Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 29: Ka uagu lanuraha Moisesi

Abahüdaguni 29: Ka uagu lanuraha Moisesi

ARIHABEI Moisesi; lanurahaña Ehiptugiñe. Ariha bumutiña ha éibaahabalin? Subuditi san bun ka lan uagu habusenra háfaruni Moisesi hilagubei? Ariha waméi ka lan uagu.

Lanurahaña Moisesi Ehiptugiñe

Lúbiñe Faraón, le urúei Ehiptuna laweirida Moisesi. Aba lachuudun lau ani gabafu ligía. Subuditi meha lun Moisesi mama lan ehiptuna ligía, ani idamuni lan ísüraelina lagübürigubaña.

Aban weyu, dan le bián-wéinhali irumu lau Moisesi, aba desidírü lan lidin ariha ida liña lan lidin houn lirasan. Aba larihin aban ehiptuna abuleseira aban idamuni ísüraelina. Aba ladigiragun Moisesi ariha anhein añahein lubéi arihiti, kei marihin lubéi ni aban gürigia, aba láfaruni ehiptuna ligía hilagubei aba lábununi.

Larugan ábaya lidin Moisesi arihaña lirasan. Haritaguati yebe gayara lan líderaguniña lun mamudirawagun hamá. Gama lumoun aba larihin biama ísüraelina ageindagua hámagua, aba lariñagun lun le gadurunbei: ‘Ka uagu bagayuaha luagu bíbiri?’

Aba lariñagun wügüri ligía: ‘Ka íchugubalibu ábutime ani aguseragüdüti wadan? Báfaradina hilagubei kei badüga lun ehiptuna ligira?’

Aba lanufudedagun Moisesi guentó. Subuditi lun luagu subudi waali lan le ladügübei lun ehiptuna ligía. Íbini Faraón aganba laali, aba lóunahan wügüriña lun háfaruni Moisesi hilagubei. Ligía mosu lubéi lanurahan Ehiptugiñe.

Dan le láfuridunbei Moisesi Ehiptugiñe, aba lidin dise lidoun fulasu le gíribei Madián. Ñein lasubudiraña lufamilia Heturó aba lamarieidun tuma aban hádangiñe lirahüñü to gíriboun Séfora. Aba lafurendeiruni Moisesi hóunigirun mudún ábati latenirun houn lilügüniña Heturó mudún. Bián-wein irumu lau Moisesi awinwanda Madián, guentó 80 irumu lau. Aban weyu, dan le leteniruña lan Moisesi houn lilügüniña Heturó mudún, aba lasuseredun aban katei le aweiridagüdübalun lanigi ani sansi lumuti libagari. Ariha waméi lubuidun katei le.

Áfuriduni 2:11-25; Adügaü 7:22-29.



Álügüdahani burí

  • Halía laweirida Moisesi, ani ka meha lasubudirubei hawagu lagübürigu?
  • Ka ladügübei Moisesi dan le bián-wéinhali irumu lau?
  • Ka lariñagubei Moisesi lun aban ísüraelina le abuleseirubei aban ísüraelina líledi, ani ida liña lóunabun wügüri ligía?
  • Ka uagu lanuraha Moisesi Ehiptugiñe?
  • Haliñoun lanuraha Moisesi, ani ka lasubudirubaña ñein?
  • Ka ladügübei Moisesi lidan bián-wein irumu le asigirubei?

Lanwoun burí álügüdahani

  • Aliihabei Áfuriduni 2:11-25.

    Íbini lárigi irumu burí lánina furendei Ehiptu, ida liña larufudun Moisesi úaraguni lun Heowá luma houn lumutuniña? (Afu. 2:11, 12; Ebü. 11:24.)

  • Aliihabei Adügaü 7:22-29.

    Ka leksióun gayarabei wafunrendeiruni lídangiñe lálugun Moisesi lalíbureruniña ísüraelina lídangiñe amudirawaguni Ehiptu lau lubafu guánarügü? (Adü. 7:23-25; 1 Fe. 5:6, 10.)