Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 74: Aban wügüri manufudeti

Abahüdaguni 74: Aban wügüri manufudeti

ARIHABAÑA gürigia éheraha lau nibureinti le. Subuditi san bun katei lan? Heremíasi liri, aban lani Bungiu profeta súdiniti.

Hadügüña gürigia bula lau Heremíasi

Murusun dan lárigiñe lagumeserun urúei Hosíasi agünrinchaguaña guáriua lídangiñe ageiraü, aba lariñagun Heowá lun Heremíasi lun leseriwidun lánime profeta. Gama lumoun, saminati Heremíasi ñǘraügili lan lun profeta lan. Ani aba lariñagun Heowá lun, líderagubei lan.

Aba lariñagun Heremíasi houn ísüraelina lun hígiruni ladügǘn wuribati. Lariñaga houn: ‘mama inarünitiña búngiugu ha unbaña háhuduragua néchanigu.’ Gama lumoun, gíbetiña ísüraelina himein hamuti háhuduragun houn guáriua, mama lun Heowá le Bungiu inarüniti. Dan le lariñagun Heremíasi houn labeichubaña lan Bungiu luagu wuribati le hadügübei, aba héherahan lau.

Sügüti burí irumu. Aba lounwen Hosíasi, ani ǘrüwa-hati lárigiñe aba larúeihan Hoakimü le liráü. Anihagua Heremíasi ariñaga houn gürigia: ‘Anhaün masansirun lagünrinchawaguba Herusalén.’ Aba hárügüdüni fádirigu Heremíasi aba hagúaragun: ‘Mosu lounwen Heremíasi; adimurehaali kóntüra waburugute.’

Kábati ladüga Heremíasi guentó? Manufudeti! Aba lariñagun houn súngubei: ‘Heowá óunahabadina ariñagei katei burí le hun. Anhein masansirun humá luriban hawinwandun, lagünrinchagubei Heowá Herusalén. Gama lumoun, chouru huméi le: Ánhana háfara hilagubei, háfaruña aban wügüri madurunti.’

Aba hígiruni ábutigu Heremíasi lau ibagari, gama lumoun masansirun hamuti ísüraelina luriban houserun. Lárigiñe aba liabin Nabukodonosoru, le lurúeite Babilónia, ageindagua kóntüra Herusalén. Lagumuhóun, aba ladügüniña ísüraelina lubúeingume. Barüti saragu milu hádangiñe Babilónioun. Saminabá, lun hamuga hanügünibu gürigia ha ibidiñetiña bun lidoun aban ageiraü le ibidiñeti bun, ida liña hamuga san basandiragun bungua?

Heremíasi 1:1-8; 10:1-5; 26:1-16; 2 Urúeigu 24:1-17.



Álügüdahani burí

  • Katei san nibureinti le lídanbei dibuhu?
  • Ida liña san larihini Heremíasi lisaminan Bungiu lun ladügǘn profetame, ani ka lariñagubei Heowá lun?
  • Ka uganu lasigirubei Heremíasi íchiga houn ísüraelina?
  • Ida liña houchun fádirigu herederuni Heremíasi, ani ida liña larufuduni luagu manufude lan?
  • Ka asuseredubei houn ísüraelina ladüga mígirun hamani ladügǘn le wuribabei?

Lanwoun burí álügüdahani

  • Aliihabei Heremíasi 1:1-8.

    Kei larufuduni lani Heremíasi hénpulu, ka íchugubei iarani lun gürigia lun leseriwidun lun Heowá? (2 Ko. 3:5, 6.)

    Ida liña líchugun lani Heremíasi hénpulu dügüdaguaü houn nibureintiña kristiánugu? (Apur. 12:1; 1 Tim. 4:12.)

  • Aliihabei Heremíasi 10:1-5.

    Ka óunwenbu hénpulu layusurubei Heremíasi lun larufuduni luagu meseriwín lan afiñeni hawagu guáriua lun ni kata? (Her. 10:5; Isa. 46:7; Abak. 2:19.)

  • Aliihabei Heremíasi 26:1-16.

    Dan le ladimurehoun uguñe weyu luagu uganu lánina eweridihani, ida liña hadügün kristiánugu ha anúadiruañabaña gasu lau lúrudu le líchugubei Heowá lun Heremíasi lun ‘magidarún lan ni aban dimurei ñéingiñe’? (Her. 26:2; 2 Lur. 4:2; Adü. 20:27.)

    Ka hénpulu líchugubei Heremíasi houn gefentiña luagu Heowá uguñe weyu dan le hapurichihan luagu leweridihan Heowá houn néchanigu? (Her. 26:8, 12, 14, 15; 2 Tim. 4:1-5.)

  • Aliihabei 2 Urúeigu 24:1-17.

    Ka resultóu híruti lánibei meseriwidun hamá huríu lun Heowá lau úaraguni? (2 Uru. 24:2-4, 14.)