Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 88: Labadiseiruni Huan Hesusu

Abahüdaguni 88: Labadiseiruni Huan Hesusu

ARIHABOUN unhun to arariruboun lábulugun wügüri lira. Hesusu wügüri lira. Kei burí 30 irumu lau guentó. Le wügüri le ñeinbei luma Huan liri. Furendeihadiwa murusun luagu. Haritagua bumuti san dan le tidinbei María bisidoun Isawéli to tiduhe, aba lan lánhingichagun irahü le turageirugubei Isawéli lau ugundani? Huan meha irahü ligía. Gama lumoun, ka ladügübei Huan luma Hesusu guentó?

Labadiseirun Hesusu

Sun liña labuluchuni Huan Hesusu lidoun lidunari Hordán. Itara liña ladügǘn badisei. Aba labuluchunua gürigia dúnarugu, lárigiñe aba lasagarunua. Adüga lumuti Huan le houn gürigia; ligía lagúahounbei lun, Huan le abadiseihabei. Gama lumoun, ka uagu labadiseirei Hesusu?

Ladügünbalin ladüga lamuriahan Hesusu luma lun labadiseiruni. Badisei lumutiña Huan gürigia ha busenbaña harufuduni asakürihaaña lan luagu katei wuribati le hadügübei. Adügati funa san Hesusu katei le lunti lasakürihan luagu? Uá, ladüga Hesusu liraübei Bungiu le ñǘbuinbei siélugiñe. Ligía anihein lubéi amu resun lun lamuriahan Hesusu luma Huan lun labadiseiruni. Ariha waméi katei lan.

Sarafangei meha Hesusu lubaragiñe liabin lumoun Huan. Aban gürigia le adügübei katei burí lauti fulansu, kei burí dábula luma haláü ligía sarafangeibei. Sarafangei meha Hosé le tani María weiriei, ani arufudahati lun Hesusu. Gama lumoun, móunahan lumuti Bungiu Hesusu Ubouagun lun sarafangeibei lan. Anihein aban wadagimanu espechaliti luma Bungiu lun Hesusu, ani chülüha dan lun ladügüni. Ligíati, lun larufuduni liabiña lan guentó lun ladügüni lugundan Lúguchi, aba lamuriahan luma Huan lun labadiseiruni. Gúndaati funa san Bungiu lau katei le?

Anha, ladüga lárigiñebei láfuridun Hesusu dúnarugugiñe, aba lariñagun aban umalali siélugiñe: ‘Anihán niráü le aubei óunwenbu lan nugundan.’ Genegeti giñe, aba lan lánhunrenchun sielu ábati tararirun unhun to luagun Hesusu. Gama lumoun mama aban unhun inarünitu, lani Bungiu sífiri sandu. Genegerügü tumuti unhun.

Guentó mosu lasaminarun Hesusu luagun bandi katei, ligía lidinbei lidoun aban fulasu málati luagu 40 weyu. Ñein láluga Satanási ladügün lun ladüraaguni Hesusu lilurudun Bungiu ǘrüwa wéiyaasu. Ani madügün lumuti Hesusu le.

Lárigiñe, aba lagiribudun Hesusu, aba lasubudirun fiú wügüriña, hagíaba furumiñetiñu lánigu disipulugu. Anihán hiri fiú hádangiñe: Andürési, Féduru (le giñe unbei laguahoua Simón), Felipe luma Natanaéli (le giñe unbei lagúahoua Barütolumé). Aba lidin Hesusu hama wügüriña ha Galiléoun. Aba hararamagun Kaná le lageira Natanaéli, ñein lubéi ladügei furumiñeti lani milaguru lidan aban maríei. Subuditi bun katei lan milaguru ligía? Aba lasaliraguagüdün duna diweinme.

Matéu 3:13-17; 4:1-11; 13:55; Márükosu 6:3; Huan 1:29-51; 2:1-12.



Álügüdahani burí

  • Kátaña biama wügüriña ha lídanbaña dibuhu?
  • Ida liña labadiseirunua aban gürigia?
  • Ka meha hawuyeri gürigia labadiseihabaña Huan?
  • Ka resun espechaliti uágubei lamuriaha Hesusu luma Huan lun labadiseiruni?
  • Ida liña larufuduni Bungiu gúndaati lan lau labadiseirun Hesusu?
  • Ka asuseredubei dan le lidinbei Hesusu lidoun aban fulasu málati luagu bián-wein weyu?
  • Kátaña furumiñetiñu lánigu Hesusu disipulugu, ani ka furumiñeti milaguru ladügübei?

Lanwoun burí álügüdahani

  • Aliihabei Matéu 3:13-17.

    Ka hénpulu lígirubei Hesusu lun ítara luba lan habadiseirún lánigu disipulugu? (Sal. 40:7, 8; Mat. 28:19, 20; Luk. 3:21, 22.)

  • Aliihabei Matéu 4:1-11.

    Ka uagu lánhigichawa lubuidun layusurunu Hesusu Bíbülia lun waturiahanu Bíbülia sagü weyu? (Mat. 4:5-7; 2 Fe. 3:17, 18; 1 Huan 4:1.)

  • Aliihabei Huan 1:29-51

    Ka umoun lóunahaña Huan le abadiseihabei lánigu disipulugu, ani ida liña gayara lan wáyeihani? (Huan 1:29, 35, 36; 3:30; Mat. 23:10.).

  • Aliihabei Huan 2:1-12.

    Ida liña larufuduni furumiñeti milaguru le ladügübei Hesusu luagu meredehan lan Heowá ni kata buiti hawéi lubúeingu? (Huan 2:9, 10; Sal. 84:11; Sant. 1:17.)