Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 62: Lamiselu lúbiñe Dawidi

Abahüdaguni 62: Lamiselu lúbiñe Dawidi

LÁRIGIÑE lagumeserun Dawidi arúeiha Herusalén, aba líchugun Heowá saragu agañeiruni houn lisudaranigu. Füramaseti meha Heowá Bungiu líchugubei lan Kanán houn ísüraelina. Guentó, lau lidehan Heowá sun múa ligía hánihali.

Aban urúei buiti Dawidi. Hínsiñeti Heowá lun. Ligíati, aban lídangiñe furumiñeti katei le ladügübei lárigiñe lárügüdüni Herusalén, lanügünu lubagüsina lidaradun Heowá ñeinhin. Busenti lábunagun aban ténpulu lun líchugunu ñein.

Fiú irumu lárigiñe, aba ladügün Dawidi aban óunwenbu charati. Subuditi lun luagu wuriba lan lanügǘn somu katei le yuuti lun amu gürigia. Gama lumoun aban áriebu, dan le aniha lan tábulugu lani palasiu, aba larihin aban würi magadiñetu ǘnabu. Betüsawé tíribei, lani aban hádangiñe lisudaranigu weiriou, Uríasi líribei.

Wéiriti tuaman Betüsawé lun Dawidi, aba ladügün lun tanügǘn tidoun lani palasiu. Anihein tani weiriei dise ageindagua. Aba lagamaridunu Dawidi, lárigiñe aba laganbun gasaaniboun lan. Aba ladiheridun saragu, aba ladügün lun líchuguni Hoabü le hábuti súdaragu Uríasi igibugiñein lidan wuribu lun lounwen. Dan le lounwen aba lamarieidun Dawidi tuma Betüsawé.

Aba lagañidun Heowá saragu luma Dawidi. Aba lóunahani Natán le lubúein adimureha luma Dawidi luagu lifigoun. Gayarati barihini Natán ya luma Dawidi. Wéiriti luriban lasandiragun Dawidi lungua luagu le ladügübei, ábati máfarun lani Heowá Dawidi hilagubei. Gama lumoun aba lariñagun: ‘Ladüga sun katei wuribati le badügübei, ñeinbei saragu turóbuli búbiñe.’ Ma lanarime lilamiserun Dawidi!

Natán eweridiha lun Dawidi

Furumiñe, hilati tiráü Betüsawé. Lárigiñe aba lafosurunu Amünón le furumiñeti liráü Dawidi Tamarü to litu lun tarounrun luma. Lidan ligañi Abüsalón le liráü Dawidi aba láfaruni Amünón hilagubei. Ábati lagañeiruni Abüsalón hínsiñehabu bandi gürigia, aba ladügün lun hadügüni urúeime. Lagumuhóun, aba lagañeiruni Dawidi wuribu kóntüra Abüsalón, aba lounwen Abüsalón. Anha, gíbeti lamiselu lasufurirun Dawidi.

Lamidangua sun katei le, aba tágurahan Betüsawé aban irahü gíriti Salomón. Dan le wéiyaali Dawidi ani sándihali, aba lóuchun Adoníasi le liráü lun larúeihan. Aba lubéiti ladügün Dawidi lun liabin aban fádiri gíriti Sadokü awiyura agülei lábulugun Salomón lun larufuduni luagu ligíaba lan urúei. Murusun dan lárigiñe aba lounwen Dawidi lau 70 irumu. Arúeihati luagu 40 irumu. Guentó Salomón arúeihabei.

2 Samueli 11:1-27; 12:1-18; 1 Urúeigu 1:1-48.



Álügüdahani burí

  • Lau lidehan Heowá ka asuseredubei Kanán lagumuhóun oura?
  • Ka asuseredubei aban rábounweyu, dan le nihán lubéi Dawidi tábulugu lani palasiu?
  • Ka uagu lagañida Heowá saragu luma Dawidi?
  • Katei wügüri le lídanbei dibuhu le lóunahabei Heowá lun layanuhan luma Dawidi luagu lifigoun, ani ka lariñagubei wügüri ligía lasusereduba lan lun Dawidi?
  • Ka burí lituróbulinbei Dawidi?
  • Ka urúeibei Ísüraeli lárigiñe Dawidi?

Lanwoun burí álügüdahani

  • Aliihabei 2 Samueli 11:1-27.

    Dan le wakipuragun woungua beresegu eseriwida lun Heowá, ida liña ladouragun wau?

    Ida liña lachawahani figóu Dawidi, ani ka eweridihani líchugubei houn lubúeingu Heowá uguñe weyu le asuseredubei lun Dawidi? (2 Sam. 11:2; Mat. 5:27-29; 1 Ko. 10:12; Sant. 1:14, 15.)

  • Aliihabei 2 Samueli 12:1-18.

    Ka san gayarabei hafurendeiruni wéiyaaña lidan afiñeni hama agübürigu lídangiñe ligaburi lererehan Natán lun Dawidi? (2 Sam. 12:1-4; Ari. 12:18; Mat. 13:34.)

    Ka san uagu larufuda Heowá gudemehabu lun Dawidi? (2 Sam. 12:13; Sal. 32:5; 2 Ko. 7:9, 10.)