugu?
  • Ka idan mosu lubéi ítara hamá apostolugu kei irahüñü?
  • Fiú hati lárigiñe, ida liña larufuduni Hesusu hínsiñe hamá irahüñü lun?

Lanwoun burí álügüdahani

  • Aliihabei Matéu 18:1-4.

    Ka uagu layusura Hesusu hénpulu dan le larufudahan? (Mat. 13:34, 36; Mar. 4:33, 34.)

  • Aliihabei Matéu 19:13-15.

    Ka igaburi hani irahüñü lunti wáyeihani anháwa busén weresibiruni abinirúni lani larúeihan Bungiu? (Sal. 25:9; 138:6; 1 Ko. 14:20.)

  • Aliihabei Márükosu 9:33-37.

    Ka larufudahabei Hesusu houn lani disipulugu luagu labusenruniwa ubaraü wéiriguti? (Mar. 9:35; Mat. 20:25, 26; Gal. 6:3; Fili. 2:5-8.)

  • Aliihabei Márükosu 10:13-16.

    Ida liña gayara lan hayarafadun gürigia lumoun Hesusu, ani ka gayarabei hafurendeirun kristiánugu ha wéiyaaña lidan afiñeni lídangiñe hénpulu le? (Mar. 6:30-34; Fili. 2:1-4; 1 Tim. 4:12.)