Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 92: Lásaaragüdüniña hilaaña

Abahüdaguni 92: Lásaaragüdüniña hilaaña

IRAHÜ to barihinboun ya 12 irumu tau. Lárügüdüñein Hesusu túhabu, ani yarafatu túguchu luma túguchi. Subuditi bun ka lan uagu gunda habéi? Warihali.

Láguyuguagüdünu Hesusu liráü Hairu

Le túguchi irahü ligía aban wügüri súdiniti gíriti Hairu. Luagu aban weyu aba tasandirun liráü, aba harounragüdünu gabanarugu. Gama lumoun móuchaadaguntu. Wéiriti lidiheri Hairu tuma lani weiriou, ladüga laganóun kei tounweba lan. Ábanrügüñoun haráü. Ábati láluahani Hairu Hesusu. Aganbaali luagu burí milaguru le ladügübei.

Dan le ladariruni Hairu Hesusu, añahein saragu gürigia geyegu lau. Gama lumoun aba lásügürün hamidangua gürigia aba láhuduragun lubadu lugudi Hesusu. ‘Wéiriti tisandi niráü,’ liña. ‘Fuleseibana, higabu ábame bareidaguagüdünu,’ liña layumuragun. Ariñagati Hesusu lidinba lan.

Dan le añahagua lan éibuga, sigitiña saragu gürigia ádaha lun hayarafadun lun. Sódini aba lararamun Hesusu. ‘Ka aguurubei nuagu?’ liña lálügüdahan. Sanditi Hesusu láfuridun ubafu lídangiñe, ani subuditi lun gurú lan somu gürigia luagu. Ani katei san? Aban würi duusuhali irumu tau lau sandi. Aba taguurunu ladaüragun Hesusu, aba tareidagun!

Adügati le lun buidutima lan lasandiragun Hairu lungua, ladüga gayarati larihini ménrengun lan lun Hesusu lareidaguagüdün aban gürigia. Gama lumoun aba lachülürün aban óunagülei. ‘Meberesehadigiabá lun Hesusu,’ liña lun Hairu. ‘Hilá biráü.’ Aganba lumuti Hesusu katei le aba lariñagun lun Hairu: ‘Madiheridabá; tareidaguba biráü.’

Dan le hachülürünbei lúbiñoun Hairu, hayahuña gürigia lau saragu íruni. Ábati lariñagun Hesusu: ‘Mayahua humá. Móunwentu, tarumugarügüña.’ Aba héherahan lau ani adügatiñu bula lau Hesusu, ladüga subudi hamani luagu hilá tan.

Aba lebelurun Hesusu hama tagübürigu, hama giñe ǘrüwa hádangiñe lani apostolugu lidoun kuartu le ñein tubéi irahü. Ábati lárügüdüni túhabu aba lariñagun: ‘Saraba!’ ábaya tabagaridun, kei barihini ya. Aba tásaarun ani aba téibugun. Ligíati wéiri lubéi hagundan tagübürigu.

Mama tuguya furumiñetu gürigia lásaaragüdün Hesusu hádangiñe hilaaña. Le furumiñeti, tiráü aban würi hilaali tani weiriei to aganóuboun uburugu Naín. Lárigiñe, águyuguagüda lumuti giñe Hesusu Lásaru, le tíbiri María tuma Marta. Danme le larúeihan Hesusu kei urúei le líchugubei Bungiu, láguyuguagüdüba bándi gürigia. Ma ruti katei le ugundani woun?

Lúkasi 8:40-56; 7:11-17; Huan 11:17-44.



Álügüdahani burí

  • Ka túguchibei irahü to lidanboun dibuhu, ani Ka uagu nidiheri lubéi ligía tuma lani weiriou?
  • Ka ladügübei Hairu dan le ladariruni Hesusu?
  • Ka asuseredubei dan le lidinña lan Hesusu lúbiñoun Hairu, ani ka uganu libihubei Hairu ǘmada?
  • Ka uagu héheraha gürigia ha lúbiñebaña Hairu lau Hesusu?
  • Lárigiñe lebelurun tidoun tirumu irahü hama ǘrüwa lani apostolugu hama giñe tagübürigu irahü, ka san ladügübei Hesusu?
  • Ka amu gürigia lásaaragüdübei Hesusu hádangiñe hilaaña, ani ka larufudubei katei le?

Lanwoun burí álügüdahani

  • Aliihabei Lúkasi 8:40-56.

    Ida liña larufuduni Hesusu gudemehabu lan ani gufunranda lanu würi to sándiboun, ani ka hafurendeirubei kristiánugu ha wéiyaaña lidan afiñeni lídangiñe katei le? (Luk. 8:43, 44, 47, 48; Fad. 15:25-27; Mat. 9:12, 13; Kol. 3:12-14.)

  • Aliihabei Lúkasi 7:11-17.

    Ka uagu gayara lubéi hadarirun gürigia ha eferidirubaña haduhe lidan óunweni, gurasu lidan harihini ligaburi lóuserun Hesusu tuma würi hilaali tani weiriei Naíngiñe? (Luk. 7:13; 2 Ko. 1:3, 4; Ebü. 4:15.)

  • Aliihabei Huan 11:17-44.

    Ida liña larufuduni Hesusu mariban lan ayahuni dan le lóunwen aban waduhe? (Huan 11:33-36, 38; 2 Sam. 18:33; 19:1-4.)