Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 63: Salomón urúei sábiuti

Abahüdaguni 63: Salomón urúei sábiuti

NIBUREINGILI Salomón dan le larúeihanbei. Hínsiñeti Heowá lun, sigi lumuti buiti eweridihani le líchugubei Dawidi le lúguchi lun. Hínsiñeti Salomón lun Heowá, ligía lubeiti lariñagunbei lun aban áriebu lidan aban uénedü: ‘Salomón, ka babusenrubei lun níchugun bun?’

Ábati lóunabun Salomón: ‘Heowá Nubungiute, nibureingidina ani ibidiñeti nun ida luba lan narúeihan. Ligíati ruba lichú aau nun lun narúehaniña bumutuniña.’

Gúndaati Heowá lau le lamuriahabei Salomón. Ligíati lariñagunbei: ‘ladüga bamuriahan lichú aau mamuriahantibu ibagari migifeti ni irisini, níchuguba lichú aau bun libe le úagili luma ni aban gürigia abagariduti bubaragiñe darí guentó. Ani níchuguba giñe irisini luma uéiriguni bun, katei burí le mamuriahan bumuti.’

Murusun dan lárigiñe aba hayabin biama würiña lumoun Salomón lau aban turóbuli hénrenguti. ‘Nuguya tuma hiñaru to tidan aban muna waganawa,’ tiña aban hádangiñe. ‘Tau múnada aba nágurahan aban irahü, bián weyu lárigiñe aba giñe tágurahan hiñaru to. Luagu aban áriebu, aba lounwen tiráü hiñaru to. Dan le anaha lan arumuga, aba tíchuguni tiráü le hilaalibei nóubagiñe ani aba tanüguni niráü. Dan le násaarunbei aba narihin hilá lan irahü, ariha numuti luagu mama lan ligía niraübei.’

Dan le taganbuni to aban würi katei le, tariñaga: ‘Uá! Niráü le wínwangilibei tiráü le hilaalibei!’ Aba tóunabun to furumiñetu würi: ‘Uá! Le hilaalibei biraübei le wínwangilibei niraübei!’ Ítara liña hasigenehan würiña ha. Kábati ladüga Salomón?

Amuriahati aban eféin, dan le hanügünu lun, lariñaga: ‘Bigua huméi irahü le wínwangilibei lamidan lúmagua, híchigame lamidan tun kada würi.’

‘Uá!’ tagúaragun to lúguchuboun irahü. ‘Fulesei humana, máfara huméi irahü le. Rúgubei huméi tun hiñaru to!’ Aba tariñagun to aban würi: ‘Uá míchiga huméi tun ni aban wádangiñe; bigua huméi lamidan lúmagua.’

Urúei Salomón aranseha aban turóbuli hénrenguti

Guentoti aba lariñagun Salomón: ‘Máfara huméi irahü! Ru huméi tun furumiñetu würi. Ladüga tuguya lúguchuboun.’ Subudi lumuti Salomón katei le ladüga to lúguchuboun irahü wéiriti línsiñe tiráü tun darí lun himein tan tíchuguni tun to aban würi luéi láfarun. Dan le haganbuni gürigia ida liña lan laranseruni Salomón turóbuli le, aba hagundaarun luagu wéiri lan lichú lau harúeite.

Lidan sun dan le larúeihanbei Salomón, biní lumutiñu Bungiu lumutuniña adügati lun táhüchün bandi türigu tuma sebada, beibei, igu luma burí amu éigini. Buíduburitu hadaüragun gürigia tuma giñe muna to ñein lubéi haganawa. Lídangiñe sun katei buiti le buídürügüti houn súngubei.

1 Urúeigu 3:3-28; 4:29-34.



Álügüdahani burí

  • Ka san álügüdahani ladügübei Heowá lun Salomón, ani ida liña lóunabuni?
  • Kei hínsiñe lubéi lun Heowá le lamuriahabei Salomón, ka füramase lubéi líchuguba lan lun?
  • Ka san turóbuli hénrenguti hanügübei biama würiña lun Salomón?
  • Kei barihini lidan dibuhu, ida liña san laranseruni Salomón turóbuli le?
  • Ida liña san arúeihani lani Salomón, ani ka uagu?

Lanwoun burí álügüdahani

  • Aliihabei 1 Urúeigu 3:3-28.

    Ka san arufudahani líchugubei dimurei furanguti le lariñagunbei Salomón lidan 1 Urúeigu 3:7 houn wügüriña ha gámabani kárugu lidan óundaruni lani Bungiu? (Sal. 119:105; Ari. 3:5, 6.)

    Ka uagu buidu lubéi hénpulu lafurieidun Salomón luagu burí katei le uágubei buidu lan wafurieidun luagu? (1 Uru. 3:9, 11; Ari. 30:8, 9; 1 Huan 5:14.)

    Ka emenigini líchugubei woun ligaburi laranseruni Salomón sigenei hadan bián würiña luagume larúeihan Salomón le wéiritimabei, Hesukrístu? (1 Uru. 3:28; Isa. 9:6, 7; 11:2-4.)

  • Aliihabei 1 Urúeigu 4:29-34.

    Ida liña san lóunabuni Heowá lamuriahan Salomón aban anigi gaganbaditu? (1 Uru. 4:29.)

    Lau warihini áfaaguni le hadügübei gürigia lun haganbuni lichú lau Salomón, Ka san igaburi mosu lubéi warufuduni luagu taturiahoun Lererun Bungiu? (1 Uru. 4:29, 34; Huan 17:3; 2 Tim. 3:16.)