Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 50: Bián würiña ganigitiña

Abahüdaguni 50: Bián würiña ganigitiña

DAN le hádaragun ísüraelina houngua lidoun turóbuli, aba hagúahan lun Heowá. Lun lóunabuni hafurieidun aba líchugun alidihatiña ha ganigibaña lun híderaguniña. Aguseragüdütiña tagúahan Bíbülia houn, Hosué furumiñetibei, Otoniéli, Eudu luma Samügárü hagía aguseragüdütiña lárigiñe. Añahein giñe würiña íderagua hamutiñu ísüraelina, Débora tuma Haeli híribei.

Débora adimureha luma Barakü

Würi profeta Débora, aguseragüdütu giñe. Ruti Heowá ariñahani tun luagu le lunbei lasuseredun, ábatiha tariñaguni houn gürigia le lariñagubei Heowá. Tábugiñe aban tídibu yaraüwa tañuura lidan fulasu gawübüriti, ábatiha houdin gürigia tumoun lun tíderaguniña aransehei haturóbuli.

Lidan dan ligía Habín lurúeitebei Kanán. Gámati 900 karü lánina wuribu. Wéiriti here lisudaranigu darí lun hafosuruniñu saragu ísüraelina lun heseriwidun lun Habín. Sísara líribei hábuti lisudaranigu Habín.

Luagu aban weyu aba tagúarun Débora lun aguseragüdüti Barakü, tariñaga lun: ‘Anihán lariñagubei Heowá: “Barüba 10.000 wügüriña luagun wübü le Taworu. Ñeinba nanügei Sísara bun. Nederegerubei Sísara hau lisudaranigu búhaburugun.”’

Lariñaga Barakü tun Débora: ‘Nídiba ánhabu ñüdün numa.’ Ñǘdüntu Débora luma, gama lumoun tariñaga lun Barakü: ‘Mámaba bun lichugúa uéiriguni luagu agañeiruni, ladüga túhaburugunba aban hiñaru lederegerei Heowá Sísara.’ Ligíati asuseredubei.

Aba lararirun Barakü luéigiñe wübü Taworu habaroun lisudaranigu Sísara. Sódini, aba ladügün Heowá lun labuinchun fulasu lau duna, gíbetiñu áganiñu añaradagutiñu. Rariti Sísara tídangiñe lugune aba lanurahan.

Barakü, Haeli, luma Sísara

Murusun dan lárigiñe aba lachülürün Sísara tidoun tikianpun Haeli. Aba tamisurahani lun lebelurun, aba tíchugun murusun míligi lun. Ruti le lidabu agu lun, murusun dan lárigiñe aba larumugun. Ábati tanügün Haeli aban pegi tídangiñe kianpu aba tádaraguni lábulugun. Dan le liabin Barakü, aba tarufuduni lun, hilaali lan Sísara! Gúnfuliti le tariñagubei Débora.

Lagumuhóun aba lafarún urúei Habín; aba ñein lan darangilaü hadan ísüraelina luagu fiú dan.

Alidihatiña 2:14-22; 4:1-24; 5:1-31.



Álügüdahani burí

  • Kátaña san aguseragüdütiña, ani ka burí híribei fiú hádangiñe?
  • Ka san fisiu espechaliti tanibei Débora, ani ka tadügübei?
  • Dan le lasiádiruni urúei Habín luma Sísara Ísüraeli, ka san uganu lúmagiñeti Heowá tariñagubei Débora lun aguseragüdüti Barakü, ani ka un lichugúa uéiriguni?
  • Ida liña san tarufuduni Haeli aban tan würi ganigitu?
  • Ka san asuseredubei lárigiñe lounwen urúei Habín?

Lanwoun burí álügüdahani

  • Aliihabei Alidihatiña 2:14-22.

    Ka san uagu lagañida Heowá hama ísüraelina, ani ka wafurendeirubei lídangiñe katei le? (Ali. 2:20; Ari. 3:1, 2; Ese. 18:21-23.)

  • Aliihabei Alidihatiña 4:1-24.

    Ka hafurendeirubei kristiánugu würiña luagu afiñeni luma ganigi lídangiñe hénpulu tani Débora tuma Haeli? (Ali. 4:4, 8, 9, 14, 21, 22; Ari. 31:30; 1 Ko. 16:13.)

  • Aliihabei Alidihatiña 5:1-31.

    Ítara kei Barakü tuma Débora lau uremu lánina agañeiruni, ka lunbei wamuriahani lidan wafurieidun luagu wuribu le lunbei liabin Arümahedón? (Ali. 5:3, 31; 1 Kro. 16:8-10; Aruf. 7:9, 10; 16:16; 19:19-21.)