Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 82: Marüdokéu tuma Esütérü

Abahüdaguni 82: Marüdokéu tuma Esütérü

KEIMOUN warigoun fiú irumu lubaragiñe lidin Ésüdürasi Herusaléun. Marüdokéu tuma Esütérü hagía ísüraelina ha tima súdinibaña lidan arúeihani lani Pérüsia. Esütérü würi urúeiboun ani tani primu Marüdokéu ligía libiaman lauti ubafu lárigiñe urúei. Ariha waméi ida liña lasuseredun le.

Féridi tumutiñu Esütérü tagübürigu dan le meha irahügiru, ligíati aba lubéi lagüriahanu Marüdokéu. Asueru, lurúeite Pérüsia, gámati aban palasiu lidan uburugu Susa, ani Marüdokéu aban hádangiñe lubúeingu. Luagu aban weyu, maganbaditu Básüti lani urúei weiriou lun, aba lanúadirun urúei aban iseri weiriou. Subuditi san bun katoun lan lanúadiruboun? Esütérü to magadiñeboun.

Gáñiti Amán luma Marüdokéu

Ariha bumuti wügüri le íñuguti lanaagun lungua le unbei háhuduragua gürigia? Amán, aban wügüri le wéiriguti pérüsiana. Busenti giñe lun láhuduragun Marüdokéu lun, wügüri le barihibei ñun ñein. Gama lumoun mádügün lumuti katei le. Saminati mabuidun lan láhuduragun lun aban wügüri wéiriti luriban. Aba lagañidun Amán. Barihali kaba lan ladüga.

Abahüdaguati Amán iyeeni burí hawagu ísüraelina lun urúei. ‘Wuribatiñu ani magunfulirun hamuti bilurudun,’ liña lariñagun. ‘Mosu háfarun.’ Ibidiñeti lun Asueru, ísüraelina lan lani weiriou. Ani adügati gasu lau Amán, aba ladügün aban lúrudu lun háfarawaguniwa sun ísüraelina lidan aban weyu.

Wéiriti lidiheri Marüdokéu dan le laganbun luagu lúrudu le. Óunahati dimurei tun Esütérü: ‘Adimurehabá luma urúei, ani amuriahaba lun lesefuruniwa.’ Kóntürati lilurudun Pérüsia lun tidin arihei urúei mámisurahounga ani ñüdünmemetu Esütérü. Ábati liñuruni urúei lubadun lauti golu, mini lan le moun lan táfarun. Aba tamisurahani Esütérü urúei luma Amán lun aban adineruni. Ñein aba lálügüdünu urúei ka lan fulesei tabusenrubei lúmagiñe. Aba tariñagun lun urúei anhein lan ñüdün luma Amán lidoun ábaya adineruni le lunbei tadügüni larugan, tariñagubei lan lun.

Lidan adineruni aba tariñagun Esütérü lun urúei: ‘Dandu nuguya kei nupaisanungu wáfarawagua.’ Aba lagañidun urúei. ‘Katei le aritagubei ladügün óunwenbu wuribani?’ liña lálügüdahan.

‘Wügüri le, áganibei, lagübüri Amán!’ tiña Esütérü.

Tariñaguni Esütérü lidurun Amán

Anati guentó safagua urúei. Aba lóunaagüdün lun láfarun Amán. Lárigiñe, adüga lumuti urúei Marüdokéu libiaman lidan arúeihani. Ligía laubéi kárugu lun ladügǘn aban iseri lúrudu le ígirubaliña ísüraelina lun hageindagun luagu habagari weyu le lunbei yebe háfarawagun. Ladüga wéirigu lan Marüdokéu, gíbeña gürigia íderaguaña ísüraelina, ábati hesefurun hawéi háganiñu.

Tiliburun Esütérü.



Álügüdahani burí

  • Kátaña san Marüdokéu tuma Esütérü?
  • Ka uagu labusenra urúei Asueru aban iseri weiriou, ani katoun lanúadiruboun?
  • Katei san Amán ani ka uagu lágañida?
  • Ka lúrudu aranserubei, ani ka tadügübei Esütérü dan teresibiruni uganu lúmagiñe Marüdokéu?
  • Ka asuseredubei lun Amán, ani ka asuseredubei lun Marüdokéu?
  • Ida liña san hesefurun ísüraelina hawéi háganiñu?

Lanwoun burí álügüdahani

  • Aliihabei Esütérü 2:12-18.

    Ida liña tarufuduni Esütérü gebegi lan ‘aban sífiri gálumati ani darangilati’ (Esü. 2:15; 1 Fe. 3:1-5.)

  • Aliihabei Esütérü 4:1-17.

    Kei meha tadügüni Esütérü le buidubei luagu áhuduraguni inarüniti, ida luba warufudun gúnfuli luma úaraguni lun Heowá uguñe weyu? (Esü. 4:13, 14; Mat. 5:14-16; 24:14.)

  • Aliihabei Esütérü 7:1-6.

    Ítara Kei meha Esütérü, Ida liña hásügürün lubúeingu Bungiu denchaü lidan éibaahouni uguñe weyu? (Esü. 7:4; Mat. 10:16-22; 1 Fe. 2:12.)