Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 86: Hasigiruña aban waruguma

Abahüdaguni 86: Hasigiruña aban waruguma
Aturiahatiña waruguma

ARIHA bumutu san waruguma ámirihatu to larufuduboun aban hádangiñe wügüriña ha lau lúhabu? Dan le háfuridunbei Herusaléngiñe, aba táfuachun waruguma. Luéigiñe oubaü le ñéingiñe lubéi laboucha Weyu hayabin ani aturiahatiña waruguma. Afiñetiña tanügübaña lan waruguma to lumoun somu gürigia súdiniti.

Dan le hachülürünbei wügüriña hagía Herusalén, aba hálügüdahan: ‘Hagéi san irahü le lunbei harúeite lan huríu?’ “Huríu” amu iri ayusuruti houn ísüraelina. ‘Furumiñe ariha wamutu luaruguman luéigiñe oubaü le ñéingiñe lubéi laboucha Weyu,’ haña wügüriña hagía, ‘wayabiñati lun wáhuduragun lun.’

Dan le lasubudiruni Erodesi, le lurúeite Herusalén, katei le, aba lagañidun. Mabusenrunti lun lanügüni amu lilugaarun. Ligía lálügüdünbaliña hábutigu fádirigu: ‘Halíaba san nasirua lan urúei le füramase waalibei?’ Aba hóunabun: ‘Tariñaga Bíbülia luagu Belénba lan.’

Ábati lariñagun Erodesi houn aturiahatiña waruguma: ‘Áluaha huméi irahü. Danme le darí humaali hawisaraname. Busentina giñe nidin áhuduragua lun.’ Ani le labusenrubei Erodesi láfaruni irahü hilagubei!

Aba tidin waruguma habá habá wügüriña hagía chülǘ Belén, aba tararamun lóugiñe fulasu le ñein lubéi irahü. Dan le hebelurunbei wügüriña múnadoun, aba hadariruni irahü tuma María to lúguchu. Aba híchugun idewesei lun. Gama lumoun, aba leweridiruniña Heowá lidan hawenedü lun magiribudún hamá lumoun Erodesi. Ligía hagiribudunbei hageiroun luéigiñe amu üma.

Dan le laganbuni Erodesi ñǘdüngua lan wügüriña hagía, aba lagañidun saragu. Aba lóunahan áfaraguaña sun irahüñü ha biántiña irumu hau lun ǘnabun, ha aganóubaña Belén. Gama lumoun, lubaragiñe sun le, aba lawisaruni Heowá Hosé lidan aban uénedü, ligía lidinbei hau lufamilia Ehiptun. Lárigiñe, dan le laganbun Hosé hilá lan Erodesi, aba lanügünu María luma Hesusu hárigoun Nasarétün, ñein laweirida Hesusu.

Según bisaminan, ka adügübei lun támirihan iseri waruguma tura? Haritaguabá, dan le harihinbalun wügüriña waruguma, aba houdin Herusalén furumiñe. Busenti meha Satanási le Mafia láfaruni liráü Bungiu, ani subudi lumuti luagu láluguba lan urúei Erodesi le herusalénna láfaruni hilagubei. Ligía Satanási gubeiñein lubéi adügübei lun támirihan waruguma tuguya.

Matéu 2:1-23; Mikeasi 5:2.



Álügüdahani burí

  • Kátaña wügüriña ha lídanbaña dibuhu, ani ka uagu nihán lubéi aban hádangiñe inchaha tuagun waruguma miritu tura?
  • Ka uagu lagañida urúei Erodesi, ani ka ladügübei?
  • Haliñoun tanügaña waruguma miritu to wügüriña ha, ani ka uagu hagiribuda hageiroun luéigiñe amu üma?
  • Ka lúrudu líchugubei Erodesi, ani ka uagu?
  • Ka lariñagubei Heowá lun Hosé?
  • Ka adügübei lun támirihan iseri waruguma, ani ka uagu?

Lanwoun álügüdahani

  • Aliihabei Matéu 2:1-23.

    Átiri meha irumu lau Hesusu ani halía meha leredera dan le bisida habalin aturiahatiña waruguma? (Mat. 2:1, 11, 16.)