Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 58: Dawidi luma Goliadi

Abahüdaguni 58: Dawidi luma Goliadi

AÑATEYA filistéana lun hageindagun kóntüra Ísüraeli. Ǘrüwa líbugañanu Dawidi hádanñanu lisudaranigu Saulu guentó. Aban weyu aba lariñagun Hesé lun Dawidi: ‘Beiba ariha ida liña lan lidin houn bíbugañanu, barüba türigu houn tuma fein.’

Goliadi

Dan le lachülürün Dawidi tidoun kianpu-agei, aba léibaagun ñeinhin lubéi wuribu áluahaña líbugañanu. Aba láfuridun aban hígandei filistéana gíriti Goliadi adüga bula hau ísüraelina. Sagü binaafin luma sagü guñoun ladügüni luagu 40 weyu. Lagúaraha: ‘Anúadira humá somu gürigia lun lageindagun numa. Anhein agañeira áfara laname hilagubei, hidamun badiwa. Gama lumoun ánhana agañeira, wadamunbadün. Agunbiraha numutün lun hanúadirun aban gürigia lun le.’

Ábati lálügüdüniña Dawidi fiú súdara: ‘Kaba íchugua lun le áfaruti filistéana le hilagubei lun lesefuruni Ísüraeli lídangiñe busiganu le?’

Aba hariñagun: ‘Líchuguba Saulu bandi irisini lun,’ lariñaga ábanya súdara. ‘Líchuguboun giñe urúei liráü lun, lun lánime weiriou.’

Gama lumoun, hanufudetiña sun ísüraelina luéi Goliadi ladüga aban lan wügüri hanarimeti lueirin. Yarafa lun ǘrüwa meturu lúgubu, ani anihein amu súdara luma le anügübalin lidaüdina.

Aba houdin fiú súdara ariñaga lun urúei Saulu luagu busen lan Dawidi lidin ageindagua luma Goliadi. Gama lumoun, aba lariñagun Saulu lun Dawidi: ‘Siñati bidin. Ñǘraügidibu, ánheinti wügüri le súdaragubeiñen.’ Aba lariñagun Dawidi: ‘Au áfaratina aban osu luma aban liñún ha anügübaliña lilügüniña núguchi mudún. Ítara luba giñe nadüga lun filistéana le. Líderagubadina Heowá.’ Ligía lariñagunbei Saulu: ‘Beiba, bumalá Heowá.’

Aba laragachun Dawidi dúnarugun aba labudun seingü dübü guyeti aba ládaruni tidoun lisagüte. Ábati lawarirun tau lani chilinchádi lun lageindagun luma hígandei. Mafiñeti Goliadi. Genegeti lun luagu ménrengunbei lan láfaruni Dawidi hilagubei.

Lachüüñein Dawidi dübü

‘Higabu ñahoun,’ liña Goliadi, ‘níchigaali bǘgürügü houn animaalugu.’ Ani aba lariñagun Dawidi: ‘Amürü biabin nuagun tau eféin, aban arufun, tuma aban gimara, ánheinti au néibuga buagun lidan liri Heowá. Lederegeraadibu Heowá núhaburugun uguñe ábame náfarunibu hilagubei.’

Ábati léibaagun Dawidi luagun Goliadi. Aba lasagarun aban dübü tídangiñe lisagüte, aba líchuguni tuagu lani chilinchádi aba lachüürüni luagun Goliadi lau sun lere. Aba lebelurun dübü lábulugun Goliadi, aba lounwen! Dan le harihini filistéana hawügürin múarugu, aba hanurahan. Aba héibaagun ísüraelina hárigi aba hagañeiruni wuribu.

1 Samueli 17:1-54.



Álügüdahani burí

  • Ka luwuyeri amisurahani ladügübei Goliadi houn súdaragu ísüraelina?
  • Átiriñein méturu lúgubu Goliadi, ani kaba líchiga Saulu lun wügüri le áfaruti Goliadi hilagubei?
  • Ka lariñagubei Dawidi dan le lariñagunbei Saulu lun, siñati lan lageindagun kóntüra Goliadi ladüga ñǘraügili lan?
  • Ida liña larufudun Dawidi emenigini luagu Heowá dan le lóunabuni Goliadi?
  • Según larufuduni dibuhu, ka layusurubei Dawidi lun láfaruni Goliadi, ani ka asuseredubei houn filistéana lárigiñe?

Lanwoun burí álügüdahani

  • Aliihabei 1 Samueli 17:1-54.

    Ka lanichigubei libibun Dawidi, ani ida luba gayara lan wáyeihani ganigi le luágubei? (1 Sam. 17:37, 45; Efe. 6:10, 11.)

    Ka uagu mosu lubéi hadisedun kristiánugu luéi sífiri lánina ásügüraguni, kei burí le lani Goliadi, dan le háhurerun o dan le lidanñanu lan amu burí luwuyeri isebáhari? (1 Sam. 17:8; Gal. 5:26; 1 Tim. 4:8.)

    Ida liña larufuduni dimurei le lariñagubei Dawidi luagu afiñe lan líderagubei lan Heowá? (1 Sam. 17:45-47; 2 Kro. 20:15.)

    Lubaragiñe hamuga ladimurehoun luagu aban wuribu hadan biama sétanu súdaragu, ida liña larufuduni abahüdaguni le, luagu hádanñein lan búngiugu mama inarünitiña wuribu ligía luma Bungiu inarüniti, Heowá? (1 Sam. 17:43, 46, 47.)

    Ida liña háyeihani anúadiruaña ha yáabaña ubouagu lani Dawidi hénpulu, le arufudubei afiñeni luagu Heowá? (1 Sam. 17:37; Her. 1:17-19; Aruf. 12:17.)

Lanwoun ariñahani

ARUFUDAHANI TÍDANGIÑETI BÍBÜLIA HOUN ISAANIGU

Manufudeti meha Dawidi

Aliihabéi abahüdaguni tídangiñeti Bíbülia le lun basubudiruni ka lan uagu ganigi lubéi meha Dawidi.