Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 52: Hedeón hama 300 wügüriña

Abahüdaguni 52: Hedeón hama 300 wügüriña

ARIHA bumuti san ka lan asuseredubei ya? Wügüriña ha lánina wuribu ísüraelina. Ha barihibaña élemucha hatuña duna. Rara liña aguseragüdüti Hedeón yarafa houn. Larihiñein ida liña lan hatun duna.

Arihabei ámuñegueinarügü lan luwuyeri hatun duna. Fiú hádangiñe lémutiña chülǘ dúnarugun. Ániheinti aban barǘ lumuti duna liyumulugun lau lúhabu, lun larihin ka lan asuseredubei geyegu lau. Súdiniti katei le, ladüga ariñagati Heowá lun Hedeón lunrügü lanúadiruniña ha átutiña duna agaradañu. Ha híbiri mosu hagiribudun hábiñoun. Ariha waméi ka lan uagu.

Dáguayatiñu ísüraelina houngua lidan bandi turóbuli ladüga maganbadi hamá lun Heowá. Gabafutimahaña madianna sügǘ hau, ani adügatiñu dañu houn. Ábati hamuriahan ísüraelina ídemuei luma Heowá, ani aganba lumuti Heowá hayumuragun.

Aba lariñagun Heowá lun Hedeón lun lóundarun súdaragu, ligíati aba lóundaruniña Hedeón 32.000 wügüriña ha lánina wuribu. Gama lumoun añahein 135.000 súdaragu kóntüra Ísüraeli. Lariñaga Heowá lun Hedeón: ‘Gíbeyatiña wügüriña ha búmabaña.’ Ka san uagu lariñagei le?

Ladüga anhein hagañeira ísüraelina wuribu, gayarati haritagun luagu lau lan habafu hagañeira, memegeirun hamá líderaguniña Heowá. Ligíati aba lariñagun Heowá lun Hedeón: ‘Ariñagabá houn ha hanufudebaña lun hagiribudun hábiñoun.’ Dan le ladügüni Hedeón katei le, aba houdin 22.000 wügüriña ha lánina wuribu. Aba herederun 10.000 wügüriña lun hageindagun hama 135.000 súdaragu.

Lóuchaguniña Hedeón luwügüriña

Aba lariñagun Heowá, aganbabá: ‘Gibemémegiña wügüriña buma.’ Ábati lariñagun lun Hedeón lun hatun wügüriña ha lídangiñe duna le éibaagubei, ábameti lóunahaniñu sun ha atubaña duna lémugu hábiñoun. ‘Níchugubei agañeiruni bun hau 300 wügüriña ha atubaña duna agaradañu,’ ítara liña füramase lani Heowá.

Chülüha dan lun ageindaguni. Aba lafanreinraguniñu Hedeón 300 luwügüriñan lidan ǘrüwa sétanu. Aba líchugun fidu le lauti haganchun mudún lun kada aban, luma aban diná lau aban tochi lurageirugu. Kéiburi amidi áriebu, aba hóundaragun súngubei geyegu tau hakianpun-agei áganiñu. Ábati, hínwinruni fidu lidan aban, aba habouchaguni diná, agúaraheina hagía: ‘Lefeinte Heowá luma Hedeón!’ Dan le hagagudun áganiñu, aba hayuridagun aba giñe hanufudedagun. Aba hanurahan súngubei, ábati hagañeiruni ísüraelina wuribu.

Alidihatiña, kapítulu 6 darí 8.



Álügüdahani burí

  • Ka san haturóbulinbei ísüraelina, ani ka uagu?
  • Ka san uagu lariñaga Heowá lun Hedeón luagu gíbeyatiña lan lisudaranigu?
  • Lárigiñe lóunahaniñu Hedeón ha hanufudebaña hábiñoun átiriñanu san wügüriña erederutiña?
  • Según larufuduni dibuhu, ida liña san ladügün Heowá lun halouguadun lisudaranigu Hedeón lunrügü 300 wügüriña?
  • Ida liña san lafanreinhaniñu Hedeón 300 wügüriña, ani ida liña lagañeiruni Ísüraeli wuribu?

Lanwoun burí álügüdahani

  • Aliihabei Alidihatiña 6:36-40.

    Ida liña san lachoururuni Hedeón ka lan labusenrubei Heowá?

    Ida liña san gayara lan wakutihani uguñe weyu ka lan lugundanbei Heowá? (Ari. 2:3-6; Mat. 7:7-11; 2 Tim. 3:16, 17.)

  • Aliihabei Alidihatiña 7:1-25.

    Ka san wafurendeirubei hámagiñe 300 wügüriña ha meha aranseñubaña, hamoun ha mekeetiñu? (Ali. 7:3, 6; Rom. 13:11, 12; Efe. 5:15-17.)

    Ítara kei 300 wügüriña ha afurendeirubaña lúmagiñe Hedeón lau harihini, ida liña wafurendeirun lúmagiñe Hedeón wéiritimati, Hesukrístu? (Ali. 7:17; Mat. 11:29, 30; 28:19, 20; 1 Fe. 2:21.)

    Ida liña san líderaguniwa Alidihatiña 7:21 lun gunda wamá lun weseriwidun ñein lumuti líchigawa lani Heowá óundaruni? (1 Ko. 4:2; 12:14-18; Sant. 4:10.)

  • Aliihabei Alidihatiña 8:1-3.

    Dan le waransehani waturóbulin luma aban íbiri, ka wafurendeirubei lúmagiñe ligaburi laranseruni Hedeón sigenei hama lánigu Éfürain? (Ari. 15:1; Mat. 5:23, 24; Luk. 9:48.)