Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 43: Ladügǘn Hosué alidihatime

Abahüdaguni 43: Ladügǘn Hosué alidihatime

BUSENTI Moisesi lebelurun hama ísüraelina lidoun ageiraü Kanán. Ligía lariñagunbei: ‘Heowá, ígirabana lun nánhiñuraguni duna Hordán, ariha náamugei lubuidun múa.’ Gama lumoun aba lariñagun Heowá: ‘Hebé! Hebé badimurehan luagu katei le!’ Subuditi bun ka lan uagu lariñagei Heowá le?

Ladüga le asuseredubei dan le lagayuahanbei Moisesi luagu dübü. Haritaguabá: Ligía luma Aarón míchuguntiña inebesei lun Heowá. Mariñaguntiña houn gürigia luagu Heowá lan asagarubei duna lídangiñe dübü. Ligía lariñagunbei Heowá mígirun lubaña lan lun hebelurun lidoun fulasu le gíribei Kanán.

Ítara liña, fiú hati lárigiñe lounwen Aarón, aba lariñagun Heowá lun Moisesi: ‘Barübei Hosué ligibugiñoun Eleasárü le fádiri luma hagibugiñoun lílana fulasu. Ñein hagibugiñe súngubei, ábame bariñagun houn luagu Hosuéhali lan iseri alidihati.’ Adügati Moisesi kei aubei lariñaga Heowá lun, kei barihini lidan dibuhu.

Moisesi anúadirei Hosué lun alidihatime

Ábati lariñagun Heowá lun Hosué: ‘Herebá, manufude buguyame. Buguyaba adundehaña ísüraelina ábame bebelaagüdüniña lidoun ageiraü Kanán le füramase naalibei houn, ñeinbadina buma.’ Lárigiñe aba lariñagun Heowá lun Moisesi lun lawarirun lidoun fulasu le íñutimabei ligibuagu wübü Nebu le lumúanrugubei Moabü. Lúmagiñe ñéingiñe gayarati larihin Moisesi chülǘ lóugiñe duna Hordán lun larihini lubuidun fulasu Kanán. Aba lariñagun Heowá: ‘Nihán fulasu le füramase nubéi houn lirahüñü Abüraámü, Isaakü luma Hakobu níchugubei lan houn. Ígira naadibu lun barihini, gama lumoun mígirun nubadibu bebelurun ñeinhin.’

Lárigiñe aba lariñagun Heowá lun Moisesi lun lawarirun lidoun fulasu le íñutimabei ligibuagu wübü Nebu le lumúanrugubei Moabü. Lúmagiñe ñéingiñe gayarati larihin Moisesi chülǘ lóugiñe duna Hordán lun larihini lubuidun fulasu Kanán. Aba lariñagun Heowá: ‘Nihán fulasu le füramase nubéi houn lirahüñü Abüraámü, Isaakü luma Hakobu níchugubei lan houn. Ígira naadibu lun barihini, gama lumoun mígirun nubadibu bebelurun ñeinhin.’

Ñein ligibuagu wübü Nebu lounwe Moisesi. Dan ligía 120 irumu lau. Heregili meha ani buídugili giñe larihin. Sanditiñu lílana ageiraü aban lanarime íruni ani ayahuaha hamuti Moisesi saragu. Gama lumoun gúndaatiñu lau nihán lan Hosué hama guentó keisi iseri alidihati.

1 Lúrudu 27:12-23; 2 Lúrudu 3:23-29; 31:1-8, 14-23; 32:45-52; 34:1-12.



Álügüdahani burí

  • Kátaña san biama wügüriña ha lúmabaña Moisesi lidan dibuhu?
  • Ka lariñagubei Heowá lun Hosué?
  • Ka uagu lawarira Moisesi ligibuagun wübü Nebu, ani ka lariñagubei Heowá lun?
  • Átiri irumu lau Moisesi dan le lóunwenbei?
  • Ka uagu híruda lílana fulasu, ani ka uagu gayara lubéi hagundaarun?

Lanwoun burí álügüdahani

  • Aliihabei 1 Lúrudu 27:12-23.

    Ka wadagimanu súdiniti líchugubei Heowá lun Hosué, ani ida liña larihín luagu samina lan Heowá luagu habuidun lumutuniña uguñe weyu? (1 Lur. 27:15-19; Adü. 20:28; Ebü. 13:7.)

  • Aliihabei 2 Lúrudu 3:23-29.

    Ka uagu mígirun lubéi Heowá lun lebelurun Moisesi luma Aarón lidoun Fulasu Füramasewati, ani ka leksióun wafurendeirubei lídangiñe? (2 Lur. 3:25-27; 1 Lur. 20:12, 13.)

  • Aliihabei 2 Lúrudu 31:1-8, 14-23.

    Ida liña larufuduni Moisesi lidan lagumuhóun burí dimurei le lariñagubei houn ísüraelina luagu resibi lani abeichúni lúmagiñe Heowá lau ǘnabuguni? (2 Lur. 31:6-8, 23.)

  • Aliihabei 2 Lúrudu 32:45-52.

    Ka efekütu lunbei gani tani Lererun Bungiu lidan wabagari? (2 Lur. 32:47; Fad. 18:5; Ebü. 4:12.)

  • Aliihabei 2 Lúrudu 34:1-12.

    Íbini marihin lani Moisesi Heowá, ka lariñagubei 2 Lúrudu 34:10 luagu lumadagua luma Heowá? (Afu. 33:11, 20; 1 Lur. 12:8.)