Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 31: Ligibugiñe Faraón

Abahüdaguni 31: Ligibugiñe Faraón

DAN le lagiribudunbei Moisesi Ehiptun, aba labahüdagun lun Aarón le líbugaña luagu milaguru burí ligía. Dan le larufudunbalin Moisesi luma Aarón milaguru houn ísüraelina, aba hafiñerun súngubei luagu anihein lan Heowá hama.

Ábati lidin Moisesi luma Aarón arihei Faraón le lurúeite Ehiptu. Aba hariñagun lun: ‘Lariñahare Bungiu le Lubungiute Ísüraeli: “Ígiragüdabaña numutuniña luagu ǘrüwa weyu, lun háhuduragun nun lidan fulasu mageirawati.”’ Ábati lariñagun Faraón: ‘Mafiñetina luagu Heowá. Mígirun nubaña giñe ísüraelina lun houdin.’

Gañiñein urúei Ehiptuna, ladüga busén hamá ísüraelina hasagarun dan lídangiñe hawadigimari lun háhuduragun lun Heowá. Ligía ladügünbei lun deretima lan hawadigimaridun. Aba híchuguni ísüraelina duru luagun Moisesi luagu hóuseruniwa wuriba, ábati lírudun Moisesi. Gama lumoun aba lariñagun Heowá lun lun madiheridun lan. ‘Nadügüba lun lígiragüdüniña urúei Ehiptuna numutuniña,’ liña lun.

Moisesi luma Aarón ligibugiñe Faraón

Ábaya lidin Moisesi luma Aarón arihei urúei Ehiptuna. Guentó adügatiñu aban milaguru. Aba láguruni Aarón luenwen múarugun, aba lasaliragun ábame hewe wéiritu. Gama lumoun fuí hamuti giñe chu tau ha lánigu Faraón hawewen múarugun, aba lasaliragun héweme. Ani arihabá! hewe to lani Aarón téigiñanu hewe ha hani chu tau. Mahagili Faraón lígiruniñu ísüraelina lun houdin.

Ligía líchugunbei Heowá aban leksióun lun Faraón. Subuditi bun ida liña lan ladügüni? Aba ladügün lun liabin diisi íñanaü, o turóbuli Ehiptun.

Lárigiñe bandi lídangiñe íñanaü burí ligía, abaha lagúarun Faraón lun Moisesi lariñaga tiha lun: ‘Redeibei íñanaü ábame nígiruniñu ísüraelina lun houdin.’ Gama lumoun danha le lararamagun íñanaü, mahali lígiruniña lun houdin, darí lárigiñe lidiisin íñanaü ligiali lígiruniña lun houdin.

Subudi bumuti san kada aban lídangiñe diisi íñanaü ligía? Furendei wama luagu katei burí le.

Áfuriduni 4:27-31; 5:1-23; 6:1-13, 26-30; 7:1-13.



Álügüdahani burí

  • Ka efekütu lánibei hawagu ísüraelina milaguru burí le ladügübei Moisesi luma Aarón?
  • Ka hariñagubei Moisesi luma Aarón lun urúei Ehiptuna, ani ka lóunabagülebei urúei houn?
  • Kei larihín lidan dibuhu, ka asuseredubei dan le lágurunbalin Aarón luenwen múarugun?
  • Ka leksióun líchugubei Heowá lun urúei Ehiptuna ani ida liña lóunabun urúei?
  • Ka asuseredubei lárigiñe lidiisin íñanaü?

Lanwoun burí álügüdahani

  • Aliihabei Áfuriduni 4:27-31 luma 5:1-23.

    Ka labuseerubei urúei Ehiptuna lariñagun lau dimurei: “Ibidiñeti Heowá nun”? (Afu. 5:2, RVA; 1 Sam. 2:12; Rom. 1:21.)

  • Aliihabei Áfuriduni 6:1-13, 26-30.

    Ida liña masubudiraguagüdüngili lan Heowá lungua lun Abüraámü, Isaakü luma Hakobu? (Afu. 3:13, 14; 6:3; Agu. 12:8.)

    Ka wasandirubei dan le wasubudiruni luagu yusu lani Heowá Moisesi, íbini masandiragun lan lungua lau ubafu lun ladügüni dasi le ichugúbei lun? (Afu. 6:12, 30; Luk. 21:13-15.)

  • Aliihabei Áfuriduni 7:1-13.

    Dan le lanügünbalin Moisesi luma Aarón uganu lánina laguseragüdün Heowá lun urúei Ehiptuna lau ganigi, ka hénpulu híchugubei houn lubúeingu Bungiu uguñe weyu? (Afu. 7:2, 3, 6; Adü. 4:29-31.)

    Ida liña larufuduni Heowá luéirigun hawéi búngiugu ehiptuna? (Afu. 7:12; 1 Kro. 29:12.)