Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 46: Lubarieirun burí Herikó

Abahüdaguni 46: Lubarieirun burí Herikó

KA ADÜGÜBEI lun lábürühan lubarieirun Herikó? Kamá hamuga heiguarügütu aban óunwenbu bomba luagun. Ani, lidan dan ligía úagiruha bomba ni burí galún. Ábaya milaguru lani Heowá le! Ariha waméi ida liña lan lasuseredun.

Lábürühaña lubarieirun Herikó

Aganbabei le lariñagubei Heowá lun Hosué: ‘Buguya hama bisudaranigu amarüchara humá geyegu lau uburugu. Adüga humá aban geyeguaü lau uburugu sagü weyu luagu sisi weyu. Barǘ humóun lubagüsina daradu. Mosu houdin sedü fádirigu tubá tubá íñaaheina hafidun.

‘Lidanme lisedün weyu ábame hamarücharun geyegu lau uburugu sedü wéiyaasu. Ábameti hadügün aban ínwiruni le migifeti lau hifidun, adüga huguyame aban agúaraguni le lánina wuribu. Ábame lábürühan baríeiru!’

Hosué hau sun ísüraelina adüga hamuti le lariñagubei Heowá. Dan le añaha lan amarüchara, maní haña súngubei. Tínwiñahanrügüñein fidu to lautu liganchun mudún aganbua luma hagudi amarücharutiñu. Aba funa hanufudedagun áganiñu ha Herikóbaña. Ariha bumuti gúrudu funati le adibihabei luagu aban funedera? Ka san ufunederan lira? Anha, adüga tumuti Raabü le hariñagubei biama aríaahatiña tun. Añahein sun tiduheñu tuma múnada, agaradaha.

Hosué

Lagumuhóun, lidan lisedün weyu, lárigiñe hamarücharun sedü wéiyaasu geyegu lau uburugu, aba línwirun fidu, wagua hagía súdaragu, aba lábürühan baríeiru. Aba lariñagun Hosué: ‘Áfaragua humaña gürigia hilagubei guda huméime uburugu lau sun lila, ménosu pülata, golu, buronse luma gürabu, ladüga lunti tirisin tabernákulu.’

Aba lariñagun Hosué houn biama aríaahatiña: ‘Sagá humóun Raabü túbiñegiñe hau sun tiduheñu.’ Sefutiñu súngubei, kei aubei füramase hamani aríaahatiña.

Hosué 6:1-25.



Álügüdahani burí

  • Ka lariñagubei Heowá lun hadügüni súdaragu hama fádirigu luagu sisi weyu?
  • Ka lunbei hadügüni wügüriña lidan lisedün weyu?
  • Kei larihín lidan dibuhu, ka asuseredubei lun lubarieirun Herikó?
  • Ka uagu anihein lubéi aban gúrudu dibiñu luagu aban funedera?
  • Ka lariñagubei Hosué lun hadügüni súdaragu hau gürigia luma lau uburugu, ani ka lunbei hadügüni lau pülata, golu, buronse luma gürabu?
  • Ka ariñawagubei houn biama aríaahatiña fulasu lun hadügüni?

Lanwoun burí álügüdahani

  • Aliihabei Hosué 6:1-25.

    Ka idan genegegua lan amarücharuni le hadügübei ísüraelina geyegu lau Herikó lidan lisedün weyu, luma apurichihani le hadügübei gefentiñu luagu Heowá lidan lagumuhóun burí weyu le? (Hos. 6:15, 16; Isa. 60:22; Mat. 24:14; 1 Ko. 9:16.)

    Ida liña lagunfulirun dimurei lúmagiñeti Bungiu le abürüdübei lidan Hosué 6:26 seingü-san irumu lárigiñe, ani ka larufudahabei le woun luagu lererun Heowá? (1 Uru. 16:34; Isa. 55:11.)