Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 85: Nasirua lan Hesusu

Abahüdaguni 85: Nasirua lan Hesusu

SUBUDITI san bun katei lan irahü le? Anha, Hesusu liri. Sun liña nasirua lan tidan aban muna ñein lubéi hareidahoua animaalu. Tarounragüdüñein María Hesusu lidan héigagüle ibiñanigu, ñein líchugua éigini houn burigü hama amu animaalugu. Gama lumoun, ka uagu anuhán lubéi María luma Hosé ya hama animaalugu? Mabuidunti fulasu le lun nasirua lan aban irahü, adián?

Uá, mabuidunti. Gama lumoun, añaha lubéi ya ladüga líchugun lurúeite Roma, le gíribei Sésarü Augustu aban lúrudu lun hagiribudun sun gürigia lidoun uburugu le ñein lubéi nasirua hamá lun labürüdǘn hiri tidan aban líburu. Belén nasirua lan Hosé. Ani dan le lachülürünbei Hosé tuma María, madaritiña rumu. Mosuti houdin ñeinhin habéi animaalugu. Weyuméme ligía aba tágurahani María Hesusu! Ani kei aubei barihei magadiñeti irahü.

Hosé, María luma irahü Hesusu

Gayarati san barihiniña hóuniri mudún ha ñǘbüinbaña arihei Hesusu? Araabuñanu meha guñoun, ábati ladurangun lileitin aban ánheli geyegu hau. Aba hanufudedagun saragu. Gama lumoun aba lariñagun ánheli houn: ‘Manufudeda humá! Anihein uganu buiti numa hun. Uguñe, Belén, águrahouaali Kristu le Aburemei. Ligíaba asalbaraña lílana fulasu! Hóuburagu luba tidan gamisa, roun lidan héigagüle ibiñanigu.’ Sódini, aba hayabin bandi ánheligu aba hagumeserun íchiga uéiriguni lun Bungiu. Furesegueina aba héibaagun hóuniri mudún áluahei Hesusu, guentoti dari hamaali.

Subuditi san bun ka lan uagu espechali lubéi Hesusu? Subuditi bun katei tima lan Hesusubei? Haritaguabá, lidan furumiñeti abahüdaguni tidan líburu to, adimurehatiwa luagu furumiñeti liráü Bungiu. Nadagimeinti meha luma Heowá lidan ladügǘn sielu, Ubóu luma sun le líbiri katei. Ligía Hesusubei!

Anha, barǘ lumuti Heowá libagari liráü siélugiñe aba líchuguni turageirugun María. Lau loufudagun aba lagumeserun irahü aweirida turageirugu kei haweinamudun híbiri irahüñü turageirugu háguchu. Gama lumoun liráü Bungiu irahü le. Lagumuhóun aba lágurahoun ñein lubéi hareidahoua animaalugu lidan fulasu le gíribei Belén. Gayarati barihini guentó ka lan uagu hagundaara ánheligu dan le hariñagunbalin houn gürigia luagu nasiruali lan Hesusu?

Lúkasi 2:1-20.



Álügüdahani burí

  • Katei san irahü le lídanbei dibuhu, ani halía tarounragüdei María?
  • Ka uagu nasirua lubéi Hesusu lidan fulasu le ñein lubéi hareidahoua animaalugu?
  • Kátaña wügüriña ha ebelurubaña lidoun fulasu le ñein lubéi hareidahoua animaalugu, ani ka lariñagubei aban ánheli houn?
  • Ka uagu espechali lubéi Hesusu?
  • Ka uagu gayara lubéi laguahoun lun Hesusu liráü Bungiu?

Lanwoun burí álügüdahani

  • Aliihabei Lúkasi 2:1-20.

    Ka ligaradanboun Sésarü Augustu lidan lagunfulirun profesía luáguti nasirua lan Hesusu? (Luk. 2:1-4; Mik. 5:2.)

    Ida luba gayara lan labahüdǘn somu gürigia hadan ha unbaña laguahoua wügüriña ha “ibihubalin lufulesein” Bungiu? (Luk. 2:14; Huan 17:3; Adü. 3:19; Ebü. 11:6.)

    Anhein gébuna lubéi hagundaarun hóuniri mudún ǘnabugutiña hagüra luagu nasirua la aban esefuragülei, ka uagu wéiritima lubéi lébuna hagundaarun lubúeingu Bungiu uguñe weyu? (Luk. 2:10, 11; Efe. 3:8, 9; Aruf. 11:15; 14:6.)