Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 90: Tuma würi lóubagiñe fusu

Abahüdaguni 90: Tuma würi lóubagiñe fusu

RARAMAGUATI Hesusu emeraagua yarafa lun aban fusu Samaria. Añangüra lani disipulugu agañeiha éigini uburugu. Würi to umaboun ladimureha Hesusu tiabiña adabura duna. Aba lariñagun tun: ‘Ruba murusun duna nun.’

Ladimurehan Hesusu tuma aban würi samariana

Aba taweiridun tanigi ladüga katei le. Subuditi bun ka lan uagu? Ladüga huríu Hesusu, ani samariana tuguya. Hibe-agei huríu mínsiñetiñu samariana houn. Madimurehangubeitiñu houn! Gama lumoun hínsiñetiñu sun hawuyeri gürigia lun Hesusu. Ariñagati tun: ‘Lun hamuga subudi bani katei lan le amuriahabei duna buma, bamuriahaña hamuga luma, líchuguña hamuga duna bun le íchugubei ibagari.’

‘Aburemei,’ tiña würi, ‘úagubeiti ladabuha duna buma ani huliliti fusu le. Halíabati bibihei duna le íchugubei ibagari?’

‘Bamagürabudáyaba ánhabu ata duna lídangiñe fusu le,’ liña lafuranguagüdüni Hesusu. ‘Gama lumoun duna le lunbei níchuguni gayaraati ladügün lun bawinwandun lun súnwandan.’

‘Aburemei,’ tiña würi, ‘rubei duna ligía nun! Masandirundigiaadina láamuga mágürabu. Ani miabin nuguyame ya adabura duna.’

Afiñetu würi to ladimurehaña lan Hesusu luagu duna. Gama lumoun ladimurehaña luagu inarüni luáguti Bungiu luma larúeihan, le ítarabei kei duna le íchugubei ibagari. Gayaraati líchugun ibagari le magumuchaditi.

Aba lariñagun Hesusu tun würi: ‘Beiba ougei bani weiriei ábame bagiribudun ñahoun.’

‘Mámaritina,’ tiña.

‘Buiti bóunabun,’ liña Hesusu. ‘Séingühaña wügüriña úmatiña baganawa, ani le úmabei baganawa guentó mama bani weiriei.’

Aba taweiridun tanigi würi to, ladüga inarüni sun katei le. Ida liña lasubudiruni Hesusu? Ladüga Hesusu lan le lóunahabei Bungiu le meha füramase laalibei, ligía íchugubalin ariñahani le lun. Guentó aba hagiribudun lani Hesusu disipulugu, ábati taweiridun hanigi lau anihán lan adimureha tuma aban samariana.

Ka san wafurendeirubei lídangiñe sun katei le? Gudemehabu lan Hesusu hama gürigia ha lánina sun rasa. Mosu ítarameme wamá; moun lumuti wasaminarun wuriba lan aban gürigia ladüga lirasan. Busenti Hesusu lun hasubudiruni sun gürigia inarüni le anügübei ibagari magumuchaditi, ani mosu wíderaguniña gürigia afurendeirei.

Huan 4:5-43; 17:3.



Álügüdahani burí

  • Ka uagu lararamagua Hesusu lóubagiñe aban fusu Samaria, ani ka lariñagunbei tun aban würi?
  • Ka uagu taweiridunbei tanigi würi, ka lariñagubei Hesusu tun, ani ka uagu?
  • Ka luwuyeri duna uágubei tafiñera würi layanuhaña lan Hesusu tun, ani ka luwuyeri duna uágubei ladimureha Hesusu?
  • Ka uagu taweirida tanigi würi luagu le lasubudirubei Hesusu tuagu, ani ida liña libihini Hesusu ariñahani le?
  • Ka arufudahani gayarabei wafurendeirun lídangiñe abahüdaguni le?

Lanwoun burí álügüdahani

  • Aliihabei Huan 4:5-43.

    Kei meha Hesusu, ka igaburi lunbei warufuduni houn gürigia ha lánina amu rasa o amu lan luwuyeri habagari wawéi? ( Huan 4:9; 1 Ko. 9:22; 1 Tim. 2:3, 4; Titu 2:11.)

    Ka abinirúni leresibirubei le adügüti lánime Hesusu disipulu? (Huan 4:14; Isa. 58:11; 2 Ko. 4:16.)

    Ida luba gayara lan warufuduni ínsiñeni le tarufudahabei samariana lau tadimurehan luagu le tafurendeirubei? (Huan 4:7, 28; Mat. 6:33; Luk. 10:40-42.) Ida luba gayara lan warufuduni ínsiñeni le tarufudahabei samariana lau tadimurehan luagu le tafurendeirubei? (Huan 4:7, 28; Mat. 6:33; Luk. 10:40-42.)