Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 36: Bágasu lauti golu

Abahüdaguni 36: Bágasu lauti golu

AÜ! KA san hadügübei gürigia ha guentó? Hafurieiduña lun aban bágasu! Ka san uagu hadügüñein lubéi katei le?

Dan le lerederun Moisesi saragu dan luagu wübü, aba hariñagun gürigia: ‘Ibidiñeti woun ka lan asuseredubei lun Moisesi. Wadüga aban bungiu lun lasagaruniwa lídangiñe fulasu le.’

Láhuchuruni Moisesi bián dübü

‘Buiti,’ liña Aarón le líbiri Moisesi. ‘Gidá humóun harigeila to golu, ábame hanügünu nun.’ Dan le hadügüni gürigia, aba larürüdaguagüdünu aba ladügün aban bágasu lau golu ligía. Ábati hariñagun sun gürigia: ‘Anihán wabungiute, le asagarubaliwa Ehiptugiñe!’ Lárigiñe, aba hadügün aban óunwenbu fedu ábati adorarü hamani bágasu lauti golu.

Dan le larihinbalin Heowá katei le, aba lagañidun. Aba lariñagun lun Moisesi: ‘Óufudaba rariba. Wéiriti luriban hóuserun gürigia. Bulíei hamá burí nilurudun ani háhuduraguña lun bágasu lauti golu.’

Háhuduraguña gürigia lun bágasu lauti golu

Aba lararirun Moisesi furese luéigiñe wübü. Dan le layarafadunbei, haremuhaña gürigia ani habinahaña geyegu lau bágasu! Wéiriti ligañi Moisesi darí lun láhuchuruni biama dübü fadati le laubéi lúrudu, aba lañaünrüdagun. Aba larürüdaguagüdüni bágasu, aba ladügüni kalikime.

Adügaaña gürigia aban katei wéiriti luriban. Aba lariñagun Moisesi houn fiú wügüriña lun hárügüdünu hefeinte. ‘Wuribatiñu ha adorarübalin bágasu mosu hounwen,’ liña. Áfaragua hamutiñu 3.000 gürigia! Arufudati le mosu lan góunigi wamá lunrügü lan Heowá wáhuduragua, mama houn búngiugu mama inarünitiñu.

Áfuriduni 32:1-35.



Álügüdahani burí

  • Ka san hadügübei gürigia lidan dibuhu, ani ka uagu?
  • Ka uagu lágañida Heowá, ani ka ladügübei Moisesi dan le larihini le hadügübei gürigia?
  • Ka san lariñagubei Moisesi houn fiú wügüriña lun hadügüni?
  • Ka san arufudahani wafurendeirubei lidan abahüdaguni le?

Lanwoun burí álügüdahani

  • Aliihabei Áfuriduni 32:1-35.

    Ida liña san larufuduni abahüdaguni le ka lan lasaminarubei Heowá luagu lamigisirun relihíon le iyeeniti luma relihíon le inarüniti? (Afu. 32:4-6, 10; 1 Ko. 10:7, 11.)

    Ka san duari lunbei gani hamani kristiánugu dan le hanúadahan isebáhari, kéiburi uremu o abinahani? (Afu. 32:18, 19; Efe. 5:15, 16; 1 Huan 2:15-17.)

    Ida liña san líchugun lani Lewí türibu aban hénpulu buiti dan le hanúadiruni lóubadina irichaü? (Afu. 32:25-28; Sal. 18:25.)