Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 89: Hesusu arumadahoun ténpulu

Abahüdaguni 89: Hesusu arumadahoun ténpulu

GAÑITI larihín Hesusu ya, adián? Subuditi bun ka lan uagu? Ladüga wügüriña ha tídanbaña lani Bungiu ténpulu Herusalén güridítiña. Álugatiñu hasagarun bandi seinsu hámagiñe gürigia ha ñǘbuinbaña áhuduragua lun Bungiu.

Lagarabaaguni Hesusu dábula le ñein lubéi seinsu

Ariha bumutiña san bágasu, mudún hama unhun? Halugurahañanu wügüriña hara ya guanarügü tidan ténpulu. Subuditi san bun ka lan uagu? Ladüga mégei hamá ísüraelina animaalugu lun hadagaragüdüniña lun Bungiu.

Ariñagati meha lilurudun Bungiu mosu lan híchugun ísüraelina aban idewesei lun Bungiu dan le hadügün somu katei wuribati. Rutiña meha giñe idewesei lidan burí amu sügǘ. Ani halíaba mehati hadarira animaalugu lun hadagaragüdüniña?

Añahein meha fiú hádangiñe, galügüniñatiñu meha dunuru hama animaalugu ha gayarati hadagaragüdüniña. Ani gíbetiña ísüraelina úatiña animaalugu hama. Ha híbiri díseti hawinwandun luéi Herusalén ani siñati hanügün aban animaalu ténpulurugun. Ligiaha hayabinbei gürigia ya agañeiha animaalugu. Ani hanarimeti meha liserun hafayeihan hawagu animaalugu hagía. Íweruha hamuti alugurahatiñu ha haseinsun gürigia. Mama yebe giñe lunti halugurahan ya tidan litenpulun Bungiu.

Nihán le agañidagüdübalin Hesusu. Ábati lagarabaaguni dábula le ñein lubéi haseinsun aba lachagarun seinsu. Aba giñe labugaguniña animaalugu tídangiñe ténpulu lau aban abeihagülei lauti gúrudu. Aba lariñagun houn ha alugurahabaña unhun: ‘Sagá humaña yáagiñe! Madüga humoun luban núguchi ábanme fulasu le ñein lumuti ladügüwa bandi seinsu.’

Fiú hádangiñe lánigu Hesusu disipulugu ñeinñanu luma ténpulurugu Herusalén. Aba taweiridun hanigi dan le harihini le ladügübei Hesusu. Ábati haritaguni le tariñagubei Bíbülia luagu Liráü Bungiu: ‘Ínsiñeni le lasandirubei tuagu luban Bungiu, laduranguba lidan kei watu.’

Lidan aniha lan Hesusu ya Herusalén lidan lufedun Luéyuri Esefuruni, adügati bandi milaguru. Lárigiñe, aba láfuridun Hudeagiñe aba lagumeserun agiribuda Galiléoun. Gama lumoun sügüti Samariagiñe. Ariha waméi ka lan asuseredubei ñein.

Huan 2:13-25; 4:3, 4.



Álügüdahani burí

  • Ka uagu halugurahoua animaalugu ténpulurugu?
  • Ka uagu lágañida Hesusu?
  • Kei larihín lidan dibuhu, ka ladügübei Hesusu ani ka lariñagubei houn ha alugurahabaña unhun lun hadügüni?
  • Ka haritagubei lánigu Hesusu disipulugu dan le harihini le ladügübei?
  • Halíagiñe lásügüra Hesusu dan le lagiribudunbei Galiléoun?

Lanwoun álügüdahani

  • Aliihabei Huan 2:13-25.

    Dan le warihini ligañi Hesusu hama asansihatiña seinsu ténpulurugu, ka saminaü richati lunbei gani wamani luagu lanügǘn ebegidinaü tidoun luban hadamuridagun gefentiñu luagu Heowá? (Huan 2:15, 16; 1 Ko. 10:24, 31-33.)