Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 26: Úaraguati Hobu

Abahüdaguni 26: Úaraguati Hobu

MA GUDEMETI sánditi le bun, adián? Hobu líribei, ani würi to lani weiriou. Subuditi san bun ka lan tariñagubei lun Hobu? ‘Íñaraguabei Bungiu hilá báamuga.’ Ariha waméi ka lan funa uagu tariñagei katei le, luma ka lan uagu lanarimebei lasufurirun Hobu.

Hobu lau luriban sandi

Hobu abaha wügüri úaraguati le gaganbaditi lun Heowá. Aganóuti meha lidan fulasu le gíribei Usu, madise luéi Kanán. Wéiriti meha línsiñe Hobu lun Heowá, ani ñeinñein meha somubadi iyereehabuti lun. Subudi bumuti san katei lan?

Satanási le Mafia. Haritaguabá, Satanási ligía ánheli wuribati le iyereehabubei lun Heowá. Adügati lun maganbadi lan Adán tuma Ewa lun Heowá, ani saminatiha gayara lan giñe ladügün lun maganbadi hamá sun híbiri gürigia. Gayara lumuti meha san katei le adüga? Uá. Saminarügübá hawagun saragu gürigia úaraguatiñu ha uagubaña furendeihadiwa lan. Átiriñanu gayara lan bíridun?

Lárigiñe lounwen Hosé luma Hakobu Ehiptu, Hobu ligía gürigia le úaraguatimabei lun Heowá Ubouagu. Busenti meha Heowá lasubudiragüdüni lun Satanási siñá lan ladügün lun haribadun sun gürigia, ani ariñagati lun: ‘Arihabei Hobu. Úaraguati nun.’

‘Úaraguati,’ liña lasigenehan Satanási, ‘ladüga biní bumuti ani gíbeti katei burí buiti luma. Anhein bagidara luéi, líñaragubadibu.’

Ligíati lariñagunbei Heowá lun: ‘Beiba. Gidabei luéi. Adügabei sun burí katei wuribati le babusenrubei lun Hobu. Warihubei ánhana líñaragua. tóunigirügüba máfarunbani hilagubei.’

Furumiñe, adügati Satanási híweruhaniñu fiú wügüriña libiñanigu Hobu hama lilügüniñu kameyu, ani aba háfarawagun lilügüniñu mudún. Áfaragua lumutiñu 10 lirahüñü wügüriña hama würiña lidan aban durumandei. Lárigiñe, ruti luriban sandi luagu Hobu. Hanarimeti lasufurirun Hobu. Ligíati tariñagubei lani weiriou lun: ‘Íñaraguabei Bungiu hilá báamuga.’ Máhati Hobu ladügüni. Ñǘbuintiña giñe, ǘrüwa lumadagu yéetiña ani ariñagatiñu lun luagu wínwanti meha lan aban luriban ibagari. Ánheinti Hobu sigiti lau úaraguni.

Gundaguagüda lumuti katei le Heowá, lárigiñe biní lumuti Hobu, kei barihini lidan dibuhu. Areidaguagüda lumuti lisandi. Garaüyati 10 irahüñü buíduburitiñu, ibihati giñe dóbuli ibiñanigu, mudún hama kameyu luéi le lúmabei furumiñe.

Úaraguabadibu san súnwandan lun Heowá kei Hobu? Anhein ítara biña lubéi, labinirúbadibu giñe Bungiu. Gayarabei bawinwandun lun súnwandan danme ladügǘn lun buidu lan sun Ubóu kei fuluri-agei Edén.

Hobu 1:1-22; 2:1-13; 42:10-17.

Hobu hama lufamilia


Álügüdahani burí

  • Ka meha Hobubei?
  • Ka louchubei Satanási lun ladügün? Ibiha lumuti san?
  • Ka lígirubei Heowá lun ladügün Satanási, ani ka uagu?
  • Ka uagu tariñaga lani Hobu weiriou lun “íñaraguabei Bungiu, hilá báamuga”? (Arihabei dibuhu.)
  • Kei gayara lan barihini lidan libiaman dibuhu, ida liña labiniruni Heowá Hobu, ani ka uagu?
  • Ánhawa úaragua lun Heowá kei Hobu, kaba burí abinirúni weresibira?

Lanwoun burí álügüdahani

  • Aliihabei Hobu 1:1-22.

    Ida luba gayara lan háyeihani kristiánugu Hobu uguñe weyu? (Hobu 1:1; Fili. 2:15; 2 Fe. 3:14.)

  • Aliihabei Hobu 2:1-13.

    Ka biama igaburi ámuñegueinarügüti warihubei lidan lóunabun Hobu tuma lani weiriou, lun léibaahan Satanási? (Hobu 2:9, 10; Ari 19:3; Mik. 7:7; Mal. 3:14.)

  • Aliihabei Hobu 42:10-17.

    Ka idan genegegua lan hafayeiruáha Hobu luma Hesusu ladüga hasigiruni üma le lánina úaraguni? (Hobu 42:12; Fili. 2:9-11.)

    Ida liña líchugun iderebugu woun wasubudirun luagu abinirúni burí le libihubei Hobu ladüga lakipurun úaraguni lun Bungiu? (Hobu 42:10, 12; Ebü. 6:10; Sant. 1:2-4, 12; 5:11.)