Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 56: Furumiñeti urúei Ísüraeli

Abahüdaguni 56: Furumiñeti urúei Ísüraeli
Samueli anúadirei Saulu kei urúei

ARIHABEI Samueli ésera agülei lábulugun wügüri lira. Ligía meha adügübei lun aban gürigia lun larufudun anúadiruali lan kei urúei. Aba lariñagun Heowá lun Samueli lun léserun agülei lábulugun Saulu. Aban agülei espechaliti le buiti líhemen.

Mafiñeti yebe Saulu luagu wéiri lan lubuidun lun urúeime. ‘Lídangiñetina lani Benhamín türibu le ñǘraütimabei Ísüraeligiñe. Ka uagu bariñaga urúeibadina lan?’ liña Saulu lun Samueli. Hínsiñeti Saulu lun Heowá ladüga málugunti lun wéirigu lan ni lun súdini lan. Ligía lanúadirunbalin lun urúeime.

Gama lumoun magudemeti Saulu, mama giñe aban wügüri nǘraüti. Lídangiñeti aban familia rísiti, magadiñeti giñe ani gágubu ligía. Gágubuti hawéi sun ísüraelina kei burí lóugiñe aban ugudi! Aban giñe wügüri buiti lidan éibaaguni Saulu, ani héreti giñe. Gúndaatiña gürigia luagu lanúadiruni Heowá Saulu lun urúeime. Aba hagumeserun súngubei agúaraha: ‘Gabagarilá urúei!’

Hérememegiña háganiñu ísüraelina. Murusun dan lárigiñe ladügǘn Saulu urúeime, aba hawarirun amonna kóntüra ísüraelina. Ani aba lóundaragun Saulu bandi súdara, aba lagañeiruniña amonna. Aba hagundaarun ísüraelina luagu Saulu lan harúeitebei.

Sügüti burí irumu, ani nihán Saulu adundehaña ísüraelina lidoun bandi agañeiruni. Garáüti giñe Saulu aban wügüri ganigiti, Yónatan líribei. Íderagua lumutiña Yónatan ísüraelina agañeira bandi wuribu. Filistéana memegiña háganiñu ísüraelina ha timatiña. Aban weyu, aba hayabin saragu milu filistéana kóntüra Ísüraeli.

Aba lariñagun Samueli lun Saulu lun lagurabahani lagiribudun lun ladügün aban sákürifisiu lun Heowá. Gama lumoun darasati Samueli. Hanufudeti Saulu luéi hagumeseruni filistéana wuribu, aba lubéi lafuresehan adügei sákürifisiu ligía lungua. Dan le lachülürünbei Samueli, aba lariñagun lun Saulu luagu maganbadi lan. ‘Lanúadira Heowá amu gürigia lun urúeime Ísüraeli,’ liña Samueli.

Lárigiñe, ábaya maganbadi lan Saulu. Aba lariñagun Samueli lun: ‘Buitimati gaganbadi lun Heowá sügǘ lau ladügǘn idewesei lun hau habuidun-agei mudún. Ladüga maganbadi ban lun Heowá, makipurun láadibu kei urúei Ísüraeli.’

Lídangiñe le furendeitiwa aban lubuidun leksióun. Arufudati woun luagu súdini lan gaganbadi lun Heowá súnwandan. Arufudati giñe gayara lan laribadun aban gürigia buiti, kei meha Saulu. Lun maweiyasun lan le asusereda woun! adián?

1 Samueli, kapítulu 9 darí 11; 13:5-14; 14:47-52; 15:1-35; 2 Samueli 1:23.



Álügüdahani burí

  • Ka san ladügübei Samueli lidan dibuhu, ani ka uagu?
  • Ka uagu hínsiñe lubéi Saulu lun Heowá, ani ka luwuyeri wügüri Saulubei?
  • Ka liri liráü Saulu, ani ka ladügübei?
  • Ka uagu ladagaragüdei Saulu sákürifisiu lubaragiñe hamuga lagurabahan lun Samueli lan adügei?
  • Ka burí leksióun wafurendeirubei lídangiñe abahüdaguni luáguti Saulu?

Lanwoun burí álügüdahani

  • Aliihabei 1 Samueli 9:15-21 luma 10:17-27.

    Ida liña líderaguni ǘnabuguni le luágubei Saulu lun madügün lan aban katei sin lasaminaruni, dan le hayanuhanbei fiú wügüriña luagu lau menebenehabuni? (1 Sam. 9:21; 10:21, 22, 27; Ari. 17:27.)

  • Aliihabei 1 Samueli 13:5-14.

    Ka figóu ladügübei Saulu Gilügáli? (1 Sam. 10:8; 13:8, 9, 13.)

  • Aliihabei 1 Samueli 15:1-35.

    Ka lanarime figóu ladügübei Saulu lidan luáguti Agagü le lurúeite Amalékü? (1 Sam. 15:2, 3, 8, 9, 22.)

    Ida liña lálugun Saulu lagidaruni duru luariua luagu le ladügübei luma lun líchuguni duru hawagun amu? (1 Sam. 15:24.)

    Ka eweridihani lunbei gaganbadi wamá lun dan le lichugún somu adundehani woun? (1 Sam. 15:19-21; Sal. 141:5; Ari. 9:8, 9; 11:2.)