Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 25: Háguyun Ehiptun

Abahüdaguni 25: Háguyun Ehiptun

SIÑÁ lárügüdagun Hosé lungua. Aba lariñagun houn sun lumusuniñu lun háfuridun lídangiñe kuartu. Dan le lábuguarügali hama líbirigu, aba latatirun Hosé ayahuaha. Gayarati wasaminaruni lanarime taweiridun hanigi líbirigu, ladüga ibidiñe lan houn ka lan uagu layahuaha. Aba lariñagun houn: ‘Hosé au. Wínwangili san núguchi?’

Hanarimeti taweiridun hanigi líbirigu darí lun siñá lan hadimurehan aba hanufudedun. Aba lariñagun Hosé: ‘Yarafa humá, adüga huméi fulesei ligía nun.’ Dan le hayarafadun, lariñaga: ‘Au Hosé le híbiri, le halugurubei Ehiptun.’

Aba lasigirun Hosé adimureha lau ínsiñehabuni: ‘Míchiga humá duru húniwagua luégiñe halugurunina ñahoun. Le linarün aban katei Bungiu óunahabadina Ehiptun lun lesefurunua habagari gürigia. Ru laadina Faraón kei gumadimati lidan sun ageiraü. Ligíati heiba furese lumoun núguchi ani hariñagame lun, lun liabin awinwanda ya.’

Ábati látuleruni Hosé larüna hawagun líbirigu, aba lóuburuniña ani chuulaña súngubei. Dan le laganbuni Faraón ñübuinhaña lan líbirigu Hosé, aba lariñagun lun Hosé: ‘Barǘ hama kareta hanügeime háguchi hama hafamilia giribu hamaamuga ñahoun. Níchugubei le tima lubuidun-agei múa le Ehiptubei houn.’

Ligíati hadügübei. Gayaraati barihini Hosé abusuragua lun lúguchi dan le lachülürünbei Ehiptun hau sun lufamilia.

Aba meha hagibedagun lufamilia Hakobu. Ñéinñanu 70 dan le háguyunbei Ehiptun, Hakobu, lirahüñü hama libaña. Ñéinñanu giñe hánigu weiriou, ani háfuga ñéinñanu giñe saragu musu. Súngubei hagía aba hatatirun awinwanda Ehiptu. Ísüraelina lagúahoun houn, ladüga sánsigua lumuti Bungiu liri Hakobu lun Ísüraeli. Chülütiña lun aban hamá néchani espechalitiñu lun Bungiu, warihubeime ida luba lan.

Agumesehani 45:1-28; 46:1-27.

Hosé hama lufamilia


Álügüdahani burí

  • Ka asuseredubei dan le lariñaguni Hosé houn líbirigu katei lan?
  • Ka lafuranguagüdübei Hosé houn líbirigu lau ínsiñeni?
  • Ka lariñagubei Faraón dan le laganbun hawagu líbirigu Hosé?
  • Átiriñanu gürigia hadan lufamilia Hakobu dan le háguyunbei Ehiptun?
  • Ida liña meha lagúahoun houn lufamilia Hakobu, ani ka uagu?

Lanwoun burí álügüdahani

  • Aliihabei Agumesehani 45:1-28.

    Ida liña larufudun abahüdaguni luagu Hosé gayara lan ladügün Heowá lun buidu lan resultóu lani aban katei le adügǘti lun lañawarihan houn lubúeingu? (Agu. 45:5-8; Isa. 8:10; Fili. 1:12-14.)

  • Aliihabei Agumesehani 46:1-27.

    Ida liña líchugun Heowá ñuruguaü tun lanigi Hakobu lidan luéiyasun Ehiptun? (Agu. 46:1-4.)