Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 27: Aban urúei wuribati Ehiptu

Abahüdaguni 27: Aban urúei wuribati Ehiptu

WÜGÜRIÑA ha, hafosuruñanu gürigia lun hawadigimaridun. Arihabei le abeichubani aban nadagimeinti hádangiñeti lufamilia Hakobu. Ísüraelina lagúahoun houn. Ehiptuna afosurabaliñu ísüraelina lun hawadigimaridun ladüga hidamunñanu lan. Ida liña lasuseredun le?

Hafosuruñanu Ehiptuna ísüraelina lun hawadigimaridun

Wínwantiñu meha óunwenbu lufamilia Hakobu saragu irumu lidan darangilaü Ehiptu. Kei Hosé lan meha wügüri le wéirigutimabei ñein lárigiñe Faraón le urúei, tóunigi lumutiñu. Lárigiñe lounwen Hosé aba larúeihan aban iseri Faraón Ehiptu. Mínsiñetiñu meha ísüraelina lun.

Aba lubeiti lamudiraguniña Faraón wuribati le, ísüraelina. Aba líchugun wügüriña wuribatiñu ani furundetiñu hábutigume. Fosu hamutiñu ísüraelina lun hawadigimaridun ábunagua burí uburugu lun Faraón. Gama lumoun aba hasigirun ísüraelina aganwounda. Aba hanufudedun ehiptuna luéi hagibedagun ísüraelina here hagíame.

Hafosuruñanu Ehiptuna ísüraelina lun hawadigimaridun

Subuditi bun ka lan ladügübei Faraón? Aba ladimurehan houn würiña ha íderagubaniña úguchurunu ísüraelina dan le hágurahan, aba lariñagun: ‘Mosu háfaruni hilagubei sun wügüri irahü le nasiruati.’ Buitiña meha würiña ha, ligíati máfaragun habaliñu irahüñü hagía.

Ligíati líchugunbalin Faraón gumadi le houn sun lílana ageiraü: ‘Sun wügüriña irahüñü ísüraelina, áfara humaña hilagubei. Würiñarügübaña irahüñü hígira lun habagaridun.’ Ma hanarimeti luriban gumadi le? Ariha waméi ida liña lan lasalbarun aban wügüri irahü.

Áfuriduni 1:6-22.



Álügüdahani burí

  • Katei san wügüri le lídanbei dibuhu le gámabei abeihagülei, ani katei san le labeichubei?
  • Ka asuseredubei houn ísüraelina lárigiñe lounwen Hosé?
  • Ka uagu hatatira ehiptuna anufudeda hawéi ísüraelina?
  • Ka gumadi líchugubei Faraón houn würiña ha íderagubaliña würiña ísüraelina dan le hágurahan?

Lanwoun burí álügüdahani

  • Aliihabei Áfuriduni 1:6-22.

    Ida liña latatirun Heowá agunfulirei füramasei le ladügübei lun Abüraámü? (Afu. 1:7; Agu. 12:2; Adü. 7:17.)

    Ida liña harufuduni würiña ágüdahatiña ebüréana luagu inebe lan, ani sánduti lan ibagari houn? (Afu. 1:17; Agu. 9:6.)

    Ida liña hafayeiruáha würiña ágüdahatiña ladüga úaragua hamá lun Heowá? (Afu. 1:20, 21; Ari. 19:17.)

    Ida liña yebe lálugun Satanási lagünrinchaguni lisuuni Heowá le füramase láalibei luáguti Ladügawagun Abüraámü? (Afu. 1:22; Mat. 2:16.)