Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 22: Ladaürǘn Hosé

Abahüdaguni 22: Ladaürǘn Hosé

DISEDÜ irumu lau Hosé dan le lanügǘnbei Ehiptun. Ñein aba haluguruni lun aban wügüri gíriti Potifárü. Nadagimeinti Potifárü lun urúei Ehiptuna, le unbei lagúahoua Faraón.

Hosé furisunrugu

Hanarimeti luadigimaridun Hosé lun Potifárü le liyubudiri. Ligía, dan le wügürihali Hosé, aba líchuguni Potifárü lun ligía lan ariha tau luban. Kati uagu nihán lubéi Hosé furisunrugu? Tadüga lani Potifárü weiriou.

Aban meha wügüri magadiñeti Hosé, busentuti lani Potifárü weiriou lun larounrun tuma. Gama lumoun subudi lumuti Hosé luagu wuriba lan lira, ligía mabuseerun lubéi ladügüni. Aba tagañidun lani Potifárü weiriou saragu, dan le liabin tani weiriei, aba tariñagun lun: ‘Wuribati Hosé le, álugati yebe lafosurunina lun narounrun luma!’ Afiñeti Potifárü tun, aba lagañidun luma Hosé saragu. Aba ladaüragüdüni.

Murusun dan lárigiñe aba larihin tábuti furisun luagu aban lan wügüri buiti Hosé. Ligíati líchugunbaliñu sun adaürǘtiñu lábugiñe laríaahan. Fiú dan lárigiñe aba lagañidun Faraón luma hábuti eseriwihatiñu diwéin lúbiñe luma giñe le hábuti adaagutiñu fein, aba ladaüragüdüniñu. Aban áriebu, gewenedütiña kada aban hádangiñe aban uénedü espechaliti, ani ibidiñeti lila houn. Larugan binaafin aba lariñagun Hosé houn: ‘Abahüdagua huméi huénedü nun.’ Ábati lafunranguagüdüni Hosé lanichigu hawenedü, lau lidehan Bungiu.

Lun eseriwihati diwéin, ariñagati Hosé: ‘Ǘrüwa weyu lárigiñe le báfuridun furisunrugúgiñe, ábayame bíchaahani likopun urúei lun kei meha badügüni. Danme le báfuridun, badimurehame lun urúei nuagu, ábame bíderagunina lun náfuridun yáagiñe.’ Ánheinti lun adaaguti fein aba lariñagun Hosé: ‘Ǘrüwa weyu lárigiñe le ladüürüni urúei Ehiptuna bichügü.’

Ǘrüwa weyu lárigiñe aba lasuseredun le lariñagubei Hosé. Aba ladüürüni Faraón lichügü adaaguti fein. Ánheinti le eseriwihabei diwéin aba lasagarún furisunrugúgiñe ábaya leseriwidun lun urúei. Gama lumoun aba labulíeidagun luéi Hosé! Madimurehanti luagu lun Faraón, mosuti lerederun Hosé furisunrugu

Agumesehani 39:1-23; 40:1-23.



Álügüdahani burí

  • Átiri irumu lau Hosé dan le lanügǘnbei Ehiptun, ani ka asuseredubei dan le lachülürün ñein?
  • Ka uagu ladaürǘwa Hosé?
  • Ka wadagimanu libihubei Hosé furisunrugu?
  • Ka ladügübei Hosé luagu eseriwihati diwéin luma le adaagubei fein lúbiñe Faraón dan le furisunrugu habéi?
  • Ka asuseredubei lárigiñe lasagarún eseriwihati diwéin furisunrugúgiñe?

Lanwoun burí álügüdahani

  • Aliihabei Agumesehani 39:1-23.

    Kei meha ua lubéi lilurudun Bungiu bürüñü le asíadiruti agabarahani lidan lidaani Hosé, ka adügübei lun lanurahan tuéi lani Potifárü weiriou? (Agu. 2:24; 20:3; 39:9.)

  • Aliihabei Agumesehani 40:1-23.

    Abahüdaguabei luénedü eseriwihati diwéin lau fiú dimurei luma anichigu le líchugubei Heowá lun Hosé (Agu. 40:9-13).

    Ka meha luénedübei adaaguti fein, ani ka meha lanichigubei? (Agu. 40:16-19.)

    Ida liña háyeihani lílana musu úaraguati ani gunfuranda ligía ligaburi Hosé uguñe weyu? (Agu. 40:8; Sal. 36:9; Huan 17:17; Adü. 17:2, 3.)

    Ida liña lafuranguagüdüni Agumesehani 40:20 ligaburi harihini kristiánugu efeduhani le lánina lagunfulirunua irumu? (Apur. 7:1; Mar. 6:21-28.)