Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 66: Hesawéli würi urúei

Abahüdaguni 66: Hesawéli würi urúei

LÁRIGIÑE lounwen urúei Heroboamü, kada urúei agumadihati lidan arúeihani le nórutebei lani diisi türibu le ísüraelina wuribati. Aabü wuribatimabei hádangiñe. Subudi bumuti san ka lan uagu? Tadüga lani weiriou, Hesawéli urúei salufuritu.

Mama ísüraelina Hesawéli, liráü lurúeite Sidón. Lun Baali táhuduragua, adügatu giñe lun láhuduragun Aabü hama bandi ísüraelina lun Baali. Iyereeguti Heowá tun ani áfaratu saragu hádangiñe lani burí profeta. Ha híbiri mosu haramudagun lidoun burí huyu luéi háfarawagun. Ánhein busen tubéi Hesawéli somu katei, áfarahatu lun tibihini.

Luagu aban weyu híruti urúei Aabü, ábati tálügüdüni Hesawéli: ‘Ka san uagu bírunbei uguñe?’

‘Ladüga le lariñagubei Nawotu nun,’ liña lóunabun. ‘Busentina yebe nagañeihani lichari, ani máhati líchuguni nun.’

‘Agurababá,’ tiña Hesawéli. ‘Nibihubei bun.’

Ábati tabürühan gárada houn ábutigu ha aganóubaña lidan fulasu le ñein lubéi laganawa Nawotu. ‘Adüga humá lun hariñagun fiú wügüriña ha meseriwiduntiñu lun ni kata iñaragua laali lan Nawotu Bungiu luma urúei,’ tiña. ‘Ábameti hasagaruni bougudin luéi uburugu ábame hachamuragun dübü luagun hilá lamuga.’

Kei taganbuni Hesawéli luagu hilá lan Nawotu, tariñaga lun Aabü: ‘Guenlé beiba barübei lichari.’ Ma san inarüni mosu lan hamuga tabeichún Hesawéli ladüga aban katei hanarimeti luriban kei le?

Würi urúei Hesawéli

Ligíati, lau lásügürün dan aba lóunahan Heowá aban wügüri Heú líribei lun tabeichún. Dan le taganbuni Hesawéli anitén lan Heú aba tefeindihani tagu lun wende lan tarihín. Gama lumoun dan le liabin Heú aba larihinu luagu funedera, ábati lariñagun houn wügüriña ha tídanbaña palasiu: ‘Chü humóun ǘnabun!’ Aganba hamuti, kei barihini lidan dibuhu. Aba hágurunu ǘnabun, ábati tounwen. Ítara liña tagumuchagun Hesawéli würi urúei salufuritu.

1 Urúeigu 16:29-33; 18:1-4; 21:1-16; 2 Urúeigu 9:30-37.



Álügüdahani burí

  • Katoun san Hesawéli?
  • Ka san uagu líruda urúei Aabü luagu aban weyu?
  • Ka san tadügübei Hesawéli lun tibihini lichari Nawotu lun Aabü?
  • Ka san lóunahabei Heowá lun tabeichún Hesawéli?
  • Kei warihini, ka san asuseredubei dan le lachülürün Heú tidan tani Hesawéli palasiu?

Lanwoun burí álügüdahani

  • Aliihabei 1 Urúeigu 16:29-33 luma 18:3, 4.

    Ida liña san wuriba lan gádantiñu lílana Ísüraeli lidan lidaani urúei Aabü? (1 Uru. 14:9.)

  • Aliihabei 1 Urúeigu 21:1-16. Aliihabei 1 Urúeigu 21:1-16.

    Ida liña larufudun Nawotu ganigi luma úaraguni lun Heowá? (1 Uru. 21:1-3; Fad. 25:23-28.)

    Ka san larufudubei lani Aabü hénpulu woun ida luba lan gagibugua wamá luma asufuriruni? (1 Uru. 21:4; Rom. 5:3-5.)

  • Aliihabei 2 Urúeigu 9:30-37.

    Ka wafurendeirubei lídangiñe lemeidin Heú dan le ladügüni lugundan Heowá? (2 Uru. 9:4-10; 2 Ko. 9:1, 2; 2 Tim. 4:2.)