Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 53: Lani Hefüté füramasei

Abahüdaguni 53: Lani Hefüté füramasei
Lisaani Hefüté

ADÜGAADIBU san aban füramasei le hénrenguti bun bagunfuliruni? Ligía asuseredubei lun wügüri le lídanbei dibuhu, ligíati lírunbei. Hefüté líribei, aban aguseragüdüti ganigiti ísüraelina.

Wínwanti Hefüté lidan aban dan mahuduragunhaña lan ísüraelina lun Heowá. Ábayati hadügüni le wuribabei. Ligíati lígirunbaliña Heowá lun hadügün amonna dañu houn. Aba hagúahan ísüraelina lun Heowá: ‘Afigouhaadiwa bigibugiñe. Sefubáwa!’

Hefüté hama luwügüriña

Wuribati hasandiragun gürigia houngua ladüga katei burí wuribati le hadügübei. Arufuda hamuti lau háhuduragunya lun Heowá. Ligíati, ábaya lubéi líderaguniña Heowá.

Hefüté hanúadirubei gürigia lun lageindagun kóntüra wuribatiñu amonna. Ayumaha lumuti Hefüté lídehan Heowá lidan wuribu. Ligíati füramase lubéi lun Heowá: ‘Anhein bagañeiragüda wuribu nun, furumiñetu gürigia áfuridutu núbiñegiñe eresibirana danme nagiribudun níchuguboun bun.’

Aganba lumuti Heowá lani Hefüté füramasei, aba líderaguni agañeira. Dan le lagiribudun Hefüté, subuditi san bun ka lan furumiñetu gürigia áfuriduboun eresibirei? Liráü to ábanrügüboun. ‘Niráü!’ liña layahun Hefüté. ‘Ma lanarime íruni bíchugun nun! Lugundun adügaadina aban füramasei lun Bungiu, ani guentó mosu nagunfuliruni le füramase nubéi lun Heowá.’

Dan le tasubudiruni liráü Hefüté le füramase lubéi, furumiñe aba giñe tírudun, ladüga tígiraali túguchi ígiratañame tumadagu. Ani tásügürübei sun tibagari eserewidei Heowá tidan lani tabernákulu Siló. Ligíati aba tariñagun lun Hefüté: ‘Anhein adügaadibu lubéi aban füramasei lun Heowá, mosu bagunfuliruni.’

Ítara liña aba lan tidin liráü Hefüté Siló, aba tásügürüni sun tibagari eserewidei Heowá tidan lani tabernákulu. Ñüdüntiña würiña ísüraelina bisidoun gádürü weyu kada irumu, aba hásügürün aban lubuidun dan hámagua. Hínsiñetu liráü Hefüté houn gürigia ladüga aban tan buitu ubuein lun Tubungiute Heowá.

Alidihatiña 10:6-18; 11:1-40.



Álügüdahani burí

  • Katei san Hefüté, ani ka dan lawinwanda?
  • Ka füramase lubéi Hefüté lun Heowá?
  • Ka san uagu líruda Hefüté dan le lagiribudunbei lúbiñoun lárigiñe lagañeiruniña Amonna?
  • Ka san tariñagubei liráü Hefüté dan le tasubudiruni luáguti füramasei le ladügübei túguchi?
  • Ka san uagu tínsiñebei liráü Hefüté houn gürigia?

Lanwoun burí álügüdahani

  • Aliihabei Alidihatiña 10:6-18.

    Ka eweridihani le lunti wetenirun lun líchugubei sun le hadügübei ísüraelina dan le magunfulirun hamá lun Heowá ? (Ali. 10:6, 15, 16; Rom. 15:4; Aruf. 2:10.)

  • Aliihabei Alidihatiña 11:1-11, 29-40.

    Ida liña wasubudiruni dan lariñagun Hefüté luagu líchigaaru lan liráü “kei adagaragüdüni” mama lan líchuguñoun keisi aban sákürifisiu hani gürigia? (Ali. 11:31; Fad. 16:24; 2 Lur. 18:10, 12.)

    Ida liña san ladagaragüdǘnu Hefüté liráü kei aban sákürifisiu?

    Ka wafurendeirubei lúmagiñe ligaburi lisaminan Hefüté luagu füramasei le ladügübei lun Heowá? (Ali. 11:35, 39; Apur. 5:4, 5; Mat. 16:24.)

    Ida liña san gayara lan hasigiruni nibureintiña kristiánugu tani liráü Hefüté hénpulu dan le híchuguni libe-agei hadaani eseriwida lun Heowá? (Ali. 11:36; Mat. 6:33; Fili. 3:8.)