Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 100: Hesusu lidan fuluri-agei

Abahüdaguni 100: Hesusu lidan fuluri-agei

LÁRIGIÑE láfuridun Hesusu lídangiñe rumu, aba lidin hau lánigu apostolugu lidoun fuluri-agei Hetüsemaní. Ñǘdünhaña ñein bandi wéiyaasu. Guentó aba lariñagun Hesusu houn lun hasigirun agagudúañu luma afurieida, aba ladisedun murusun, ani lau ligibu ǘnabun aba lafurieidún.

Murusun dan lárigiñe aba lagiribudun ñeinhin habéi lánigu apostolugu. Ka hadügübei ñein según buguya? Harumuguña! Ariñagati Hesusu houn ǘrüwa wéiyaasu lun agagudúañu hamá, ani sagü lagiribudun ladariruniña arumuga. ‘Ida luba san harumugun lidan aban dan kei le?’ Liña Hesusu dan le lagiribudunbei lagumuhóun wéiyaasu. ‘Chülüha oura lun nederegerúniwa houn náganiñu.’

Ouraméme ligía aba laganbún hamuri bandi gürigia. Arihabá! Añatén wügüriña tau eféin luma burí wewe! Ani barüina haña tochi lun líchugun leiti houn. Dan le hayarafadun, aba láfuridun aban gürigia haganaguagiñe aba lidin lubadun Hesusu. Aba líchugun piku lun kei aubei barihei ya. Húdasi Isükarióte wügüri ligía! Ka uagu líchiga piku lun Hesusu?

Laluguruni Húdasi Hesusu

Aba lálügüdahan Hesusu: ‘Húdasi, lau san aban piku balugurana?’ Anha, piku lira aban seini. Adügati lun hasubudiruni wügüriña ha úarabaña luma Húdasi ligía lan Hesusubei, le háluahabei. Ligía aba lubéi hawanserun laganiñu Hesusu lun hárügüdüni. Ani mígirunbei Féduru lun hanügüni Hesusu sin lageindagun. Aba lasagarunu lefeinte aba líchugun aban chaünti luagu wügüri le yarafabei lun. Aba ladüürüni larigei le luéigiñebei lóunwenren. Gama lumoun aba laguuruni Hesusu larigei wügüri ligía aba lareidaguagüdüni.

Aba lariñagun Hesusu lun Féduru: ‘Areidaboun befeinte lidoun tufulasun. Mafiñetibu san gayara lan namuriahan saragu milu ánheligu luma núguchi lun hesefurunina?’ Anha, gayarati ladügüni! Ani mamuriahanti Hesusu ánheligu luma Bungiu, ladüga subudi lumuti chülüha lóurate hanügüni láganiñu. Aba lígirun lun hanügüni. Ariha waméi ka lan asuseredubei lun Hesusu guentó.

Matéu 26:36-56; Lúkasi 22:39-53; Huan 18:1-12.



Álügüdahani burí

  • Haliñoun lidin Hesusu hama lánigu apostolugu lárigiñe háfuridun lídangiñe rumu lígira, ani ka lariñagubei houn lun hadügüni?
  • Ka san sügǘ idanbei ladariragua Hesusu lungua dan le lagiribudun ñeinhin habéi lánigu apostolugu, ani átiriñein wéiyaasu lasuseredun le?
  • Kei larufuduni dibuhu, kátaña san ebelurubaña lidoun fuluri-agei, ani ka ladügübei Húdasi Isükarióte?
  • Ka uagu líchiga Húdasi aban piku lun Hesusu, ani ka ladügübei Féduru?
  • Ka lariñagubei Hesusu lun Féduru, ani ka uagu mamuriahan lubéi Hesusu luma Bungiu lun lóunahan somu ánheli lun?

Lanwoun burí álügüdahani

  • Aliihabei Matéu 26:36-56.

    Ka uagu aban lubéi hénpulu buiti houn wéiyaaña kristiánugu ligaburi lererehan Hesusu houn lánigu disipulugu? (Mat. 20:25-28; 26:40, 41; Gal. 5:17; Efe. 4:29, 31, 32.)

    Ida liña larihini Hesusu tayusurún áruma kóntüra gürigia wáledi? (Mat. 26:52; Luk. 6:27, 28; Huan 18:36.)

  • Aliihabei Lúkasi 22:39-53.

    Kei aba lubéi lachülaagun aban ánheli lun líchugun erei lun Hesusu lidan fuluri-agei Hetüsemaní, mini lan san le luagu débili lan lafiñen Hesusu? Afuranguagüdabei (Luk. 22:41-43; Isa. 49:8; Mat. 4:10, 11; Ebü. 5:7)

  • Aliihabei Huan 18:1-12.

    Ida liña lóunigiruniña Hesusu lánigu disipulu hawéi ha busenbaña herederuni heseriwidun, ani ka wafurendeirubei lídangiñe lani hénpulu? (Huan 10:11, 12; 18:1, 6-9; Ebü. 13:6; Sant. 2:25.)