Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 21: Gimugatiña lun Hosé

Abahüdaguni 21: Gimugatiña lun Hosé

ARIHABEI lirun larihín nibureinti le úouga ni murusun emenigini luagu! Hosé líribei. Sun liña haluguruni líbugañanu houn wügüriña ha ñǘdünbaña Ehiptun. Ladügǘba Hosé idamunime ñein. Ka funa san uagu hadügei líbugañanu Hosé katei wuribati le? Ladüga hagimugan lun Hosé.

Haluguruni líbugañanu Hosé

Hanarimeti meha línsiñe Hosé lun Hakobu, le háguchi. Arufuda lumuti línsiñe lun dan le ladügünbei aban tubuidun daüguaü dururutu lun. Dan le harihini diisi íbugañanu ha lanarime línsiñe Hosé lun Hakobu, aba hagimugahan aba giñe leyereegudun Hosé houn. Gama lumoun anihein giñe amu resun le uéigiñebei leyereeguda houn.

Aba gewenedü lan Hosé biama uénedü. Lidan biángubei luénedü habuluchaguña líbugañanu lun. Ábatima leyereegudun Hosé houn dan le labahüdagunbalin uénedü burí le houn.

Aban weyu, dan le hóunigiruñanu lan líbugañanu Hosé lilügüniñu háguchi mudún, aba lariñagun Hakobu lun Hosé lun lan lidin ariha ida liña lan lidin houn. Dan le harihinbalin íbugañanu ha liabin Hosé dísegiñe, aba hariñagun fiú hádangiñe: ‘Áfara waméi hilagubei!’ Gama lumoun aba lariñagun Rubén le íbugañaü: ‘Uá, madüga huméi le!’ Lubaragiñe lira, aba hádaruni Hosé lidoun aban welu le mábeihali. Ábati hañuurun lun desidírü hamá kaba lan hadüga lau.

Lidan añaha lan asaminara kaba lan hadüga lau, ligía hayabin fiú ísümaelina. Aba lariñagun Hudá houn líbirigu: ‘Alugura waméi houn ísümaelina.’ Ábati haluguruni Hosé luagu wein murusun pülata! Wuribati le hadügübei, magudemehabutiñu!

Kábati hariñaga íbirigu ha lun háguchi? Aba háfarun aban gábara aba hádarunu tubuidun ladaüragun Hosé lidoun tita gábara tuguya aba hanügünu lun háguchi hariñaga lun: ‘Anuhán wadarirun. Arihabóun anhein ladaüragun lubéi Hosé.’

Dan le larihinu Hakobu daüguaü aba lagúaragun. ‘Áfarala somu animaalu áraabuna Hosé.’ Ítara liñati habuseerun líbugañanu Hosé lun lasaminarun háguchi. Aba lírudun Hakobu saragu. Ayahuaha lumuti luagu bandi weyu. Gama lumoun móunwenti Hosé. Ariha waméi ka lan asuseredubei lun lidan fulasu le ñeinhin lubéi hanügei.

Agumesehani 37:1-35.



Álügüdahani burí

  • Ka uagu gimuga habéi líbugañanu Hosé lun ani ka hadügübei?
  • Ka habusenrubei líbugañanu Hosé hadügün lun, ani ka lariñagubei Rubén?
  • Ka asuseredubei dan le hachülürünbei fiú alugurahatiñu Ísümaelina?
  • Ka hadügübei líbugañanu Hosé lun lasaminarun háguchi luagu hilá lan Hosé?

Lanwoun burí álügüdahani

  • Aliihabei Agumesehani 37:1-35.

    Ida liña gayara lan háyeihani kristiánugu lani Hosé hénpulu dan le hariñahan luagu luriban igaburi lidan damuriguaü? (Agu. 37:2; Fad. 5:1; 1 Ko. 1:11.)

    Ka anügübaliñu líbugañanu Hosé lun hagarabaagun luagun? (Agu. 37:11,18; Ari.27:4; Sant. 3:14-16.)

    Ka katei naturáliti lánina igarigu larufudubei Hakobu? (Agu. 37:35.)