Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 80: Háfuridun Babilóniagiñe

Abahüdaguni 80: Háfuridun Babilóniagiñe

SÜGÜHALI kéiburi bián irumu lúmagiñe hárügüdüni médiana hama pérüsiana Babilónia. Arihabei ka lan asuseredubei guentó! Anha, háfuriduña ísüraelina Babilóniagiñe. Ida liña san halíbürerun? Ka san ígiragüdübaliña?

Siru, le lurúeite Pérüsia. Saragu dan lubaragiñe nasirua lan Siru, adügati Heowá lun labürühani Isaíasi le lani profeta katei le luagu: ‘Badügübei sun le nabusenrubei. Lánhunrenchuba lubenari burí uburugu lun bárügüduni.’ Ábati lalidihani Siru lárügüdun Babilónia. Belutiñu médiana hama pérüsiana lidoun uburugu áriebu ligía lídangiñe bena le ígirubei hunrén.

Ariñagati giñe Isaíasi le lani Heowá profeta líchuguba lan Siru aban gumadi lunya hábunaguni Herusalén luma litenpulun. Ru lumuti san urúei Siru gumadi le? Anha. Anihán le lariñagubei houn ísüraelina: ‘Héiba Herusalén, ábunaguoun litenpulun Heowá le Hubungiute.’ Héibugati ísüraelina adügei katei le.

Háfuriduña ísüraelina Babilóniagiñe

Gama lumoun mama sun ísüraelina ha Babilóniabaña lun gayara lan hadügüni lidise wéiyaasu, Herusaléun. Aban wéiyaasu migifeti le, kéiburi 800 kilómeturu, ani saragu hádangiñe ísüraelina wéiyougaaña ani sánditiña lun lidise aweiyasuhani. Anihein giñe amu burí resun. Gürigia ha midinbaña, ariñagati Siru houn: ‘Lunti híchugun pülata, luma golu luma amu burí idewesei houn ha lunbaña hagiribudun Herusaléun ábunaguoun ténpulu.’

Ligíati, resibi habéi sun ísüraelina ha agiribudubaña Herusalén saragu idewesei. Aba giñe lederegeruni Siru kopu wéinamuti luma burí kopu le buga lanügübei urúei Nabukodonosoru tídangiñe litenpulun Heowá dan le lagünrinchaguni Herusalén. Gíbeti katei hanügün gürigia hámagua.

Lárigiñe kéiburi gádürü-hati aweiyasuha, aba hachülürün ísüraelina Herusalén lidan dan. Sügühali 70 irumu lúmagiñe lagünrinchawagun uburugu, ani rédeiti ageiraü málouga. Íbini giribuhaña lan ísüraelina hageiroun, liábinba dan hénrenguti houn, warihubeime.

Isaíasi 44:28; 45:1-4; Ésüdürasi 1:1-11.



Álügüdahani burí

  • Kei larihin lidan dibuhu, ka san hadügübei ísüraelina?
  • Ida liña lagunfuliruni Siru lani Heowá profesía le líchugubei Isaíasi?
  • Ka lariñagubei Siru houn ísüraelina ha siñabei hagiribudun Herusaléun?
  • Ka san líchugubei Siru houn gürigia lun hanügüni Herusaléun?
  • Átiriñein dan hanügün ísüraelina luba hachülürün Herusaléun?
  • Átiriñein san irumu ásügürüti lúmagiñe lerederun múa málouga?

Lanwoun burí álügüdahani

  • Aliihabei Isaíasi 44:28 luma 45:1-4.

    Ida liña san lachouruni Heowá lagunfuliruba lan profesía luagu Siru? (Isa. 55:10, 11; Rom. 4:17.)

    Ka larufudubei lani Isaíasi profesía luagu Siru, luagu lubafu Heowá lun lariñaguni le lunbei lasuseredun ámuñegü? (Isa. 42:9; 45:21; 46:10, 11; 2 Fe. 1:20.)

  • Aliihabei Ésüdürasi 1:1-11.

    Kei meha hénpulu hani ha siñabei hagiribudun Herusaléun, ida liña gayara lan ‘wíderaguniña’ ha ayusurubalin libe-agei hadaani apurichiha? (Ésüd. 1:4, 6; Rom. 12:13; Kol. 4:12.)