Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 49: Aba lararamagun Weyu

Abahüdaguni 49: Aba lararamagun Weyu

ARIHABEI Hosué. Ariñagati: ‘Weyu, ráramaba!’ Aba lararamun Weyu. Rédeiti ñein lamidangua sielu luagu aban weyu dayarüti. Adügati Heowá lun lasuseredun! Ariha waméi ka lan uagu labusenrei Hosué katei le.

Weyu

Dan le hatatirun seingü urúeigu kananna ageindagua luma Gabaón, aba hóunahan gabaónna aban wügüri lun lamuriahan ídemuei luma Hosué. ‘Ñǘbuinba furese woun!’ liña. ‘Sefubáwa! Sun urúeigu ha áraabubaña óundaraguaaña lun hageindagun wama.’

Ábati lidin Hosué hama sun luwügüriña. Aba hamarücharun sun áriebu. Hachülürünbei Gabaón, aba halouchun hasúdaranigu seingü urúeigu ábati hanurahan. Aba láhuyagüdün Heowá óunwenbu burí dübü lánina huya dereguati siélugiñe, gíbetimatiña súdaragu óunwegutiña ladüga huya dereguati sügǘ hau ha háfaragubaña luwügüriña Hosué.

Hosué

Gayarati larihin Hosué luagu lálüdagua lan Weyu. Laburigada, ani saragu hádangiñe áganiñu hanurahaba. Ligíati lafurieidunbei Hosué lun Heowá aba lariñagun: ‘Weyu, ráramaba!’ Dan le lasigirun Weyu adurangua, gayarati lásurun hagañeiruni ísüraelina wuribu.

Añahein giñe amu urúeigu wuribatiña Kanán iyereegutiña lumutuniña Bungiu houn. Barüti kéiburi sisi irumu lun Hosué hama lisudaranigu hagañeiruniña 31 urúeigu. Lárigiñe ladügüni Hosué katei le, afanreinha lumuti ageiraü hadan türibu ha mégeibaña múa.

Sügüti saragu irumu, aba lounwen Hosué dan le 110 lubéi irumu lau. Dan le wínwangili Hosué hama lumadagu, gaganbaditiña gürigia lun Heowá. Ani dan le hóunwegun, aba hadügüni gürigia le wuribabei ani dáguatiña houngua lidoun turóbuli. Guentoti mégeitiña ídemuei lúmagiñe Bungiu.

Hosué 10:6-15; 12:7-24; 14:1-5; Alidihatiña 2:8-13.



Álügüdahani burí

  • Ka san lariñagubei Hosué lidan dibuhu, ani ka uagu?
  • Ida liña san líderaguni Heowá Hosué hama luwügüriña?
  • Átiriñanu urúeigu áganiñu lagañeirun Hosué, ani lidan átiri dan?
  • Ka uagu lafanreinhei Hosué lumúan Kanán?
  • Átiri san irumu lau Hosué dan le lounwen, ani ka asuseredubei houn gürigia lárigiñe?

Lanwoun burí álügüdahani

  • Aliihabei Hosué 10:6-15.

    Ka emenigini líchugubei woun dan le wasubudiruni luagu lararamaguagüdüni Heowá Weyu luma Hati ladüga Ísüraeli? (Hos. 10:8, 10, 12, 13; Sal. 18:3; Ari. 18:10.)

  • Aliihabei Hosué 12:7-24.

    Ka agañeirubalin wuribu hama 31 urúeigu kananna, kati uagu súdini lubéi woun uguñe weyu? (Hos. 12:7; 24:11-13; 2 Lur. 31:8; Luk. 21:9, 25-28.)

  • Aliihabei Hosué 14:1-5.

    Ida liña san lafanreinhóun fulasu hadan türibu lani Ísüraeli, ani ka mini lubéi luagu alagan lídanme Paraísu? (Hos. 14:2; Isa. 65:21; Ese. 47:21-23; 1 Ko. 14:33.)

  • Aliihabei Alidihatiña 2:8-13.

    Kei Hosué lidan binadu Ísüraeli, kátaña íchugubaña furenu kóntüra apostasía uguñe weyu? (Ali. 2:8, 10, 11; Mat. 24:45-47; 2 Tesa. 2:3-6; Titu 1:7-9; Aruf. 1:1; 2:1, 2.)