Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 93: Léigagüdün bandi gürigia

Abahüdaguni 93: Léigagüdün bandi gürigia

SUSERETI aban katei hanarimeti. Áfara hamá Huan le abadiseihabei. Iyereeguti meha Huan tun Erodíasi, to lani urúei weiriou. Ani ibihatu lun lóunaagüdün urúei lun ladürürǘniwa lábulugu.

Híruti Hesusu dan le laganbunbalin. Aba lidin lidoun aban fulasu labugua. Aba houdin gürigia lárigi. Dan larihiniñu Hesusu gürigia, aba hagudemedagun lun. Ligíati, ladimurehanbei houn luagu larúeihan Bungiu, aba lareidaguagüdüniña ha sándibaña.

Áriebu ligía aba hayabin lani disipulugu lumoun aba hariñagun: ‘Tárühalitia, ani úatiña gürigia aganóutiña lidan fulasu le. Óunaha baña gürigia ñüdün hamaamuga agañeiha éigini lidan burí fulasu le yarafabei.’

Leigagüdün Hesusu saragu milu gürigia

‘Mídinbaña’, liña Hesusu. ‘Ru humá éigini houn.’ Aba lálügüdüni Hesusu Felipe: ‘Halíaba san wagañeiha éigini houn sun gürigia ha?’

‘Sérubei tagañeinhóun fein lun ñein tan nófutu lun tafanreinhóuniwa murusun hadan súngubei,’ liña lóunabun Felipe. Aba layanuhan Andürési: ‘Anihán aban irahü ya, anuhein seingü fein hama bián úduraü luma. Gama lumoun lóuguabei lira houn sun gürigia.’

‘Ariñaga humá houn gürigia lun hañuurun luagu sagadi,’ liña Hesusu. Ábati líchugun eteingiruni lun Bungiu luagu éigini, aba líchugunu houn lani disipulugu. Aba hafanreinhanu fein luma úduraü hadan sun gürigia. Séingüñanu milu wügüriña éigitiña, bóugudin hawéi saragu milu würiña hama irahüñü. Sun Hagía hóutiña kimule. Aba habudahani disipulugu sun le ígiragubei, aba habuinchagüdün 12 faniñe!

Aba hádinu lani Hesusu disipulugu tidoun aban ugunei lun hánhiñuraguni barana Galiléa. Dan le laguñeedunbei aba liabin aban durumandei, ani adügati lugudi barana lun tánhinha ugunei. Wéiriti hanufude disipulugu. Ani lamidangua áriebu aba harihin aban gürigia éibugeina habaroun ligibuagu duna. Aba hagúaragun ladüga hanufude, ani ibidiñeti houn ka lan harihubei.

‘Manufudeda humá,’ liña Hesusu. ‘Au le!’ Mafiñegiña ligía lan. Ábati lariñagun Féduru lun: ‘Anhein buguya lubéi, Aburemei, éibugagüda bana ligibuagu duna bubaroun.’ Aba lóunabun Hesusu: ‘Higabu!’ Aba lararirun Féduru aba léibugun ligibuagu duna! Aba lanufudedagun, aba lagumeserun abulucha, ábati lesefuruni Hesusu.

Lárigiñe, ábaya leigagüdüniñu Hesusu saragu milu gürigia, adüga lumuti tau sedü fein hama fiú úduraü. Ani nófuti houn súngubei. Ma buiti larihin ida liña lan letenirun Hesusu houn gürigia! Lábugiñe larúeihan madiheribadiwa luagu ni kata!

Matéu 14:1-32; 15:29-38; Huan 6:1-21.



Álügüdahani burí

  • Ka asuseredubei lun Huan le abadiseihabei, ani ida liña lasandiragun Hesusu lungua?
  • Ida liña léigagüdüniña Hesusu saragu gürigia ha afalarubalin, ani átiriñein éigini ígiraguti?
  • Ka uagu hanufudeda disipulugu áriebu, ani ka asuseredubei lun Féduru?
  • Ida liña léigagüdüniña Hesusu saragu milu gürigia luagu libiaman ókaasion?
  • Ka uagu buidubei lubéi danme le larúeihani Hesusu Ubóu kei Urúei le lanúadirubei Bungiu?

Lanwoun burí álügüdahani

  • Aliihabei Matéu 14:1-32.

    Ka larufudubei abahüdaguni le lídanbei Matéu 14:23-32 luagu ligaburi lusan Féduru?

    Ida liña san tarufuduni Bíbülia awanse lan meha Féduru lidan lisubudin tuagu Lererun Bungiu ani ragüguati lungua? (Mat. 14:27-30; Huan 18:10; 21:7; Adü. 2:14, 37-40; 1 Fe. 5:6, 10.)

  • Aliihabei Matéu 15:29-38.

    Ida liña larufuduni Hesusu inebe lan lun sun le líchugubei Lúguchi? (Mat. 15:37; Huan 6:12; Kol. 3:15.)

  • Aliihabei Huan 6:1-21.

    Ida liña gayara lan hasigiruni kristiánugu lani Hesusu hénpulu lidan inebewa hamá gumadimatiña? (Huan 6:15; Mat. 22:21; Rom. 12:2; 13:1-4.)