Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 71: Paraísu füramasewati

Abahüdaguni 71: Paraísu füramasewati

ANIHÁN dibuhu lani aban paraísu lenege funa le larufudubei Bungiu lun profeta Isaíasi. Wínwanti Isaíasi murusun dan lárigiñe Honasi.

Gürigia lidan paraísu

Mini lan paraísu aban “fuluri-agei” o “párüke.” Haritaguagüda lumutibu san le luagun somu katei le arihañaha baali ya? Anha, lubuidun fuluri-agei le meha ladügübei Bungiu lun Adán tuma Ewa, adián? Ani, ítara luba funa san sun Ubóu?

Ariñagati Heowá lun profeta Isaíasi lun labürühan luagu aban iseri paraísu le lunbei liabin houn lumutuniña Bungiu. Aba lariñagun: ‘Laganóuba ounli áraabuna luma mudún lidan darangilaü hámagua. Héigiba bágasu luma liñún lidan aban, ani irahüñüba etenira houn. Ni irahü le áhureruti yarafa tun aban hewe péisinitu masufurirunbei dañu.’

Hariñaguba bandi, ‘maweiyasunti le asusereda. Ániheingubeiñein lamiselu ubouagu ani ítara luba súnwandan.’ Ani saminabá san, ida liña meha san fulasu le líchugubei Bungiu lun Adán tuma Ewa?

Ru lumuti Bungiu Adán tuma Ewa lidan aban paraísu. Ladüga maganbadi hamá lun, ligía heferidirunbalin lubuidun hábiñe, aba giñe haweiyadun hilagua hagía. Füramaseti Bungiu líchugubei lan katei burí le heferidirubei Adán tuma Ewa houn gürigia ha hínsiñehabubaña lun.

Lidan iseri paraísu ligía úabei adügüti damichi ni agünrinchaguti ni kata. Ñeinbei darangilaü dayarüti. Sun gürigia buidubei hátuadi ani gúndaabaña giñe kei labusenruni Bungiu lúmagiñe furumiñeti dan. Wafurendeirubame ida luba lan ladügüni Bungiu katei le.

Isaíasi 11:6-9; Arufudúni 21:3, 4.



Álügüdahani burí

  • Ka Isaíasibei, ídabuga lawinwanda, ani ka larufudubei Heowá lun?
  • Ka lilabei dimurei paraísu, ani ka laritaguagüdübei woun?
  • Ka meha lariñagubei Heowá lun Isaíasi lun labürüdüni luagu iseri paraísu?
  • Ka uagu heferidirei Adán tuma Ewa lubuidun hábiñe?
  • Ka füramase lubéi Heowá houn ha hínsiñehabubaña lun?

Lanwoun burí álügüdahani

  • Aliihabei Isaíasi 11:6-9.

    Ida liña tarufuduni lererun Bungiu darangilaü le lunbei ñeinbei lan hadan wügüriña hama animaalugu lidan iseri ubóu? (Sal. 148:10, 13; Isa. 65:25; Ese. 34:25.)

    Ida liña lagunfulirun lererun Isaíasi hadan lumutuniña Heowá uguñe weyu? (Rom. 12:2; Efe. 4:23, 24.)

    Ka garichabei lun leresibiruni inebesei luagu lasansiragun hóusan gürigia dandu guentó kei lidan iseri ubóu le lunbei liabin? (Isa. 48:17, 18; Gal. 5:22, 23; Fili. 4:7.)

  • Aliihabei Arufudúni 21:3, 4.

    da liña tarufuduni Lererun Bungiu dan le lan lariñawagun luagu laganóuba lan Bungiu haganagua gürigia, mama lan lariñawaguña luagu harihubei lan gürigia Bungiu, ariharügü habéi lan le lunbei ladügüni hawagu? (Fad. 26:11, 12; 2 Kro. 6:18; Isa. 66:1; Aruf. 21:2, 3, 22-24.)

    Ka luwuyeri águiraü luma igarigu lunbei lagidarun? (Luk. 8:49-52; Rom. 8:21, 22; Aruf. 21:4.)