Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 51: Rudu tuma Noemí

Abahüdaguni 51: Rudu tuma Noemí

TIDAN Bíbülia badeiruba aban líburu Rudu tíribei. Aban abahüdaguni hawagu aban familia ha aganóubaña lidan dan le ñein habéi meha aguseragüdütiña Ísüraeli. Rudu aban würi nibureintu moábüna; mama ísüraelina. Gama lumoun dan le tafurendeirun luagu Bungiu le inarüniti, Heowá, wéiriti línsiñe tun. Noemí aban würi wéiyaaru to íderagubanu Rudu asubudirei Heowá.

Ísüraelina Noemí. Tuguya luma tani weiriei hama biama hasaanigu aba háguyun Moabün dan le ladagarun ümi Ísüraeli. Luagu aban weyu, aba lounwen tani Noemí weiriei. Lárigiñe, aba hamarieidun tisaanigu Noemí hama bián moábüna Rudu tuma Orufá híribei. Kéiburi 10 irumu lárigiñe, aba hóunwegun tisaanigu Noemí. Ma lírun! Kábagia tadüga Noemí guentó?

Luagu aban weyu desidírütu Noemí tagiribudun tageiroun, díseti wéiyaasu ligía. Busentu Rudu tuma Orufá lun houdin tuma, ábati houdin. Somu dan lárigiñe lidan üma, aba tariñagun Noemí houn nibureintiña ha: ‘Giribu humá húbiñoun le ñéingiñe lubéi hiabin, redei humá tuma húguchu.’

Aba tayouragun Noemí houn lau aban piku. Aba hatatirun ayahua, ladüga wéiriti tínsiñe Noemí houn. Aba hariñagun tun: ‘Uá! Weibuga buma bageiroun.’ Aba tóunabuniña Noemí: ‘Mosu hagiribudun, nirahüñü. Buidutimaabei lidin hun hadan hánigu.’ Ábati tagiribudun Orufá tageiroun. Anhoun Rudu midintu.

Aba tagararagun Noemí tuagun aba tariñagun tun: ‘Ñüdünha Orufá. Beiba giñe tuma.’ Aba tóunabun Rudu: ‘Mamuriahabá lun nígirunibu! Ígirabana lun nidin buma. Nídiba le ñeinhin lumuti bidin, naganóuba le ñein lumuti baganawa. Le bageira ligíaba nageira le Bubungiute, ligíaba Nubungiute. Nóunweba le ñein lumuti bounwe, ani ñeinba nabusenra lun nabunúniwa.’ Dan le tariñaguni Rudu katei le, málugun haaru Noemí lun tagiribudun Rudu.

Lagumuhóun, aba hachülürün biama würiña ha Ísüraeli. Aba herederun ñein. Lau lufurese aba tatatirun Rudu nadagimein lidan burí ichari, ladüga lidaani lan lalubahóuniwa sebada. Aban wügüri gíriti Boosu ígirati tabudahan lidan lichari. Subuditi san bun ka lan meha lúguchuboun Boosu? Raabü, lídangiñetu uburugu Herikó.

Luagu aban weyu aba lariñagun Boosu tun Rudu: ‘Gíbeeli naganbahan buagu, luagu sun katei buiti le badügübei tuagu Noemí. Subudi numuti ígira bániña bagübürigu luma bageira lun biabin aganawa wama, wagía gürigia ha buga ibidiñetiña bun. Ayumahatina lun buidu lan Heowá buma!’

Aba tóunabun Rudu: ‘Wéiriti lubuidun bigaburi numa. Buíngüda lumutina bererun lau gurasu.’ Wéiriti tínsiñe Rudu lun Boosu, murusun dan lárigiñe aba hamarieidun. Gúndaatu Noemí lau katei le! Ani gúndaatimatu Noemí dan tagaraüdüni Rudu furumiñeti haráü, Owedi líribei, ligíati lárugutibei Dawidi, wafurendeirubame luagu Dawidi.

Rudu tuma Noemí

Tiliburun Rudu.



Álügüdahani burí

  • Ka san uagu tidinbei Noemí lidoun fulasu le gíribei Moabü?
  • Kátaña san Rudu tuma Orufá?
  • Ida liña san hóunabun Rudu tuma Orufá dan le tariñagunbei Noemí lun hagiribudun hageiroun?
  • Ka san Boosubei, ani ida liña san líchugun ídemuei tun Rudu tuma Noemí?
  • Ka san liri liráü Boosu tuma Rudu, ani ka san uagu mosu lubéi waritagun luagun?

Lanwoun burí álügüdahani

  • Aliihabei Rudu 1:1-17.

    Ka lubuidun dimurei lani úaraguni tariñagubei Rudu? (Rudu 1:16, 17.)

    Ida liña san gayara lan larihín ligiaméme lan lubuidun tisaminan meha Rudu lumoun ligaburi hasaminan “amu mudún” hawagu ha lanúadirubaña Bungiu ya ubouagu? (Huan 10:16; Sak. 8:23.)

  • Aliihabei Rudu 2:1-23.

    Ida liña san tíchugun Rudu aban lubuidun hénpulu houn würiña nibureintiña uguñe weyu? (Rudu 2:17, 18; Ari. 23:22; 31:15.)

  • Aliihabei Rudu 3:5-13.

    Ka san laritagubei Boosu luagu tánharun Rudu tamarieidun luma lubaragiñe hamuga tamarieidun luma aban nibureingili?

    Ka san larufudahabei tigaburi Rudu luagu úaraguni woun? (Rudu 3:10; 1 Ko. 13:4, 5.)

  • Aliihabei Rudu 4:7-17.

    Ida liña san gayara lan háyeihani wügüriña kristiánugu Boosu? (Rudu 4:9, 10; 1 Tim. 3:1, 12, 13; 5:8.)