Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 41: Hewe lautu buronse

Abahüdaguni 41: Hewe lautu buronse
Moisesi tuma hewe lautu buronse

INARÜNITU san hewe to luaguboun wewe le? Uá, mama inarünitu. Lau buronse tadügǘwa. Aba lariñagun Heowá lun Moisesi lun liñurunu luagu wewe le, lun gayara lan harihinu gürigia lun hasigirun awínwanda. Anati hewe ha múarugubaña, inarünitiñu. Gürǘ hamutiñu hewe hagía gürigia sándigüda hamaña. Subuditi bun ka lan uagu?

Ladüga hadimurehan wuriba luagu Bungiu luma luagu Moisesi. Aba hekeherun: ‘Kame san basagarawa Ehiptugiñe lun wóunwegun lidan fulasu mageirawati le? Úati éigini ni duna ya. Buchá wawagu eiga maná.’

Gama lumoun aban éigini buitu maná. Ru lumutu Heowá houn lau aban milaguru. Lau giñe aban milaguru líchiga duna houn. Ani meteingirun hamuti gürigia Bungiu luagu lóunigiruniña. Ligía lóunahanbaliñu Heowá hewe péisinitiña ha keisi aban abeichúni houn ísüraelina. Aba hágürüniña hewe, saragu hádangiñe hilatiñu.

Tágüürüñanu hewe ísüraelina

Ligíaliti hayabin gürigia lumoun Moisesi hariñaga: ‘Afigouhaadiwa, ladüga wadimurehan wuriba luagu Heowá luma buagu. Afurieidabá lun Heowá guentó lun lagidaruniña hewe ha.’

Ábati lafurieidun Moisesi hawagu. Aba lariñagun Heowá lun, lun ladügünu hewe lautu buronse to, lun líchugunu luagu aban wewe, lun sun lan ha tágürün hewe ábame harihin tuagun. Aba ladügün Moisesi kei aubei lariñagei Bungiu. Ha tágürübaña hewe aba harihin tuagun hewe lautu buronse aba hareidagun.

Lídangiñe le gayarati wafurendeirun aban leksióun. Súngubei wagía ítara waña kei ísüraelina ha hagüürübaña hewe. Arihabá, sun gürigia wéiyatiña, sánditiña ani hilatiña giñe. Sun le ladüga ladisedun furumiñeti wügüri tuma furumiñetu würi, Adán tuma Ewa luéi Heowá, ani súngubei wagía hasaanigu. Gama lumoun aba ladararun Heowá aban üma lun wawinwandun lun súnwandan.

Óunaha lumuti Heowá Hesukrístu le liráü Ubouagun. Dibigüdawati Hesusu luagu aban wagabu, ladüga samina hamá bandi gürigia luagu wuriba lan. Gama lumoun ru lumuti Heowá Hesusu lun lasalbaruniwa. Ánhawa ariha luagun, sigi waméime, gayarabei weresibirun ibagari magumuchaditi. Gama lumoun wafurendeirubame luagu le.

1 Lúrudu 21:4-9; Huan 3:14 (RVA), 15.



Álügüdahani burí

  • Katoun san gouguboun luagu wagabu le lídanbei dibuhu, ani ka uagu lariñaga Heowá lun Moisesi lun líchugunu ñein?
  • Ida liña harufuduni gürigia mateingiradi hamá luagu le ladügübei Bungiu hawagu?
  • Ka hamuriahabei gürigia luma Moisesi dan le lóunahanbei Heowá hewe péisinitiña hawagu lun labeichuniña?
  • Ka uagu lariñaga Heowá lun Moisesi lun ladügün aban hewe lautu buronse?
  • Ka leksióun larufudahabei abahüdaguni le woun?

Lanwoun burí álügüdahani

  • Aliihabei 1 Lúrudu 21:4-9.

    Ka eweridihani wadarirubei lidan hekeharun ísüraelina luagu sun katei buiti le líchugubei Heowá houn? (1 Lur. 21:5, 6; Rom. 2:4.)

    Lidan burí sígulu lárigiñe dan ligía, ida liña hayusurunu ísüraelina hewe lautu buronse, ani ka ladügübei urúei Esekíasi? (1 Lur. 21:9; 2 Uru. 18:1-4.)

  • Aliihabei Huan 3:14 15, RVA.

    Ida liña larufuduni tichugún hewe lautu buronse luagu aban wagabu le adügǘbei lun Hesusu saragu dan lárigiñe? (Gal. 3:13; 1 Fe. 2:24.)