Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 68: Habagaridunya irahüñü

Abahüdaguni 68: Habagaridunya irahüñü

ÁNHABU hamuga ounwe, ida luba hamuga tasandiragun búguchu tungua lun bawinwanduya? Wéiribei hamuga ugundani tasandirun! Gayarati san labagaridunya gürigia le hilaali? Susereti meha san katei le?

Arihabei wügüri le lídanbei dibuhu, tuma würi luma irahü. Wügüri le profeta Elíasi. Würi to hilaali túmari, sarepütana, ani irahü le tiráü. Luagu aban weyu aba lasandirun irahü. Ábatima laweiridun lisandi, darí lun lounwen. Aba lariñagun Elíasi tun würi: ‘Rubei biráü nun.’

Elíasi tuma würi to hilaali tani weiriei luma tiráü le águyugubei

Aba lanügüni Elíasi irahü hilaali aba larounragüdüni. Ábati lafurieidun: ‘Heowá, águyuguagüdabei irahü le.’ Ábati lagumeserun irahü awaragua! Aba lanügüni Elíasi irahü ǘnabun aba lariñagun tun: ‘Anihán biráü wínwanti!’ Adügati katei le lun wéiri lan tugundan.

Eliséu líribei amu profeta wéiriguti lani Heowá. Seriwiti Eliséu kei ídehati lun Elíasi. Lau lásügürün dan adügati Heowá lun gayara lan ladügün Eliséu milaguru burí. Luagu aban weyu aba lidin uburugu Sunemü, ñeinñoun aban würi to areidatu lun. Lárigiñe aba tagaraüdün würi to aban wügüri irahü.

Aban weyu, dan le weiriali irahü, aba lidin le ñein lubéi lalubaha lúguchi lidan lichari. Sódini aba lagúarahan: ‘Gáriti nichügü!’ Dan le hanügüni lúbiñoun, aba lounwen aba tírudun lúguchu. Lau furesei aba tidin aluahei Eliséu.

Dan le lachülürünbei Eliséu, aba lebelurun lidoun kuartu le ñein lubéi hilaali. Aba lafurieidun lun Heowá, ábati larounrun ligibuagu hilaali. Lau lufurese aba lagumeserun lúgubu irahü abacharagua, ani aba látiñuhan sedü wéiyaasu. Wéiriti tagundaarun lúguchu dan le tebelurunbei aba tarihini wínwanñu!

Gíbeeña gürigia ounwegutiña, híruguda lumutiñu katei le hafamilia hama hamadagu. Siñati wáguyuguagüdüniña hilaaña, anati Heowá gayara lumuti. Warihubeime ida luba lan ladüga lunya habagaridun saragu miñonu gürigia.

1 Urúeigu 17:8-24; 2 Urúeigu 4:8-37.


Álügüdahani burí

  • Kátaña san ǘrüwa gürigia ha lidanbaña dibuhu, ani ka asuseredubei lun irahü luagu aban weyu?
  • Ka lamuriahabei Elíasi luagu irahü dan le lafurieidun, ani ka asuseredubei lárigiñe?
  • Ka liri le íderagubalin Elíasi?
  • Ka uagu lamuriahoua luma Eliséu lun lidin túbiñe aban würi sunemüna
  • Ka ladügübei Eliséu, ani ka asuseredubei lun irahü le hilaalibei?
  • Ka lubafu Heowá larufudubei lau le ladügübei Elíasi luma Eliséu?

Lanwoun burí álügüdahani

  • Aliihabei 1 Urúeigu 17:8-24.

    Ida liña san lóuchawagun lafiñen Elíasi luma laganbadi? (1 Uru. 17:9; 19:1-4, 10.)

    Ka uagu wéiri lubéi tafiñen würi hilaali tani weiriei sarepütana? (1 Uru. 17:12-16; Luk. 4:25, 26.)

    Ida liña lachouruni le tásügürübei würi sarepütana inarüni lan dimurei le lariñagubei Hesusu lidan Matéu 10:41, 42? (1 Uru. 17:10-12, 17, 23, 24.)

  • Aliihabei 2 Urúeigu 4:8-37.

    Ka san tarufudahabei würi sunemüna woun luagu weresibiruniña gürigia buidu? (2 Uru. 4:8; Luk. 6:38; Rom. 12:13; 1 Huan 3:17.)

    Ka burí san katei lánina areiduni gayarabei wadügün hawagu lubúeingu Bungiu uguñe weyu? (Adü. 20:35; 28:1, 2; Gal. 6:9, 10; Ebü. 6:10.)