Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 33: Ánhiñuraguei barana Funati

Abahüdaguni 33: Ánhiñuraguei barana Funati

ARIHABEI le asuseredubei! Moisesi lira iñurei luenwen lóugiñe barana Funati. Ha Chóurubaña úara luma luagu le aban oubaü ísüraelina. Ánheinti urúei Ehiptuna hama lisudaranigu hañaradaguña. Ariha waméi ida liña lan lasuseredun katei le.

Lisudaranigu Ehiptu añaradagua

Lubaragiñe háfuridun, amuriahatiña daüguaü hámagiñe ehiptuna luma burí katei le lauti golu luma pülata. Wéiriti hanufude ehiptuna, ladüga lagumuhóun íñanaü le ñǘbuinbei hawagun. Ligía híchugunbalin houn ísüraelina sun le hamuriahabei.

Kei aubei wafunrendeira, lárigiñe lidiisin íñanaü aba lariñagun urúei Ehiptuna houn ísüraelina lun háfuridun Ehiptugiñe. Furitiña 600.000 wügüriña ísüraelina, ítara kei saragu würiña hama irahüñü. Furitiña giñe saragu amu gürigia ha afiñehaña luagu Heowá. Súngubei barǘ hamutiñu halügüniña mudún hama gábara dan le háfuridunbei Ehiptugiñe.

Fiú weyu lárigiñe aba hachülürün ísüraelina lubadun barana Funati. Ñein hemeraagua. Ábati latatirun urúei Ehiptuna hama luwügüriña asaküriha ladüga lígiruniña ísüraelina lun houdin. Aba hariñagun ‘Ígira wamá wadamun lun houdin!’

Ábaya lasansiragun lisaminan urúei. Furesegueina aba laranserunu likarün to lánina wuribu hama lisudaranigu. Ábati lidin hárigi ísüraelina tau 600 karü espechalitu, ítara kei sun tíbiri karü to Ehiptuboun.

Dan le harihini ísüraelina liabin urúei hama lisudaranigu, aba hanufudedun saragu. Siñati hanurahan. Nihán barana Funati luéigiñe aban oubaü, añatén ehiptuna luéigiñe le aban oubaü. Gama lumoun aba líchugun Heowá aban dúeri habadinagua lumutuniña hama ehiptuna. Ligía hasiñarunbaliña ehiptuna ísüraelina ariha lun hadügün dañu houn.

Guentó aba lariñagun Heowá lun Moisesi lun liñuruni luenwen luagun barana Funati. Dan le ladügünbalin, aba lóunahan Heowá aban garabali héreti luéigiñe oubaü le ñéingiñe lubéi laboucha weyu. Aba lafareinragun lidunari barana lidan bián oubaü.

Ábati hagumeserun ísüraelina éibuga lamidanguagiñe barana ligibuagu sagoun mábeiti. Mégeiwati meha saragu oura lun hásügürün míñunu gürigia hagía hau sun habiñanigu luagun le aban oubaü. Lagumuhóun ábaya gayara lan harihiniñu ehiptuna, aba hebelurun hárigi baranahoun.

Dan le hebelurunbei hárigi, aba ladügün Bungiu lun léiguahan tubalabala hakarün. Aba hasustaragun ehiptuna saragu aba hagumeserun agúaraha: ‘Lageindaguña Bungiu wama haweigiñe ísüraelina. Keimoun yáagiñe!’ Ani létihali houn.

Dan beluhaña sun súdara baranahoun aba lariñagun Heowá lun Moisesi lun liñuruni luenwen luagun barana, kei barihini lidan dibuhu. Ábati ladouragun barana lárigoun hawagun ehiptuna tau sun hakarün úati ni aban áfuriduti lau ibagari!

Ma lanarime hagundan lumutuniña Bungiu luagu hesefurun! Aba heremuhan wügüriña aban uremu lánina seremei lun Heowá, hariñaga: ‘Gañeinhali Bungiu aban agañeiruni wéiriguti. Chagá laaña gabayu baranahoun hau sun ha agalufehabaliña.’ María to litu Moisesi, aba tasagarun aban panderu, aba houdin híbiri würiña tárigi tárigi lau hapanderun. Aba habinahan, eremuheina hagía: ‘Gañeinhali Bungiu aban agañeiruni wéiriguti. Buluguda laaña gabayu hau sun agalufehatiñu baranahoun.’

Áfuriduni, kapítulu 12 darí 15.



Álügüdahani burí

  • Átiriñanu wügüriña ísüraelina, úara hama würiña hama irahüñü, áfuridutiñu Ehiptugiñe, ani kátaña áfuridubaña hama?
  • Ida liña lasandiragun Faraón lungua lárigiñe lígiruniñu ísüraelina lun háfuridun, ani ka ladügübei?
  • Ka ladügübei Heowá lun lásiñarun hadügün ehiptuna dañu houn lumutuniña?
  • Ka asuseredubei dan le liñurunbalin Moisesi luenwen luagun barana Funati, ani ka hadügübei ísüraelina?
  • Ka asuseredubei dan le hebelurunbei ehiptuna baranahoun lun houdin hárigi ísüraelina?
  • Ida liña harufuduni ísüraelina luagu gunda hamá ani geteingiradi hagía luagu lesefuruniña Heowá?

Lanwoun burí álügüdahani

  • Aliihabei Áfuriduni 12:33-36.

    Ida liña ladügün Heowá lun hibihini lumutuniña hafayeiruaha luagu sun irumu burí le hamudirawagunbei Ehiptu? (Afu. :21, 22; 12:35, 36.)

  • Aliihabei Áfuriduni 14:1-31.

    Ka efekütu lanibei dimurei le lariñagubei Moisesi lidan Áfuriduni 14:13, 14 hawagu lubueingu Heowá uguñe weyu lau anite lan wuribu le Arümahedón? (2 Kro. 20:17; Sal. 91:8.)

  • Aliihabei Áfuriduni 15:1-8, 20, 21.

    Ka uagu mosu lubéi halawahani lumutuniña Heowá lau uremu? (Afu. 15:1, 2; Sal. 105:2, 3; Aruf. 15:3, 4.)

    Ka hénpulu lánina alawahani lun Heowá tíchugubei María hama ha híbiri würiña laru barana Funati houn Kristiánugu uguñe weyu? (Afu. 15:20, 21; Sal. 68:11.)