Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 72: Líderaguni Bungiu Esekíasi

Abahüdaguni 72: Líderaguni Bungiu Esekíasi

SUBUDITI bun ka lan uagu lafurieiduña lubéi wügüri le lun Heowá? Ka uagu líchigoun gárada burí to ligibugiñe lani latarü? Esekíasi lira. Ligía lurúeitebei bián türibu lánina suru Ísüraeli, ani lídanñein óunwenbu burí turóbuli. Ka uagu?

Lafurieiduña urúei Esekíasi

Ladüga gumuguagüda hamaali lan súdaragu asiriana 10 türibu nórutena. Ígirati Heowá lun lasuseredun le ladüga hariban gürigia hagía. Guentoti ñübuinhaña súdaragu asiriana kóntüra urúei le lánina biama türibu.

Sun liña lóunahan lurúeite Asiria gárada lun urúei Esekíasi. Tuguya gárada burí to líchuguboun urúei Esekíasi ligibugiñe Bungiu. Adügati lurúeite Asiria bula lau Heowá tidan gárada burí tuguya, ariñaga ligía lun Esekíasi lun lederegeragun lungua. Ligía lafurieidunbei Esekíasi: ‘Heowá, sefubáwa luéi lurúeite Asiria. Ábameti hasubudiruni sun néchanigu luagu buguyarügüñein lan Bungiu.’ Laganbubei funa san Heowá?

Aban urúei buiti Esekíasi. Mítaranti kei lurúeitegu 10 türibu ísüraelina, ni kei lúguchi le wuribabei, urúei Aasi. Gaganbaditi lun sun lilurudun Heowá lau duari. Ligía lásurun lubéi lafurieidun, aba lóunahani profeta Isaíasi uganu le lun lúmagiñeti Heowá: ‘Mebelubei lurúeite Asiria Herusaléun. Mayarafadunbei ni aban hádangiñe lisudaranigu. Machüürünbei ni aban hádangiñe gimara luagun uburugu.’

Arihabei dibuhu le lídanbei páhina le. Subuditi san bun kátaña lan sun súdaragu hilaguaaña ha? Asiriana súngubei. Aba lóunahani Heowá lani ánheli, ani lidan ábanrügü áriebu áfarati 185,000 súdaragu asiriana. Ligía aba lubéi lidin lurúeite Asiria.

Lisudaragu asiria hilaguaaña

Sefuti arúeihani le hani biama türibu, aba ñein lan darangilaü luagu fiú dan. Ani lárigiñe lounwen Esekíasi, aba larúeihan Manasési le liráü. Wuribati urúei le, dandu ligía kei Amón le liráü. Ligía labuinchunbei ageiraü lau wuribani luma anarimeni. Lubueingu guanarügü Amón áfarubalin, ábati ladügǘn Hosíasi lurúeiteme arúeihani le lánina biama türibu.

2 Urúeigu 18:1-36; 19:1-37; 21:1-25.



Álügüdahani burí

  • Katei san wügüri le lídanbei dibuhu, ani ka uagu lídanñein lubéi saragu turóbuli?
  • Ka burí gárada to líchuguboun Esekíasi ligibugiñe Bungiu, ani ka lamuriahabei luma lidan lafurieidun?
  • Ka luwuyeri urúei Esekíasibei, ani ka uganu lóunahabei Heowá lun luma profeta Isaíasi?
  • Ka ladügübei lani Heowá ánheli houn asiriana, según larufuduni dibuhu?
  • Íbini dari lan arúeihani le hani biama türibu darangilaü luagu fiú dan, ka asuseredubei lárigiñe lounwen Esekíasi?

Lanwoun burí álügüdahani

  • Aliihabei 2 Urúeigu 18:1-36.

    Ida liña lálugun Rabüsake le lani urúei asiriana úfisi, lun ladebilidagüdüni hafiñen ísüraelina? (2 Uru. 18:19, 21; Afu. 5:2; Sal. 64:3.)

    Ida liña hasigiruni gefentiñu luagu Heowá lani Esekíasi hénpulu dan le hagagibudagun hama ha busentiñu herederuni heseriwidun? (2 Uru. 18:36; Sal. 39:1; Ari. 26:4; 2 Tim. 2:24.)

  • Aliihabei 2 Urúeigu 19:1-37.

    Lidan lidaani igarigu, ida liña háyeihani lubúeingu Heowá uguñe weyu lani Esekíasi hénpulu? (2 Uru. 19:1, 2; Ari. 3:5, 6; Ebü. 10:24, 25; Sant. 5:14, 15.)

    Ka féridi ǘrüwaguati lasufurirubei urúei Senakeríbü, ani según profesía le tídanbei Bíbülia kaba un lasusereda ligiaméme ámuñegü? (2 Uru. 19:32, 35, 37; Aruf. 20:2, 3.)

  • Aliihabei 2 Urúeigu 21:1-6, 16.

    Ka uagu gayara lubéi wachóuruni luagu Manasési lan meha aban hádangiñe urúeigu ha wuribatimabaña ha arúeihabaña Herusalén? (2 Kro. 33:4-6, 9.)